Deuteronomio 4 - Bible in Tzeltal Bachajón

Moisés ya stsits te ya me sch'uhunic mandar

¹ Yo'tic, Israel, a'iya me awa'iyic te bintic chapal soc te bintic halbil ta mandar te ya ca'beyex anopic, scuenta yu'un yac apasic soc ya xcuxajex, soc ya x'ochex bahel ta yu'untayel te q'uinal te ya ya'beyex te Jehová te Dios yu'un ame'atatique.

² Ma me xawa'beyic smohlol te c'op ya calbeyex ta mandar, soc ma me ayuc bin yac atup'ic tey a, scuenta yu'un yac apasic te mandariletic yu'un Jehová te Dios awu'unic te ya ca'beyexe.

³ La awil ta asitic te bin la spas te Jehová yu'un Baal-peor; ha te lajinotic yu'un Jehová te Dios awu'unic spisil te mach'atic ayic ta awohlilic te la st'unic te Baal-Peor.

⁴ Pero te ha'ex te jun awo'tanic la at'unic te Jehová te Dios awu'unic, apisilic cuxulex to c'alal ora.

⁵ Ilawil, la jca'beyexix anopic te bintic chapal soc te bintic yaloj ta mandar, hich te bin ut'il la spason ta mandar te Jehová te Dios cu'un, scuenta yu'un hich yac apasic tey ta q'uinal te banti ya xc'oht awu'untayique.

⁶ Canantayahic soc pasahic, como hich ya sna'ic a te nacionetic te ay sp'ijil awo'tanic soc te yac ana'be scuentahil; ya me ya'iyic spisil te mandariletic ini, hich me ya yalic: Melel ay sp'ijil yo'tan soc ya sna'be scuentahil ta lec te muc'ul nación ini, xchihic me.

⁷ Como ¿ay bal yan muc'ul nación te hich nopol ay ta stojolic te diosetic yu'unic te bin ut'il nopol ay ta jtojoltic te Jehová te Dios cu'untic te c'alal ya jc'opontique?

⁸ Soc ¿ay bal yan muc'ul nación te hich ay mandariletic soc te hich ay stojil chahpanwanej yu'unic te bin ut'il spisil te mandariletic ini te ya ca'beyex ta ora ini?

⁹ Ha yu'un canantaya me aba soc tsahtaya me aba ta lec, scuenta yu'un ma ba ya xch'ay ta awo'tan te bintic awiloj soc ma ba ya xch'ay ta ajolic te jayeb c'ahc'al cuxulex; a'beya sna' te awal-anich'anic soc te amamataque.

Te bin c'oht ta stojol Israel ta wits Horeb

¹⁰ Te bin c'ahc'alil la atehc'an abahic ta stojol te Jehová te Dios awu'unic ta wits Horeb, te c'alal hich la yalbon te Jehová: Tsoba tal te pueblo scuenta yu'un ya calbe ya'iy te c'opetic cu'un, scuenta yu'un ya snopic te ya yich'onic ta muc' te jayeb c'ahc'al cuxulic ta q'uinal, soc te ya ya'beyic snop te yal-snich'nab, te xchihe,

¹¹ hich nohpojex tal, la atehc'an abahic ta ye'tal wits te yac ta loq'uel c'ahc' c'alal ta yohlil ch'ulchan, soc potsol ta ihc'al q'uinal, ta tocal soc ahc'abal.

¹² Te Jehová la sc'oponex ta yohlil te c'ahq'ue; la awa'iybeyic sc'op, pero mayuc bin la awilic, ha nax la awa'iybeyic sc'op.

¹³ Ha la yalbeyex awa'iyic te chapbil-c'op yu'un, te la spasex ta mandar te yac ach'uhunic spasel: ha te lajuneb mandariletic te la sts'ihbay ta cha'pehch tonetic.

¹⁴ Soc ha nix yorahil a la spason ta mandar te Jehová te ya ca'beyex anopic te bintic chapal yu'un soc te mandariletic, scuenta yu'un yac apasic tey ta q'uinal ya xc'oht awu'untayic.

