Esdras 8 - Bible in Tzeltal Bachajón

Mach'atic suhtic tal soc Esdras

¹ Ha'ic ini te jtsobawetic yu'un chahpalchahp sna sme'static, te mach'atic ts'ihbabil sts'umbalic te la sjoquinon loq'uel tal ta Babilonia te c'alal ay ta ajwalil a te Artajerjes:

² Ta sts'umbal Finees: Gersón; ta sts'umbal Itamar: Daniel; ta sts'umbal David: Hatús, sts'umbal Secanías;

³ ta sts'umbal Paros: Zacarías, soc joquimbil yu'un lajuneb swaxacwinic (150) ta tuhl winiquetic te ochemic ta lista soque.

⁴ Ta sts'umbal Pahat-moab: Elioenai snich'an Zeraías, soc joquimbil yu'un lajunwinic (200) ta tuhl winiquetic.

⁵ Ta sts'umbal Secanías: te snich'an Jahaziel, soc joquimbil yu'un ho'lajunwinic (300) ta tuhl winiquetic.

⁶ Ta sts'umbal Adín: Ebed snich'an Jonatán, soc joquimbil yu'un lajuneb yoxwinic (50) ta tuhl winiquetic.

⁷ Ta sts'umbal Elam: Jesaías snich'an Atalías, soc joquimbil yu'un lajuneb schanwinic (70) ta tuhl winiquetic.

⁸ Ta sts'umbal Micael: Zebadías snich'an Micael, soc joquimbil yu'un chanwinic (80) ta tuhl winiquetic.

⁹ Ta sts'umbal Joab: Obadías snich'an Jehiel, soc joquimbil yu'un waxaclajuneb sbuluchwinic (218) ta tuhl winiquetic.

¹⁰ Ta sts'umbal Selomit: te snich'an Josifías, soc joquimbil yu'un waxacwinic (160) ta tuhl winiquetic.

¹¹ Ta sts'umbal Bebai: Zacarías snich'an Bebai, soc joquimbil yu'un waxaqueb scha'winic (28) ta tuhl winiquetic.

¹² Ta sts'umbal Azgad: Johanán snich'an Hacatán, soc joquimbil yu'un lajuneb swacwinic (110) ta tuhl winiquetic.

¹³ Ta sts'umbal Adonicam, te patil talic, hich ay sbihilic: Elifelet, Jeiel soc Semaías, soc joquimbilic yu'un oxwinic (60) ta tuhl winiquetic;

¹⁴ Ta sts'umbal Bigvai: Utai soc Zabud, soc joquimbilic yu'un lajuneb schanwinic (70) ta tuhl winiquetic.

¹⁵ La jtsobticlan ta ti'muc'ul-ha' te ya xbaht ta Ahava, tey halajotic oxeb c'ahc'al ta campamento. La jquil te ay sacerdotehetic, pero ma ba la jta jtuhluc levita.

¹⁶ Ha yu'un la jticonlan bahel te Eliezer, Ariel, Semaías, Elnatán, Jarib, Elnatán, Natán, Zacarías soc Mesulam, te príncipal winiquetic, soc te Joiarib soc Elnatán, te p'ijil winiquetic.

¹⁷ La jticon bahel ta stojol te Iddo te jtsobaw ta lugar Casifia sbihil, la jcalbeyic bahel spisil te bintic ya sc'an ya yalbeyic te Iddo soc te yermanotac, te a'batetic yu'un te Templo te ayic ta Casifia, scuenta yu'un ya yic'botic tal mach'atic ya x'a'tejic ta sna te Dios cu'untique.

¹⁸ Te bin ut'il ay ta jtojoltic te sc'ab Dios, la yiq'uic tal te Serebías, jtuhl winic te ay sp'ijil yo'tan, te ha sts'umbal Mahli snich'an Leví, snich'an Israel, soc te snich'nab soc yermanotac te Serebías, waxaclajuntuhl (18);

¹⁹ soc la yic'botic tal te Hasabías soc Jesaías, sts'umbal Merari, soc snich'nabic soc yermanotac, jtahb (20) ta tuhl.

²⁰ Soc te a'batetic yu'un te Templo te otsesotic ta a'tel yu'un te David soc te príncipaletic te ya scoltayic ta a'tel te levitahetic, ha buhluchwinic (220) ta tuhl te ts'ihbabil sbihilic. Spisilic loc' sbihilic ta tuhlultuhl.

