Eclesiastés 10 - Bible in Tzeltal Bachajón

C'ax lec te p'ijil-o'tanil

¹ Te chamen hahetic ya sjimbeyic yic' te perfume; hich nix te jteb sonsohil, ya sjimbe yutsil te p'ijil-o'tanil soc ich'el ta muc'.

² Te yo'tan te mach'a p'ij ay ta swa'el-c'ab, pero te yo'tan te mach'a ma sna' q'uinal, ay ta sq'uexam-c'ab.

³ Te c'alal yac ta behel bahel a te mach'a ma sna' q'uinal, mayuc bin ya sna', soc ya ya'be yil spisilic te ma sna' q'uinal.

⁴ Teme ya x'ilin ta atojol te ajwalil, ma me xawihquitay te alugare; como te lamal-o'tanil ya slajin te bintic muc' te ma stojiluque.

⁵ Ay bin chopol te quiloj ta ye'tal ch'ulchan, ha te bin ma stojiluc te hahchem ta stojol te ajwalil:

⁶ Te mach'atic ma sna'ic q'uinal ya x'a'botic muc' ya'telic; yan te jc'ulejetic ya shuhcan sbahic te banti peq'uel sc'oblal.

⁷ Ay quiloj mosohetic te mohemic ta cawu; soc príncipaletic te yacalic ta behel hich te bin ut'il mosohetic.

⁸ Te mach'a ya shot ch'en, ya me xyahl cohel tey a. Te mach'a ya sjam bahel be ta ts'ahc, ya me xti'ot ta chan.

⁹ Te mach'a ya swaluy ton, ya me x'ehchentesot yu'un. Te mach'a ya xot' si', ya xlajinot yu'un.

¹⁰ Teme mayuc ye te yechej, teme ma ba ya yich' huxel, ya sc'an te tulan xan ya yich' jimel; ha lec te ya yich' tuhunel te p'ijil-o'tanile.

¹¹ Teme nahil ya xti'awan te chan te ma to ba mombil a, tojol te mach'a ya xmonawan.

¹² Ay yutsil te c'op ya xloc' ta ye te mach'a ay sp'ijil yo'tan, yan te sc'op te mach'a ma sna' q'uinal ha nix ya xjihnot yu'un.

¹³ Te sc'op ta shahchibal mayuc scuentahil; te slajibal te bin ya yal jc'axel ma xtuhun.

¹⁴ Te mach'a ma sna' q'uinal bayel bin ya yal. Teme mayuc mach'a ya sna' bin ya xc'oht ta pasel, ¿mach'a ya xhu' ya ya'be sna' bin ya xc'oht ta pasel ta patil yu'un?

¹⁵ Te mach'a ma sna' q'uinal hich ya xluhb yu'un te ya'tel te ma xtojob bahel ta pueblo.

¹⁶ ¡Ay awocol, ha'at nación, teme querem te ajwalil awu'un, soc teme te príncipaletic awu'un ya xhahch spasic q'uin ta sahb!

¹⁷ ¡Bayel me awutsil, ha'at nación, teme ha snich'an mach'a ich'bil ta cuenta te ajwalil awu'un, soc te príncipaletic awu'un ya xwe'ic ta yorahil yu'un ya sta xan yipic a, ma ha'uc yu'un ya x'ochic ta yacubel!

¹⁸ Ta scuenta ch'ajilal ya xyahl cohel smuhquil te na; ta scaj te ya spet sc'ab ya x'och ha'al ta na.

¹⁹ Ya yich' pasel bayel we'elil scuenta tse'el-o'tanil, te vino ya yac' yutsil q'uinal, soc spisil bin ya xtuhun a te taq'uine.

²⁰ Ni ha'uc ta awo'tan xawalbe chopol sc'oblal te ajwalil, soc ta awayib ma xawalbe chopol sc'oblal te jc'ulej, como te mutetic ta toyol ya yich'ic bahel te c'ope, te bintic ya xwihlic ha ya yaq'uic ta na'el.