Comel ta sch'uhunel loc'omba

¹⁵ Ha yu'un canantaya me abahic ta lec; mayuc bin la awilic te c'alal la sc'oponex ta Horeb ta yohlil c'ahc' te Jehová,

¹⁶ scuenta yu'un ma ba yac abohlobtes abahic, te yac apasic loc'omba awu'unic, biluc sloc'ombahil, teme sloc'ombahil winic o ants,

¹⁷ sloc'ombahil biluc chambahlamil ta q'uinal, o biluc mutil te ya xwihle,

¹⁸ sloc'ombahil biluc te staslajan ya xbehen ta lum, o biluc chayil ay ta ha' ta ye'tal te bahlumilal.

¹⁹ Soc ma me xatoy mohel asit ta ch'ulchan, te c'alal yac awil te c'ahc'al, u, eq'uetic, spisil te bintic ayic ta ch'ulchan, te ya yu'untaybat awo'tan, te yac aquejan aba ta stojolic soc te yac ach'uhuntay, como ta spisil ini te Jehová te Dios awu'un la yac'ticlambe spisil te nacionetic ta ye'tal te ch'ulchane.

²⁰ Pero te ha'exe la yiq'uex te Jehová, la sloq'uesex tal ta Egipto, ta horno yu'un taq'uin c'ohem, scuenta yu'un ha pueblo ya c'ohex yu'un, hich te bin ut'il ayex ta ora ini.

²¹ Te Jehová ilin ta jtojol ta acuentahic, soc jc'axel la yal ta jamal te ma xhu' ya xc'axonix bahel ta muc'ul-ha' Jordán soc ma xhu' ya x'ochonix tey ta lequil q'uinal te ya ya'beyex ta acuentahic te Jehová te Dios awu'unique.

²² Ya xchamon hilel li' ta q'uinal ini, ma ba ya sohlonix bahel ta Jordán, yan te ha'exe ya me sohlex bahel, ya me awu'untayic te lequil q'uinale.

²³ Canantaya me abahic, ma me xch'ay ta awo'tanic te chapbil-c'op yu'un Jehová te Dios awu'unic te la schahpan ta atojolic, soc ma me xapasic awahcananic o sloc'ombahil biluc a te la scomex ta spasel te Jehová te Dios awu'unic,

²⁴ como te Jehová te Dios awu'un ha c'ahc' te ya xlajinwan, ha Dios te xut'et yo'tan.

²⁵ Te c'alal ayix awal-anich'nabic soc amamataquic a, soc te c'alal mamalubenexix ta q'uinal, teme ya x'och abohlobtes abahic yu'un yac apas awahcananic o sloc'ombahil biluc a, teme yac apasic te bintic chopol ta stojol Jehová te Dios awu'unic, te hich yac ahachbeyic yilimba a,

²⁶ ya cac' ta testigo te ch'ulchan soc bahlumilal te ora me ya xch'ayex ta q'uinal te yac awu'untayic te c'alal ya sohlex bahel ta Jordán. Ma me haluc c'ahc'al ya x'ayinex tey a, ya me awich'ic lajinel ta jc'axel.

²⁷ Te Jehová ya me spuquex bahel ta yantic pueblohetic, soc ma me ayuc bayel ya xhilex ta nacionetic te banti ya yiq'uex bahel te Jehová.

²⁸ Tey yac ach'uhuntayic diosetic te pasbilic yu'un winiquetic ta te' soc ta ton, te ma xyilic q'uinal, ma xya'iyic c'op, ma xwe'ic soc ma xyich'ic ic'.

²⁹ Pero teme tey yac alehic a te Jehová te Dios awu'unic, ya me atahic, teme ta spisil awo'tan soc spisil ach'uhlel yac alehique.

³⁰ Te c'alal ay awocolic soc te ya stahex spisil te wocol ini, teme ta patil bahel ya suhtex ta stojol Jehová te Dios awu'unic soc yac ach'uhumbeyic te sc'ope,

³¹ como ay sc'uxul yo'tan te Jehová te Dios awu'un: ma ba ya yihquitayat, ma ba ya slajinat, soc ma ba ya xch'ay ta yo'tan te chapbil-c'op te jc'axel la yalbe ta jamal te ame'atatique.

³² Joc'oya awa'iy sc'oblal te bin c'axemix tal, te c'alal ma to ayucat a, te c'alal Dios la spas te ants-winic ta bahlumilal, teme ta jehch sti'il ch'ulchan c'alal ta yan sti'il, te hich c'ohem ta pasel te bintic muc' c'ohemix ta pasel, o teme ay hich ay ta a'iyele.

