Cantares 8 - Bible in Tzeltal Bachajón

¹ ¡Te ha'uc jbanquilat, te la achu'umbe schu' te jnane! C'alal ya jtahat ta calle ya cuhts'uyat, mayuc mach'a ya sp'ajon yu'un.

² Ya quic'at bahel soc ya cohtsesat ta sna jnan, ha'at yac anohpteson. Ya ca'bat awuch' lequil vino, te ya'lel te granada cu'un te hichuque.

³ Te ha'uc ay ta ye'tal jol te sq'uexam-c'ab, soc te yacuc smech'on ta swa'el-c'ab.

Winic:

⁴ ¡Ach'ixetic yu'un Jerusalén, tulan ya calbeyex, ma me xatijbeyic swayel te c'uxul-o'tanil ha to c'alal ya sc'an stuquel!

Te yip te c'uxul-o'tanil Coro:

⁵ ¿Mach'a te yac ta talel ta jochol taquin q'uinal, te pacal ta snehquel te mach'a c'ux ta yo'tan? Ta ye'tal ste'el manzana la jtijbat awayel; ta banti hahch sc'uxul swocol ta alajel te anane, ta banti hahch sc'uxul te mach'a la yayintesat.

Winic: Ants:

⁶ Ac'awon hichuc sello ta awo'tan, hich te bin ut'il marca ta ac'ab; como hich ay yip te sc'uxul-o'tanil te bin ut'il te lajele, soc tulan te xut'xut'-o'tanil hich te bin ut'il te stsobojibal mach'atic chamenic. Te sc'ahc'ale ha muc'ul c'ahc', ha yat c'ahc' te bayel yip.

⁷ Bayel ha'etic ma xhu' ya stup' te sc'uxul-o'tanil, ma xhu' ya xmulot yu'un muc'ul-ha'etic. Te ayuc mach'a ya yac' spisil bintic ay ta sna scuenta stahel te sc'uxul-o'tanil, ya xp'ajot yu'un te hichuque.

Coro:

⁸ Ay quihts'intic te ma to ayuc schu'. ¿Bin ya jpastic yu'un te c'alal ya xtal ta c'anele?

⁹ Te ha'uc ts'ahc, ya jtehc'antic tey a toyol bahlal ts'ahquetic pasbilic ta plata; te ha'uc puerta, ya jmactic ta tabla yu'un cedro te hichuque.

Ants:

¹⁰ Ho'on ts'ahcon, te jchu' pajal soc bahlal ts'ahquetic. Ha yu'un hich c'ohemon ta sit te bin ut'il mach'a ya yac' lamal q'uinal.

¹¹ Te Salomón ay jun sts'usubil ta Baal-hamón; la yac' hilel ta canantayel. Jujutuhl ya sc'an ya yich' talel lajunwinic yoxbahc' (1,000) ta sehp plata te site.

¹² Te ts'usubil cu'un ay ta jtojol; te lajunwinic yoxbahc' (1,000) ta sehp plata, ha'at awu'un, Salomón, soc te lajunwinic (200) ta sehp plata yu'un te mach'atic ya scanantayic te site.

Winic:

¹³ Ha'at, te ya xnahinat ta ts'umbil q'uinal, te mach'atic sjoquinejonic yac smahliybel ya'iyic te ac'ope. ¡Halbon ca'iy!

Ants:

¹⁴ ¡Suja aba, ha'at te c'uxat ta co'tan! hichucat te bin ut'il gacela-chij o yal tsajal chij ta sba te witsiltic nojel ta sumet yic'.