Eclesiastés 9 - Bible in Tzeltal Bachajón

¹ Melel la jcac' co'tan ta sna'el spisil ini, la jquil te ayic ta sc'ab Dios te mach'atic toj yo'tanic soc te mach'atic ay sp'ijil yo'tanic, soc te ya'telique. Soc te ants-winiquetic ma sna'ic bin ut'il ay sc'oblal c'uxul-o'tanil o il-o'tantayel, aunque spisil ay ta stojolic.

² Pajal quechel ya xc'oht ta stojol spisilic: te mach'a toj yo'tan soc te mach'a chopol yo'tan, te mach'a lec yo'tan soc te mach'a ma lecuc yo'tan; te mach'a sac yo'tan soc te mach'a ma ba sac yo'tan, te mach'a ya yac' milbil mahtanil soc te mach'a ma ba ya yac' milbil mahtanil; te bin ya xc'oht ta stojol te mach'a lec yo'tan hich nix ya xc'oht ta stojol te jmulawil, soc te mach'a ay bin ya yal ta jamal hich nix te mach'a ya xi' te ay bin ya yal ta jamal.

³ Ta spisil te bin ay ta pasel ta ye'tal ch'ulchan, ha te bin chopol ini: ha te pajal quechel ya xc'oht ta stojol spisilic; soc te yo'tan te ants-winic nojel ta bin chopol soc sonsohil ta spisil scuxlejal, patil ya xbahtic ta banti ay te mach'atic chamenique.

⁴ Pero ay to bin ya smahliy te mach'a cuxul to, como ha lec xan a te ts'i' te cuxul te bin ut'il te choj te chamene.

⁵ Como te mach'atic cuxajtic ya sna'ic te ya me xchamic, pero te mach'atic chamenic mayuc bin ya sna'ic, soc mayuquix yan bin ya x'a'botic; ch'aybiliquix ta o'tanil.

⁶ Ch'ayemiquix te sc'uxul yo'tanic, te yil-o'tantaywanejic soc te bin xbiq'uet ta yo'tanic; ma xyaq'uix sbahic a te bin ya yich' pasel ta ye'tal ch'ulchan.

⁷ Bahan, tse'eluc me awo'tan ya xwe'at, soc tse'eluc me awo'tan yac awuch' te vino awu'une, como lequix yo'tan Dios yu'un te awa'tele.

⁸ Spisiluc me ora sac ac'u' apac' yac alap, soc spisiluc me ora ayuc perfume ta ajol.

⁹ Tse'eluc me awo'tan soc awihnam te c'ux ta awo'tan, ta spisil acuxlejal te mayuc scuentahil, te ya'beyejat ta ye'tal ch'ulchan. Ha me te bin a'bilat te c'alal cuxulat soc te tulan ya x'a'tejat ta ye'tal te ch'ulchane.

¹⁰ Spisil te bintic yac apas, pasa soc spisil awip, como ta stsobojibal mach'atic chamenic, te banti ya xbahat, mayuc a'tel, mayuc bin ay ta chahpanel, mayuc bin ay ta na'el soc mayuc p'ijil-o'tanil tey a.

¹¹ Ay yan bin la jquil ta ye'tal ch'ulchan: Te tsalaw ma ha'uc yu'un te mach'a ya xhu' yu'un ahnimal, o te tsalaw te guerra ma ha'uc yu'un te mach'atic ay yipic, te we'elil ma ha'uc yu'un te mach'atic p'ij yo'tanic, o te c'ulejalil ma ha'uc yu'un te mach'atic ay snopojibal yu'unic, o te lec ta o'tanil te mach'atic p'ijubenic; como ya sta yorahil soc ay bintic ya xc'oht ta stojol spisilic.

¹² Soc mayuc mach'a sna'oj te yorahil: Hich te bin ut'il chayetic te tsacbilic ta chopol tsacojibal, o hich te bin ut'il ha'mal-mut te ya yich' chuquel ta yaquil, hich te ants-winiquetic ya yich'ic chuquel ta yorahil wocol te repente nax ya xc'oht ta stojolic.

¹³ Soc la jquil ta ye'tal ch'ulchan te p'ijil-o'tanil ini te muc' sc'oblal la jca'iy:

¹⁴ Ay tut pueblo te mayuc bayel yajwal; tal ta contrahinel yu'un jtuhl ajwalil te bayel yip, la sjoytay soc la spas muc'ul mohibaletic.

¹⁵ Ta yutil te pueblo ay jtuhl winic te pobre pero ay sp'ijil yo'tan, ha la scoltay te pueblo ta scuenta te sp'ijil yo'tane. ¡Pero mayuc mach'a patil na'ot yu'un te pobre winique!

¹⁶ Ha yu'un hich la jcal: Ha lec xan te p'ijil-o'tanil te bin ut'il te yipe, aunque p'ajbil te sp'ijil yo'tan te pobre winic soc ma x'ich'ot ta cuenta te sc'ope.

¹⁷ Ha lec xan te lamal sc'op te mach'a ay sp'ijil yo'tan, te bin ut'il te yaw te ajwalil ta yohlil mach'atic ma sna'ic q'uinal.

¹⁸ Ha lec xan te p'ijil-o'tanil te bin ut'il te a'tejibaletic yu'un guerra; pero jtuhl jmulawil ya sjin bayel bintic lec.