Efesios 1 - Bible in Tzeltal Bachajón

Spatil-o'tanil

¹ Pablo, jpuc-c'opon yu'un te Jesucristo ta scuenta sc'anojel yo'tan Dios, ta stojol te mach'atic ayic ta Éfeso te ch'uhltesbilic soc te jun yo'tanic ta stojol Cristo Jesús:

² Ayuc me yutsil-o'tanil soc lamal q'uinal ta atojolic yu'un te Jtatic Dios soc yu'un te Cajwaltic Jesucristo.

Bendicionetic ta scuenta Cristo

³ Bayeluc me yutsil sc'oblal Dios te Stat te Cajwaltic Jesucristo, te ha ta scuenta Cristo ya'beyejotic spisil ta chahp bendicionetic te ayic ta ch'ulchan.

⁴ Ha la stsahotic ta scuenta Cristo te c'alal ma to ayuc a te bahlumilal, scuenta yu'un ch'ultesbil ya xc'ohotic soc mayuc cabalquiltic ta stojol a.

⁵ Ta scuenta te sc'uxul yo'tan namey chapal yu'un te ya yal-snich'aninotic ta scuenta te Jesucristo, hich te bin ut'il la sc'an te yutsil sc'anojel yo'tan,

⁶ scuenta yu'un hich ya yich' halbeyel yutsil sc'oblal te yutsil yo'tan te la sc'uxultayotic a ta scuenta te Mach'a c'ux ta yo'tane.

⁷ Ha ta scuenta te colotic ta libre ta scuenta sch'ich'el, te ay perdón yu'un mulil, ha chican te sc'uhlejal te yutsil yo'tan

⁸ te c'ax bayel la ya'botic soc spisil p'ijil-o'tanil soc bintic ay ta na'el.

⁹ La ya'botic jna'tic te sc'anojel yo'tan te ma ba hu' ta na'el, yu'un hich la sc'an yo'tan, te hich schapoj ta yo'tan ta scuenta Cristo,

¹⁰ te ha ta scuenta Cristo ya stsob spisil bintic ay ta ch'ulchan soc spisil bintic ay ta bahlumilal te c'alal ya sta yorahil te chapal yu'une.

¹¹ Ta scuenta Cristo ha nix hichotcotic la yac' te ya x'ac'ot quich'cotic bintic ay yu'un Dios, te bin ut'il namey tsahbilotcotic yu'un te mach'a ya yac' c'ohtuc ta pasel spisil bin ya sc'an yo'tan stuquel,

¹² scuenta yu'un ya xhalbot yutsil sc'oblal ta jcuentacotic, ho'otcotic te nahil smuc'ulinej co'tancotic te Cristohe.

¹³ Ha nix hichex te c'alal la awa'iyic te smelelil c'op, ha te lec yach'il c'op yu'un acolelic, te c'alal la ach'uhunic la awich'ic asellohilic, ha te Ch'ul Espíritu te halbil ya xtale.

¹⁴ Te Ch'ul Espíritu ha seña te quich'ojtic te ya yac' ta na'el te ya me x'a'botic quich'tic te bin halbil yu'un Dios, ha to c'alal ya sta yorahil ya xcol ta libre te mach'atic yu'un Dios, scuenta halbeyel yutsil sc'oblal.

Te Espíritu yu'un p'ijil-o'tanil soc te bin ac'bil ta na'el yu'un Dios

¹⁵ Ha scuentahil ini, te c'alal la jca'iy te ay sch'uhunel awo'tanic ta stojol te Cajwaltic Jesús soc te c'ux ta awo'tanic spisil te mach'atic ch'uhltesbilic,

¹⁶ ma ba ya jquehchan yalbeyel wocol Dios awu'unic, yac jna'belex te c'alal ya jc'opon te Diose.

¹⁷ Ya jc'ambe te Dios yu'un te Cajwaltic Jesucristo, ha te Tatil yu'un utsilal, te yacuc ya'beyex espíritu yu'un p'ijil-o'tanil soc yu'un sna'el bin ac'bil ta na'el yu'un Dios, scuenta yu'un ya xhu' yac ana'beyic sba ta lec.

¹⁸ Ya jc'ambe Dios te yacuc sjambeyex awo'tanic scuenta yu'un yac ana'ic bin a te yac amahlibelic te ha ic'bilex yu'une, soc yu'un yac ana'ic bin ut'il ay te yutsil sc'uhlejal te bin ya yich' hilel te Dios, ha te mach'atic ch'uhltesbilic,

¹⁹ soc yu'un yac ana'ic te c'ax muc' te yu'el te ya x'a'tej ta jtojoltic ho'otic te jch'uhunejtique; ha nix te yu'el

²⁰ te a'tej ta stojol Cristo, te la scha'cuxajtes ta yohlil te mach'atic chamenic soc la yac' huhcajuc ta swa'el-c'ab Dios ta ch'ulchan,

²¹ te ha toyol c'oht yu'un spisil ajwaliletic, te mach'atic ay ya'telic, te ay yu'elic soc jpasawetic ta mandar, soc ha toyol c'oht yu'un spisil bihililetic te ya yich'ic a'beyel, ma ha'uc nax ta ora ini, soc ta patil bahel.

²² Dios la yac' ta ye'tal yoc te Cristo spisil bintic ay, soc ta scuenta te iglesia la yac' te ha jolal c'oht yu'un spisil bintic ay.

²³ Te iglesia ha sbaq'uetal Cristo, ha te ya sts'acay te Mach'a ts'acal ya snojes spisil.