Ester 8 - Bible in Tzeltal Bachajón

Smandar Asuero ta scoltayel judiohetic

¹ Ha nix ta yorahil a, te ajwalil Asuero la ya'be te ajwalil-ants Ester te sna Amán, te scontra te judiohetique. Te Mardoqueo tal ta stojol te ajwalil, como te Ester yalbeyejix te ha stajun te Mardoqueo.

² Te ajwalil la sloq'ues te sch'ocow te la yich'be hilel te Amán, la ya'be te Mardoqueo. Te Ester la ya'be scuentahin te bintic ay yu'un te Amán.

³ Ta patil te Ester la scha'c'opon xan te ajwalil, la spahcan sba ta ye'tal yoc, yac ta oq'uel soc ta yalbeyel wocol te yacuc slajimbe sc'oblal te bin chopol schapoj te Amán te sts'umbal Agag ta stojol te judiohetique.

⁴ Te ajwalil la shach bahel ta stojol Ester te sbastón pasbil ta oro, hich hahch te Ester, la stehc'an sba ta stojol te ajwalil,

⁵ hich la yal: Teme lec ya ya'iy te ajwalil, teme lecon ta sit soc teme stojil ya ya'iy te ajwalil soc teme lecon ta yo'tan, ac'a yich' ts'ihbayel mandaril te ya slajimbe sc'oblal te cartahetic te la schahpan te Amán snich'an Hamedata, sts'umbal Agag, te la sts'ihbay yu'un slajinel te judiohetic te ayic ta jujusehp q'uinal yu'un te ajwalil.

⁶ Como ¿bin yu'un ya nax quil te wocol ya xtal ta stojol te pueblo cu'un? ¿Bin yu'un ya nax quil te lajinel yu'un te nación cu'une? xchi.

⁷ Te ajwalil Asuero la sjac'be te ajwalil-ants Ester soc te Mardoqueo te judio-winic: Te ho'on la jca'beyix Ester te sna Amán, soc la sjihpanic te Amán ta ts'apbil te' yu'un jihpanel ta scaj te la shach sc'ab ta scontrahinel te judiohetique.

⁸ Ts'ihbayahic hiche ta stojol te judiohetic ta scuenta sbihil te ajwalil te bin lec yac awa'iyic, soc a'beyahic sellohin ta sch'ocow te ajwalil, xchi. (Como te mandaril te ts'ihbabil ta scuenta sbihil ajwalil soc te yich'oj sellohil ta sch'ocow te ajwalil, ma xhu' ta lajimbeyel sc'oblal.)

⁹ Ha yu'un ic'otic tal te secretariohetic yu'un te ajwalil ta oxeb scha'winic (23) c'ahc'al ta yoxebal u, ha te u Siván. Spisil te bin la yal te Mardoqueo la yich' ts'ihbabeyel te judiohetic, te schebal ajwaliletic, gobernadoretic soc te príncipaletic yu'un te huqueb shucwinic (127) ta sehp q'uinal c'alal ta India ha to ta Etiopía, ha chican te sts'ihbajelic te jujusehp q'uinal, soc ha chican te sc'op te jujuntic pueblo; ha nix hich te judiohetic ha chican te sts'ihbajelic soc te sc'opique.

¹⁰ La sts'ihbay ta scuenta sbihil te ajwalil Asuero, la ya'be yich' sellohil ta sch'ocow te ajwalil, la sticonlan bahel te cartahetic ta scuenta winiquetic te mohemic ta cawu te mero ya xbehenic, te ha nix cawuhetic yu'un te ajwalil.

¹¹ Ta cartahetic la yal te ajwalil te ya xhu' ya stsob sbahic te judiohetic ta spisil pueblohetic ta scoltayel scuxlejalic; te ya sjinic, ya smilic soc jc'axel ya slajinic spisil mach'atic ay ya'tejibic yu'un guerra ta pueblo o jsehp q'uinal te ya xtal scontrahinic, soc ya smilic te alaletic soc antsetic yu'unic soc ya spojbeyic te biluquetic yu'unique.

¹² Hich ya yich' pasel ta junax c'ahc'al ta spisil ta sehp q'uinal yu'un te ajwalil Asuero, ha ta yoxlajunebal (13) c'ahc'al ta slahchayebal (12) u, ha te u Adar.

¹³ Te copia yu'un te mandar la yich' puhquel ta jujusehp q'uinal scuenta yu'un ya sna'ic spisil te pueblohetic te la yal te chapaluc me te judiohetic ta hich ora yu'un ya sutbeyic spacol te scontrataque.

¹⁴ Te winiquetic te mohemic ta cawuhetic te mero ya xbehenic, ora loq'uic bahel ta scuenta smandar te ajwalil; soc la yich' puhquel te mandar ta Susa te capital.

¹⁵ Te Mardoqueo loc' bahel ta stojol te ajwalil, slapoj yax soc sac sc'u' scuenta ajwalil, soc muc'ul corona pasbil ta oro soc chi'in-yaxal smehyil-pac' pasbil ta lino fino. Te pueblo Susa awonic yu'un yutsil q'uinal;

¹⁶ soc te judiohetic ha sc'ahc'alel sacal q'uinal soc yutsil yo'tanic, tse'el yo'tanic soc yich'el ta muc'.

¹⁷ Ta jujusehp q'uinal soc ta jujun pueblo te banti c'oht te smandar ajwalil, te judiohetic bayel yutsil q'uinal soc tse'el yo'tanic yu'un, ay q'uin soc ha yorahil spasel te bin mulantic sba yu'unic. Bayelic ta yantic pueblohetic ta q'uinal la scuy sbahic ta judiohil, como la xi'ic te judiohetique.