Eclesiastés 1 - Bible in Tzeltal Bachajón

Tojol spisil

¹ Ha te bin la yalticlan te Jp'ijubteswanej, te snich'an David, te ajwalil ta Jerusalén.

² Tojol, tojol, xchi te Jp'ijubteswanej. Mero tojol, tojol ta spisil, xchi.

³ ¿Bin ya xloc' yu'un a te winic yu'un spisil te ya'tel ya spas ta ye'tal ch'ulchan?

⁴ Jcaj ts'umbalil ya xc'ax, jcaj ts'umbalil ya xtal, pero stalel ya xhil te q'uinale.

⁵ Ya xloc' tal te c'ahc'al soc ya xmahl te c'ahc'al, soc ya suj sba ta suhtel bahel ta lugar banti hahch tal.

⁶ Te ic' ya shu'xiyot bahel ta sur, soc ya suht sba ta stojol norte; xjoyet ya xbehen, ya xcha'suht xan banti hahch tal.

⁷ Spisil te muc'ul-ha'etic ya xbaht ta mar, pero ma xnoj te mare. Te banti hahch tal te muc'ul-ha'etic, tey ya xcha'suhtic xan bahel a yu'un ya x'oquin xan bahel.

⁸ Ta spisil ya yac' luhbel, c'ax hich a te ya xhu' yalbel te winique. Ma xluhb te sitil ta yilel, soc ma xluhb chiquinil ta ya'iyel.

⁹ Te bin c'ohemix ta pasel, ya xcha'c'oht xan ta pasel, te bin pasbilix, ya xc'oht xan ta pasel; mayuc bin yach'il ay ta ye'tal ch'ulchan.

¹⁰ ¿Ay bal bin ay te hich ya xhu' ta halel: Ilawil, yach'il ini, te xchihe? Nameyix ay, te c'alal ma to ayucotic a.

¹¹ Mayuc ta na'el te bin c'ohemix ta pasel, soc te bintic ya to xc'oht ta pasel mayuc ta na'el yu'un te mach'atic patil ya xtalique.

Te bintic yiloj te Jp'ijubteswanej

¹² Ho'on te Jp'ijubteswanejon, ayon ta ajwalil yu'un Israel ta Jerusalén.

¹³ La jca'telin yilel soc slehel ta scuenta p'ijil-o'tanil spisil bin ya yich' pasel ta ye'tal ch'ulchan. Ha tulan a'tel a'bot yu'un Dios te yal-snich'nab ants-winiquetic scuenta yu'un ya x'a'tejic a.

¹⁴ La jquil spisil te bintic ya yich' pasel ta ye'tal ch'ulchan; ilawil, tojol nax ay spisil, ha snutsel ic' c'ohem.

¹⁵ Te bin ts'otol ma xhu' ta tojobtesel; te bin ma ts'acaluc ma xhu' ta ahtayel.

¹⁶ Hich la jcal ta co'tan: Ilawil, muc' c'ohemon soc c'ax hich jp'ijil a te bin ut'il spisil mach'atic nahil c'axic ta ajwalil ta Jerusalén. Jnopoj bayel p'ijil-o'tanil soc te bintic ay ta na'el, xchihon.

¹⁷ La jcac' co'tan ta sna'beyel sba te p'ijil-o'tanil soc nix te locahijel soc te bin sonsohil. La jna' te ha nix snutsel te iq'ue.

¹⁸ Como te banti ay bayel p'ijil-o'tanil ay bayel wocol; teme ya xp'ohl te bintic ay ta na'el, ya xp'ohl te wocole.