Deuteronomio 3 - Bible in Tzeltal Bachajón

Israel la stsal Og ajwalil yu'un Basán

¹ Patil la jcac'tic buelta, mohotic bahel ta sbehlal Basán. Loc' tal stahotic te Og ajwalil yu'un Basán, soc spisil te pueblo yu'un, tal ya'botic guerra ta Edrei.

² Pero la yalbon te Jehová: Ma me xaxi', yu'un la jca'batix ta ac'ab soc spisil te pueblo yu'un soc te sq'uinale. Hich me xapasbe te bin ut'il la apasbe te Sehón te amorreo ajwalil te nahinem ta Hesbón, xchi.

³ Te Jehová te Dios cu'untic, ha nix hich la ya'botic ta jc'abtic te Og ajwalil yu'un Basán, soc spisil te pueblo yu'un. La jlajintic ha to c'alal mayuc mach'a hil yu'un.

⁴ Hich la jcu'untaytic spisil te pueblohetic yu'un, mayuc hil junuc pueblo te ma ba la jcu'untaytic; ay oxwinic (60) pueblohetic, ha spisil te sq'uinal Argob te cuentahimbil yu'un Og ta Basán.

⁵ Spisil te pueblohetic ay toyol ts'ahquetic, soc puertahetic soc sc'atal-te'eletic, soc ay bayel yantic pueblohetic te mayuc sts'ahcule.

⁶ Jc'axel la jlajintic, hich te bin ut'il la jpasbetic te Sehón ajwalil yu'un Hesbón, ta jujun pueblo la jmilticlantic te winiquetic, antsetic soc alaletic.

⁷ Pero la jquic'betic spisil te chambahlametic soc te biluquetic yu'un te pueblohetique.

⁸ Ta hich ora spisil te q'uinal c'alal ta sjuclej Arnón ha to ta wits Hermón la jquich'betic ta sc'ab te cheb ajwalil amorreohetic te ayic ta stojol sloq'uib c'ahc'al yu'un te muc'ul-ha' Jordán.

⁹ (Te sidonetic, ha Sirión sbihil yu'unic te Hermón; te amorreohetic, Senir sbihil yu'unic stuquel.)

¹⁰ La jquich'tic spisil te pueblohetic ta spamlej, spisil te Galaad soc spisil te Basán c'alal ta Salca soc Edrei, ha te pueblohetic scuentahinej a te Og ta Basán.

¹¹ (Te Og ajwalil yu'un Basán ha slajibal te nahtil winiquetic. Te swayib pasbil ta taq'uin, ha baluneb xuhc'ubil snahtil soc chaneb xuhc'ubil sjamalil; ay ta Rabá te ay ta sq'uinal te snich'nab Amón.)

Rubén, Gad soc j'ohlil sts'umbal Manasés hilic ta nahinel ta stojol banti ya xloc' tal c'ahc'al yu'un Jordán

¹² Te q'uinal te la jcu'untaytic ta hich ora, ha te hahchem ta Aroer te ay ta sti'il te sjuclej Arnón, c'alal ta j'ohlil te witsiltic yu'un Galaad, soc te pueblohetic yu'une, la jca'be te sts'umbal Rubén soc Gad.

¹³ Te j'ohlil xan yu'un Galaad soc spisil Basán te scuentahinej a te Og, ha spisil te sq'uinal Argob, te ha sq'uinal nahtil winiquetic sbihil, la jca'be te j'ohlil sts'umbal Manasés.

¹⁴ (Te Jair, jtuhl sts'umbal Manasés, la yich' spisil te q'uinal yu'un Argob c'alal ta sti'il Gesur soc Maaca. La ya'be sbihilin te Basán te sbihil nix: Havot-jair, te hich nix sbihil c'alal ora.)

¹⁵ Te Galaad la jca'be te Maquir.

¹⁶ Te sts'umbal Rubén soc Gad la jca'be te q'uinal hahchem ta Galaad c'alal ta sjuclej Arnón, te smojon ha te yohlil te spamlej, soc c'alal ta uc'um Jaboc, te ha sti'il sq'uinalic te snich'nab Amón;

¹⁷ soc la jca'be te Arabá, te ha smojon te muc'ul-ha' Jordán, c'alal Cineret c'alal ta mar yu'un Arabá, ha te Mar Salado, ta ye'tal wits Pisga ta stojol banti ya xloc' tal c'ahc'al.

¹⁸ Ta hich ora hich la jcalbeyex: Te Jehová te Dios awu'unic la ya'beyex hilel te q'uinal ini; pero chapaluc yu'un guerra a ya me xbahtic spisil mach'atic ma xiwic, ya me xnahilijic bahel yu'un te awermanotac, te snich'nab Israel.

¹⁹ Ha xanix te antsetic, alaletic soc chambahlametic awu'unic, (ya jna' te ay bayel chambahlametic awu'unic) ya xhilic ta pueblohetic te la jca'beyex,

²⁰ ha to c'alal Jehová ya ya'be scux yo'tanic te awermanotac, hich te bin ut'il te ha'exe, soc te ya yich'ic te q'uinal ta jehch muc'ul-ha' Jordán te ya x'a'botic yu'un Jehová te Dios awu'unique. Ha to jujutuhlex ya suhtex bahel ta q'uinal te la jca'beyex, xchihon.

²¹ Soc ha yorahil a te hich la jpas ta mandar te Josué: Ta asit nix la awil spisil te bintic la spasticlambe te cheb ajwaliletic te Jehová te Dios awu'unique; hich ya spasticlambe te yantic ajwaliletic te banti ya xc'axate.

²² Ma me xaxi'ic, como te Jehová te Dios awu'unic ya me ya'be guerra ta acuentahic, xchihon.

Moisés ma ba ya x'ac'ot ochel ta sq'uinal Canaán

²³ Ha nix yorahil a la jc'opon te Jehová, hich la jcalbe:

²⁴ Cajwal Jehová, hahchematix ta ya'beyel yil te a'bat awu'un te amuc'ule soc te yu'el ac'ab; como ¿ay bal yan dios ta ch'ulchan o ta bahlumilal te ya xhu' yu'un spasel a'tel soc jchahp a'teliletic hich te bin ut'il yacat ta spasel?

²⁵ Ya calbat wocol te yacuc awac'on sohlel ta yilel te lequil q'uinal ta jehch Jordán, ha te t'ujbil witsiltic soc te Líbano, xchihon.

²⁶ Pero te Jehová ilinem ta jtojol ta acuentahic, hich ma ba la ya'iybon te jc'ope, hich la yalbon: ¡Tic'anix a! Ma me xac'opononix xan yu'un.

²⁷ Mohan bahel ta wits Pisga, toya asit ta stojol smahlib c'ahc'al, ta norte, ta sur, soc ta stojol banti ya xloc' tal c'ahc'al, ila me awil ta asit nix, yu'un ma ba ya sohlat bahel ta Jordán.

²⁸ Pasa ta mandar te Josué, a'beya smuc'ul yo'tan soc yip yo'tan, como ha ya yic' bahel te pueblo ini soc ha ya ya'be yich'ic te q'uinal yac awil yo'tic, xchi.

²⁹ Tey hilotic ta spamlej te snuhp'usitayej sba soc Bet-peor.