³³ ¿Ay bal yan pueblo te ya'iybeyej sc'op te Dios te yac ta c'op ta yohlil te c'ahc', hich te bin ut'il la awa'iy, te ma ba cham yu'une?

³⁴ ¿O ay bal yan dios te tal yu'untay jun nación ta yohlil yan nación ta scuenta pruebahetic, señahiletic, jchahp a'teliletic, guerra, ta scuenta yu'el soc sc'ab shachoj, soc te mero xiweltic sba te bin la spas, hich te bin ut'il la spasbeyex ta Egipto te Jehová te Dios awu'unique?

³⁵ La yich' aq'uel awil scuenta yu'un hich yac ana' a te ha mero Dios stuquel te Jehová, te mayuc yan dios.

³⁶ C'alal ta ch'ulchan la ya'bat awa'iybe sc'op scuenta ap'ijubtesel; soc ta lumq'uinal la ya'bat awil te muc'ul c'ahc' yu'un, soc la awa'iybe sc'op ta yohlil te c'ahq'ue.

³⁷ Te bin ut'il c'ux la ya'iy ta yo'tan te ame'atatic, la stsahbe te patil al-nich'anetic yu'unic, la sloq'uesat tal ta Egipto ta scuenta te sjoquinejat soc ta scuenta te smuc'ul yu'el,

³⁸ yu'un ya stenticlan loq'uel ta atojol nacionetic te c'ax hich yipalic soc c'ax hich yipic a te bin ut'il te ha'ate, scuenta yu'un ya yic'at ochel soc ya ya'bat ta acuenta te sq'uinalic, hich te bin ut'il ay ta ora ini.

³⁹ Ha yu'un nopa yo'tic soc na'a me ta awo'tan te bin ut'il te Jehová ha Dios ta ch'ulchan soc ta bahlumilal, mayuc yan.

⁴⁰ Ch'uhuna te mandariletic yu'un te yac calbelat ta ora ini, scuenta yu'un lec ya xc'ohat soc lec ya xc'oht a te patil awal-anich'nab, soc te ya xnahtub aworahil te ayat ta q'uinal te ya ya'bat scuenta sbahtel q'uinal te Jehová te Dios awu'une, xchi te Moisés.

Ahnibal pueblohetic ta stojol sloq'uib c'ahc'al yu'un Jordán

⁴¹ Te Moisés la stsa oxeb pueblohetic te ayic ta stojol banti ya xloc' tal c'ahc'al yu'un Jordán,

⁴² scuenta yu'un tey ya xbaht ta ahnel a te mach'a ma hichuc yo'tan ya smil te spat-xuhc, te mayuc bin ora yutoj sba soc; teme tey ya xbaht ta ahnel, hich ya xcol scuxlejal.

⁴³ Te pueblohetic: ha te Beser te ay ta jochol taquin q'uinal, ta muc'ul spamlej, ha yu'un te sts'umbal Rubén; Ramot te ay ta Galaad, ha yu'un te sts'umbal Gad; soc Golán te ay ta Basán, ha yu'un te sts'umbal Manasés.

Moisés ya scha'halbe sc'oblal te Ley

⁴⁴ Ha te ley te la ya'be te snich'nab Israel te Moisés.

⁴⁵ Ha te testigo c'op, te bintic chapal soc te bintic halbil ta mandar te Moisés la yalbe te snich'nab Israel c'alal loq'uic tal ta Egipto;

⁴⁶ te c'alal ayic ta jehch muc'ul-ha' Jordán ta muc'ul spamlej te snuhp'usitayej sba soc Bet-peor, ta sq'uinal Sehón te ajwalil yu'un te amorreohetic te nahin ta Hesbón, te tsalot yu'un Moisés soc te snich'nab Israel te c'alal loq'uic tal ta Egipto.

⁴⁷ La yich'beyic sq'uinal soc te sq'uinal Og te ajwalil yu'un Basán, cheb ajwalil amorreohetic te nahinemic ta stojol banti ya xloc' tal c'ahc'al yu'un Jordán.

⁴⁸ La yich'beyic te q'uinal c'alal Aroer te ay ta sti'il te sjuclej Arnón, c'alal ta wits Sirión, ha te Hermón,

⁴⁹ soc spisil te Arabá ta stojol banti ya xloc' tal c'ahc'al yu'un Jordán, c'alal ta mar yu'un Arabá, ta ye'tal wits Pisga.