Deuteronomio 5 - Bible in Tzeltal Bachajón

Lajuneb mandariletic

¹ Te Moisés la stsob tal spisil te Israel, hich la yalbe: A'iya awa'iy, Israel, te bintic chapal soc te bintic halbil ta mandar te ya calbeyex awa'iyic yo'tic, nopahic soc canantayahic scuenta yu'un yac ac'ohtesic ta pasel.

² Te Jehová te Dios cu'untic la schap sc'op soc ho'otic ta wits Horeb.

³ Ma ha'uc la schap sc'opic soc te jme'jtatic, ha la schap soc ho'otic, jpisiltic te cuxulotic to ta ora ini.

⁴ Ta mero asitic la sc'oponex te Jehová ta wits ta yohlil te c'ahq'ue.

⁵ Ta hich ora ayon ta ohlil yu'un Jehová soc te ha'exe, scuenta yu'un ya calbeyex te sc'op te Jehová, como la axi'ic te c'ahc', hich ma ba mohex bahel ta wits. Hich la yal te Diose:

⁶ Ho'on Jehovahon te Dioson awu'un te la jloq'uesat tal ta Egipto te banti nahinat ta mosohil.

⁷ Ma me ayuc yan diosetic awu'un ta jtojol.

⁸ Ma me xapas awahcanan o sloc'ombahil bintic ayic ta ch'ulchan, ta bahlumilal, o ta ha'etic ta ye'tal te bahlumilal.

⁹ Ma me xaquejan aba ta stojolic soc ma me xawac' aba ta a'batinel yu'unic, como ho'on Jehovahon te Dioson awu'un xut'et co'tan, ya ca'be castigo yu'un smulic te me'iltatiletic te yal-snich'nabic ta yoxcajal soc ta schancajal te mach'atic ya yil-o'tantayonic,

¹⁰ soc ya jc'uxultay bayel ta mil te mach'atic c'uxon ta yo'tanic soc te ya sch'uhumbonic te mandariletic cu'une.

¹¹ Ma me xatojol tahbe ta halel sbihil te Jehová te Dios awu'un, como te Jehová ma ba ya smucbe smul te mach'a ya stojol tahbe ta halel te sbihile.

¹² Canantaya te sc'ahc'alel cux-o'tan yu'un hich yac ach'ultes, hich te bin ut'il la spasat ta mandar te Jehová te Dios awu'une.

¹³ Waqueb c'ahc'al ya x'a'tejat soc yac apas spisil awa'tel;

¹⁴ yan te shuquebal c'ahc'al, ha sc'ahc'alel cux-o'tan yu'un Jehová te Dios awu'une. Ma me x'a'tejat a, ni ha'uc aquerem-nich'an, awantsil-nich'an, awa'bat, acriada, j'a'tel-wacax, burro, o biluc chambahlamil awu'un, o te jyanlum ay ta awohlil, scuenta yu'un pajal yac acux awo'tan soc awa'bat soc acriada.

¹⁵ Na'a me te ayat ta mosohil ta namey ta sq'uinal Egipto, te tey la sloq'uesat tal a te Jehová te Dios awu'un ta scuenta yu'el soc ta sc'ab shachoj. Ha scuentahil te Jehová te Dios awu'un la spasat ta mandar te yac acanantay te sc'ahc'alel cux-o'tan.

¹⁶ Ich'a ta muc' te atat soc anan, hich te bin ut'il la spasat ta mandar te Jehová te Dios awu'un, scuenta yu'un naht aworahil ya xcuxajat soc te lec ya xc'ohat ta aq'uinal ya ya'bat te Jehová te Dios awu'une.

¹⁷ Ma me xawa'iy milaw.

¹⁸ Ma me xawa'iy antsiwej; ma me xawac' aba ta antsinel.

¹⁹ Ma me xawa'iy elec'.

²⁰ Ma me xale ta c'op scuenta scontrahinel te apat-axuhc.

²¹ Ma me xbic'taj awo'tan yu'un yihnam apat-axuhc, soc ma me xamulambe te sna apat-axuhc, te sq'uinal, ya'bat, scriada, j'a'tel-wacax, burro o bintic ay yu'un te apat-axuhc, xchi te Jehová.

Bayel xiw yo'tan te pueblo Israel

²² Ha c'opetic ini la yal ta tulan c'op te Jehová ta stojol spisil te pueblo awu'unic ta wits, ta yohlil te c'ahc', tocal soc yihc'al q'uinal; mayuc bin yan la yal. Patil la sts'ihbay ta cha'pehch tonetic, la ya'bon ta jc'ab.

²³ Te c'alal la awa'iyic te c'op te loc' tal ta yihc'al q'uinal soc te la awilic te wits te yac ta tihlel, talex ta jtojol soc spisil te príncipaletic yu'un te jujuchahp soc te mamaletic awu'unic,

²⁴ hich la yalbonic: Ilawil, te Jehová te Dios cu'untic la yaq'uix quiltic te yutsilal soc te smuc'ule, soc la jca'iybetiquix sc'op te loc' tal ta yohlil te c'ahq'ue. Yo'tic quilojtiquix te Jehová ya sc'opon ants-winic, soc ma ba ya xcham yu'un.

²⁵ Ha yu'un, ¿bin yu'un ya xlajotic? como te muc'ul c'ahc' ini ya me slajinotic. Teme ya ca'iybetic xan sc'op te Jehová te Dios cu'untic ya me xchamotic yu'un.

²⁶ Como ¿mach'a a te ya ya'iybe sc'op te cuxul Dios te ya xc'opoj ta yohlil c'ahc', hich te bin ut'il la jca'iytiquix te ho'otic, te ya to xcuxaj xane?

²⁷ Nohpojan bahel ha'at, a'iya awa'iy bin ya yal te Jehová te Dios cu'untic. Ha'at yac awalbotic ca'iycotic spisil te bintic ya yalbat te Jehová te Dios cu'untic, te ho'otcotic ya ca'iycotic soc ya jpascotic, xchihex.

²⁸ Te Jehová la ya'iy te bin la awalbonic, hich la yalbon: La jca'iybeyix sc'op te pueblo ini te bin la yalbat; lec te bin la yalique.

²⁹ ¡Te hichuc ay yo'tanic spisil ora, te yacuc xi'onic soc te yacuc sch'uhumbonic spisil ora te mandariletic cu'un, scuenta yu'un lec ya xc'ohtic soc yal-snich'nabic ta spisil ora!

³⁰ Bahan halbeya: Suhtanic bahel ta anahilpaq'uic, xchihat.

³¹ Yan te ha'ate ya me xhilat li' ta jtojol, ya calbat awa'iy spisil te mandariletic, te bintic chapal soc te bintic caloj ta mandar te yac awa'be snopic, scuenta yu'un ya sch'uhunic spasel tey ta q'uinal te ya ca'be ta scuentahic, xchi.

³² Ila me awilic hiche te yac apasic hich te bin ut'il la spasex ta mandar te Jehová te Dios awu'unique, ma me xhowiyex ta wa'el o ta q'uexam.

³³ Behenanic ta be te la spasex ta mandar te Jehová te Dios awu'unic, scuenta yu'un hich ya xcuxajex soc lec ya xc'ohex a, soc te naht aworahil ya xnahinex tey ta q'uinal te yac awu'untayique.