Efesios 4 - Bible in Tzeltal Bachajón

Jun ayotic ta scuenta Espíritu

¹ Ho'on te ayon ta chuquel ta scuenta te Cajwaltic, ya calbeyex bayel wocol te hichuc ya xcuxajex a te bin ut'il pasel ya sc'an yu'un te ic'bilexix yu'un Dios.

² Peq'ueluc me xawac' abahic, lamaluc me awo'tanic, talel c'axel cuhchuc awu'unic ta scuenta sc'uxul awo'tanic,

³ ac'ahic fuersa te junuc awo'tan abahic ta scuenta te Espíritu, ta scuenta te lamal q'uinal te ya yac' junajuc awo'tanique.

⁴ Junax baq'uet soc junax Espíritu, hich te bin ut'il junax te bin smuc'ulinej co'tantic te ha ic'bilex yu'une,

⁵ junax Cajwaltic, junax te bin ay ta ch'uhunel, junax ich'ha';

⁶ junax Dios te ha Tatil cu'untic jpisiltic, te ha scuentahinej spisil, te ya x'a'tej ta jcuentatic jpisiltic soc te ay ta co'tantic jpisiltic.

⁷ Pero ta jtuhlutuhl la ya'botic yutsil mahtanil, ha chican te jayeb yac'oj te Cristo.

⁸ Ha scuentahil te hich ya yal: C'alal mo bahel ta toyol, la yic' bahel jchuqueletic, soc la yac'ticlambe mahtaniletic te winiquetic, te xchihe.

⁹ ¿Bin a te mo bahel te xchihe? Yu'un nix nahil co bahel c'alal ta sc'ubulil te bahlumilale.

¹⁰ Te mach'a co bahel, ha nix te mach'a mo bahel c'alal ta sba ch'ulchan, scuenta yu'un ya snojes spisil.

¹¹ Ha nix te la yac' te ay jpuc-c'opetic, jalwanejetic, te mach'atic ya yalic te lec yach'il c'op, pastoretic soc p'ijubteswanejetic,

¹² scuenta yu'un ya schahpanic ta lec te mach'atic ch'uhltesbilic scuenta spasel te ya'tel Dios, scuenta yu'un ya yich' yip te sbaq'uetal Cristo,

¹³ ha to teme pajal ay sch'uhunel co'tantic ta jpisiltic soc te pajal ya jna'betic sba te Snich'an Dios, te ha muc'ul ants-winicotic ya xc'ohotic, te ya jtahtic c'ohel te stalel te Cristo.

¹⁴ Hich ma ba alalotiquix te xyal xmo te co'tantic, te bayuc ya x'ic'ototic bahel yu'un biluc nohptesel soc te lo'loyel yu'un winiquetic te yac slo'loybelic ta scuenta te lo'loywanej yu'unique;

¹⁵ pero smelelil ya xc'opojotic ta scuenta sc'uxul co'tantic, spisil behbehucotic me ta muc'ubel ta stojol te Jolal, ha te Cristo,

¹⁶ te ha nix ta scuenta te spisil te baq'uet, te ts'acticlambil soc te junax c'ohem ta scuenta spisil te schihal, ha chican bin yilel ya'tel ta jujuchahp, ya xmuc'ub soc ya yich' yip ta scuenta c'uxul-o'tanil.

Te yach'il cuxlejal ta scuenta Cristo

¹⁷ Hich ya calbeyex soc hich ya jpasex ta mandar ta scuenta te Cajwaltic, te ma me hichuc atalelic te bin ut'il stalel te jyanlumetic, te biluc nax ya slomic ta pasel ta scaj te ma sna'ic q'uinal,

¹⁸ te ay ta yihc'al q'uinal te spensaric soc namal ayic ta stojol te cuxlejal yu'un Dios ta scaj te ma sna'ic q'uinal, ta scaj te tulan te yo'tanique.

¹⁹ C'alal ch'ay sq'uexlalic, la yac' sbahic ta spasel mulil ta sbaq'uetalic, hich spisil yo'tanic la spasic te bintic chopol ta pasele.

²⁰ Yan te ha'exe, ma hichuc la anopbeyic sc'oblal te Cristo,

²¹ teme melel awa'iybeyejic sc'op soc teme la awich'ic p'ijubtesel ta scuenta, hich te bin ut'il ay te smelelil c'op ta stojol Jesús.

²² Cholahic loq'uel te apoco'-talelic te bin ut'il ayex ta nahil to, te yac ta bohlobel ta scaj lo'loyel ta mulil;

²³ ach'ubenuc me apensaric,

²⁴ soc lapahic me te yach'il cuxlejal, te hich pasbil te bin ut'il ay te Diose, te toj bin ya spas soc te ch'ultesbil ta smelelil.

²⁵ Ha yu'un ac'a hiluc awu'unic lot, ta smelelil c'op xac'oponic apat-axuhquic, como junax baq'uet ayotic ta jpisiltic.

²⁶ Teme ya x'ilinex, ma me xata amulic yu'un; ma me yaleluc stibiltayel yaquex ta ilimba,

²⁷ soc ma me xawac' banti ya x'och te pucuje.

²⁸ Te mach'a ya sna' elec', ma me xya'iyix elec', ac'a a'tejuc, ac'a spas ta sc'ab te bin lec ta pasel, scuenta yu'un hich ya sta a te bin ya ya'be te mach'a mayuc bin ay yu'une.

²⁹ Ma me xloc' bohlc'op ta awehic, ha'uc nax lequil c'op te ya xtuhun scuenta ya'beyel yipic te yantic, scuenta yutsil slequil te mach'a ya ya'iybeyex ac'opique.

³⁰ Ma me xawa'beyic smel yo'tan te Ch'ul Espíritu yu'un Dios, te ha sello awich'ojic ha to teme la sta yorahil acolelique.

³¹ Jc'axel hiluc awu'unic spisil lablab-o'tantaywanej, c'ahc'ubel, ilimba, utaw, ixta'c'op, soc spisil bintic chopol.

³² Talel c'axel xawa'be aba awil yutsil awo'tanic soc c'uxultaywanej, talel c'axel xapasbe abahic perdón, hich te bin ut'il Dios la spasbeyex perdón ta scuenta Cristo.