Eclesiastés 5 - Bible in Tzeltal Bachajón

Ha sonso teme hich nax ay bin yac awal ta jamal

¹ Te c'alal ya xbahat ta templo yu'un Dios tsahtaya te bin yac apas. Ha lec xan te ya xnohpojat bahel ta ya'iyel te bin ut'il yaq'uel milbil mahtanil hich te bin ut'il ya spasic te mach'atic ma sna'ic q'uinal, te ma ba ya sna'ic te ay bin chopol ya spasique.

² Ma me orahuc ya xc'opojat, ma me orahuc ay bin yac awal ta stojol Dios, como Dios ay ta ch'ulchan, yan te ha'ate ayat ta bahlumilal. Ha yu'un ma me bayeluc ya xc'opojat.

³ Como te bayel bintic yac anopilan ya xtal wayichiletic yu'un, soc ha sc'op mach'a ma sna' q'uinal teme bayel ya xc'opojate.

⁴ Teme ay bin yac awal ta stojol Dios, ma me xhalajat ta spasel, como ma smulan te mach'a ma sna' q'uinal. Pasa te bin awaloje.

⁵ Ha lec xan te mayuc bin yac awal ta jamal, te ay bin yac awal ta jamal pero teme ma ba ya xc'oht ta pasel awu'une.

⁶ Ma me xawac' te yac ata amul ta scuenta awe, soc ma me xawal ta stojol ch'ul a'bat te hich la awal ta scaj te ma ba la ana'. ¿Bin yu'un yac awac' ilinuc Dios yu'un te bin la awal soc te ya sjimbat te ya'tel ac'abe?

⁷ Como ta banti ay bayel wayichiletic ha nix hich ay bayel bintic tojol nax soc bayel c'opetic. Te ha'ate, xi'a te Diose.

Te bintic tojol ta cuxlejal

⁸ Teme yac awil te ay banti ayic ta uts'inel te pobrehetic, soc te ma stojiluc ya xchahpanotic, ma me xchamuc awo'tan yu'un; como ay mach'a muc' ya'tel te ya x'ilot yu'un mach'a toyol xan yu'une, soc ay mach'a toyol xan yu'un schebalic.

⁹ Te bin ya xloc' ta lumq'uinal ha yu'un spisilic, soc ha nix hich te ajwalil ay bin ya sta ta lumq'uinal.

¹⁰ Te mach'a c'ux ta yo'tan te taq'uine, mayuc bin ora ya yal te tic' a; te mach'a c'ux ta yo'tan te c'ulejalil, mayuc bin ora ya yal te tiq'uix a. Ha nix hich tojol nax.

¹¹ Teme ya xp'ohl te bintic ay, ha nix hich ya xp'ohl te mach'atic ya slajinic. ¿Bin ya sta a te yajwale? ha xanix te ya smulan yilele.

¹² Ha buhts'an swayel te mach'a ya x'a'tej, teme bayel ya xwe' o jteb nax; yan te jc'ulej ma x'ac'ot ta wayel yu'un te bintic bayel ay yu'une.

¹³ Quiloj ta bahlumilal te bin c'ax chopol: ha te ay c'ulejalil te q'uejbil yu'un te yajwal te ha nix ya xjihnot yu'une,

¹⁴ te ya xch'ay yu'un ma sna' stuhunel, hich mayuc bin ya xhil yu'un te snich'ane.

¹⁵ Watal a ayintesot yu'un snan, ha nix hich ya xcha'suht bahel; mayuc bin ay yu'un te ya'tel te ya xhu' ya yich' bahele.

¹⁶ Ha nix hich mero chopol ini: Hich te bin ut'il tal, ha nix hich ya suht bahel. ¿Bin la sta a te a'tej ta tojol nax?

¹⁷ Soc te jayeb c'ahc'al cuxul ya xwe' ta yihc'al q'uinal, soc bayel swocol, ay schamel soc xut'xon q'uinal ya ya'iy.

¹⁸ Quiloj te bin lec: ha te ya xwe' ya x'uch' soc ya ya'iybe yutsil te ya'tel te ya yo'tantay spasel ta ye'tal ch'ulchan te jayeb c'ahc'al a'bibil scuxlejal yu'un Dios, como hich ay te bin ay yu'une.

¹⁹ Soc, te mach'a ya x'a'bot yu'un Dios sc'ulejal soc bintic ay yu'un, ha nix hich ya x'a'bot te ya xhu' ya stuhun te bintic a'bot, te jun yo'tan bin ut'il ay scuxlejal soc te tse'el yo'tan yu'un te ya'tele; ha mahtanil yu'un Dios ini.

²⁰ Ma ba bayel ya sna'ulan te c'ahc'aleletic yu'un scuxlejal, como Dios ya x'a'bot bayel yutsil yo'tan yu'un.