Eclesiastés 11 - Bible in Tzeltal Bachajón

¹ Ac'a bahel ta ha' te pan awu'un, bayel c'ahc'al ta patil ya me ata yan buelta.

² Pucticlana ta hucwohc', o ta waxacwohc' te bintic ay awu'un, como ma na'biluc awu'un bin wocolil ya xtal ta q'uinal.

³ Teme ay bayel ya'lel te tocale, ya smal cohel ya'lel ta lumq'uinal. Teme ya xbuch bahel ta sur o ta norte te te'e, ta banti ya xbuch bahel tey ya xhil a.

⁴ Te mach'a ya stsahtay yil te iq'ue, ma ba ya ya'iy ts'umbajel, soc te mach'a ya yil te tocaletic, mayuc bin ora ya stsob te sit awal-ts'unubile.

⁵ Hich te bin ut'il ma ba yac ana' te be yu'un te iq'ue, o bin ut'il ya xchapaj ta sch'uht snan te alale, ha nix hich ma xhu' awu'un sna'el te bin ya spas te Diose, ha te mach'a la spas spisil bintic ay.

⁶ Ta sab ts'umbeya sbac' te ats'unube, soc ta tibiltic ma xawa'be scux yo'tan te ac'abe, como ma xana' ban ay lec ya xc'oht, teme ha ini o ha te yane, o teme lec ya xc'oht schebalic.

⁷ T'ujbil te sacal q'uinal, soc lec ya ya'iy jsitic te ya yil te c'ahc'ale.

⁸ Aunque ay mach'a bayel ha'bil ya xcuxaj soc tse'el yo'tan yu'un spisilic, ac'a sna' te ay bayel c'ahc'al te yihc'al q'uinal, soc spisil te bintic quechel ta talele, tojol nax.

Tojobtesel ta stojol ach'ix-queremetic

⁹ Jcolel al-nich'anat, tse'eluc awo'tan ta yorahil te jcolel al-nich'anate, soc ac'a smulan awo'tan te yorahil te awach'ix-queremil. Pasa te bin ya smulan awo'tan soc te bintic yac awil ta asit, pero na'a me te Dios ya spasbat cuenta spisil ini.

¹⁰ Ha yu'un loq'uesa ta awo'tan te ilimba soc loq'uesa ta atojol te bin chopole, como te awach'ix-queremil tojol nax.