²¹ La jpuc ta halel te ya me jcom jwe'eltic tey ta ti'muc'ul-ha' Ahava scuenta yu'un ya jpehc'an jbahtic ta stojol te Dios cu'untic soc ya jc'ambetic te lecuc ya xc'oht te behel cu'untic soc te alaletic soc te biluquetic cu'untique.

²² Como q'uexawon ta sc'ambeyel te ajwalil soldadohetic soc jmoheletic ta cawu te ya scoltayotic ta stojol te jcontratic ta be; como hich calbeyejtic te ajwalil: Te sc'ab te Dios cu'uncotic ay ta stojol spisil mach'atic ya slehic, pero te yu'el soc te yilimba ya scontrahin te mach'atic ya yihquitayic, xchihotcotic.

²³ Ha yu'un la jcom jwe'eltic soc hich la jc'ambetic te Dios cu'untic; ha la ya'iybotic te jc'optique.

²⁴ Parte la jcac' lahchaytuhl (12) príncipaletic yu'un te sacerdotehetic, ha te Serebías, Hasabías soc lajuntuhl yermanotac,

²⁵ la jp'isbeyic yalal te plata, oro soc te bintic ya xtuhun ta Templo te la yac' scuenta smahtan te Templo te ajwalil soc te j'ac'-o'taniletic soc príncipaletic yu'un, soc spisil te israeletic te tey ayic a.

²⁶ La jp'isbeyic lajuneb yoxlajunwinic scha'bahc' (659) talento plata, ho'winic (100) talento biluquetic pasbilic ta plata; soc ho'winic (100) talento oro,

²⁷ jtahb (20) muc'ul tazahetic pasbilic ta oro te lajunwinic yoxbahc' (1,000) dracma soc cheb vasohetic pasbilic ta bronce te mero lec ch'ulbilic, te hich yutsil a te bin ut'il oro.

²⁸ Hich la jcalbeyic: Ha'ex soc te bintic ya xtuhun, ch'ultesbilex ta stojol Jehová; te plata soc te oro ha mahtaniletic te ac'bilic ta sc'anojel-o'tanil ta stojol Jehová te Dios yu'un te jme'jtatique.

²⁹ Ya me awilic soc ya me acanantayic ha to c'alal yac ap'isic ta stojol te príncipal sacerdotehetic soc levitahetic, soc te jtsobawetic yu'un jujuchahp na yu'un Israel ta tsahlul nahetic ta sna Jehová ta Jerusalén, xchihon.

³⁰ Ha yu'un te sacerdotehetic soc te levitahetic la yich'ic te jayeb yalal p'isbil te plata, oro soc te bintic ya xtuhun, yu'un ya yich'ic tal ta Jerusalén ta sna te Dios cu'untique.

³¹ Hahchotic bahel ta ti'muc'ul-ha' Ahava ta slahchayebal (12) c'ahc'al ta shachel u, bohotic ta Jerusalén. Ay ta jtojoltic te sc'ab te Dios cu'untic, la scoltayotic ta sc'ab te contratac soc te j'eleq'uetic ta be.

³² Hich c'ohotic ta Jerusalén, la jcux co'tantic oxeb c'ahc'al.

³³ Ta schanebal c'ahc'al la yich' p'isel ta sna te Dios cu'untic te plata, oro soc te bintic ya xtuhun, la yich' a'beyel spisil te sacerdote Meremot snich'an Urías, soc te Eleazar snich'an Finees; soc joquinotic yu'un te levitahetic Josabad snich'an Jesúa soc Noadías snich'an Binuy.

³⁴ Spisil ahtaybil soc p'isbil, soc la yich' ts'ihbayel ta hich ora te yalale.

³⁵ Te mach'atic te suhtic tal ta chuquel la yaq'uic scohtol chic'bil mahtaniletic ta stojol te Dios yu'un Israel: ha lahchaycoht (12) jcolel torohetic, waclajuneb yo'winic (96) ta coht tat tuminchijetic, huclajuneb schanwinic (77) ta coht jcolel tuminchijetic, soc lahchaycoht (12) tat tentsunetic scuenta stojel mulil, spisilic scuenta scohtol chic'bil mahtaniletic ta stojol te Jehová.

³⁶ Soc la ya'beyic te smandar te ajwalil te mach'atic yich'oj ya'telic ta cuentahinwanej soc te capitanetic ta jehch muc'ul-ha'; la scoltayic te pueblo soc te na yu'un te Diose.