Apocalipsis 20 - Bible in Tzeltal Bachajón

Lajunwinic yoxbahc' (1,000) ha'bil chucul Satanás

¹ La jquil yac ta cohel tal ta ch'ulchan jtuhl ch'ul a'bat, yich'oj llave yu'un te xahab soc slicoj muc'ul cadena ta sc'ab.

² La stsac te dragón, te antiguo chan, ha te pucuj o Satanás, la schuc lajunwinic yoxbahc' (1,000) ha'bil.

³ La sch'oj cohel ta xahab, la smac hilel ta llave soc la ya'be sello, scuenta yu'un ma ba ya slo'loylanix a te nacionetic, ha to c'alal ya sts'acay te lajunwinic yoxbahc' (1,000) ha'bile. Patil ya me yich' coltayel loq'uel jts'ihnuc.

⁴ La jquil muc'ul-huctajibaletic, soc huculic tey a te mach'atic a'bot ya'telic ta chahpanwanej. Soc la jquilbe sch'uhlelic te mach'atic xot'bot sjolic ta scaj te testigo-c'op yu'un Jesús soc ta scaj te sc'op Dios, ha te mach'atic ma ba la sch'uhuntayic te chambahlam te xiweltic sba o te sloc'ombahil, soc ma ba la yich'beyic smarca ta sti'bahic o ta sc'abic; la yich'ic scuxlejalic soc la sjoquinic Cristo ta cuentahinwanej lajunwinic yoxbahc' (1,000) ha'bil.

⁵ Ha ini te primera buelta cha'cuxajel; te yantic mach'atic chamenic ma ba cha'cuxajic ha to c'alal ts'acay te lajunwinic yoxbahc' (1,000) ha'bil.

⁶ Bayel yutsilic soc ch'uhltesbilic te mach'atic ya xcha'cuxajic ta primera buelta cha'cuxajel; ma ba ya xcuentahinotic yu'un te schebal buelta lajel, sacerdotehetic yu'un Dios soc yu'un Cristo ya xc'ohtic soc ya sjoquinic ta cuentahinwanej lajunwinic yoxbahc' (1,000) ha'bil.

⁷ Te c'alal ya sts'acay te lajunwinic yoxbahc' (1,000) ha'bil, ya xcoltayot loq'uel ta chuquel te Satanás,

⁸ ya xloc' slo'loylan te nacionetic ayic ta schanxuhcul bahlumilal, ha te Gog soc Magog, yu'un ya stsob tal ta guerra. Hich yipalic te bin ut'il shi'al mar.

⁹ Hahchic tal ta sjamalil te bahlumilal soc la sjoytayic te campamento yu'un te mach'atic ch'uhltesbilic soc te muc'ul pueblo te c'ux ta yo'tan Dios. Pero tal c'ahc' ta ch'ulchan, jc'axel la slajinlan.

¹⁰ Soc te pucuj, te lo'loyotic yu'un, ch'ojot ochel ta banti yac ta tihlel pamal c'ahc' soc azufre, te banti ay te chambahlam te xiweltic sba soc te lotil jalwanej; c'ahc'al ahc'abal ya xc'ax swocolic sbahtel q'uinal tey a.

Ich'el ta c'op ta stojol muc'ul saquil huctajibal

¹¹ La jquil muc'ul saquil huctajibal soc te mach'a hucul tey a; ahn bahel te ch'ulchan soc bahlumilal ta stojol, ma ba weht banti ya x'ayinic.

¹² Soc la jquil te mach'atic chamenic, muc' biq'uitetic, tec'ajtic ta stojol te muc'ul-huctajibal. La yich' jamel te librohetic, soc ay yan libro la yich' jamel, ha te libro scuenta cuxlejal. La yich'ic ich'el ta c'op te mach'atic chamenic, ha chican te bintic ts'ihbalambil ta hunetic, ha chican bin la spasic.

¹³ Te mar la yac' loc'uc tal te mach'atic lajemic tey a, soc te lajel soc te stsobojibal mach'atic chamenic la yaq'uic loq'uel tal te mach'atic ayic tey a. Tuhlutuhl ochic ta ich'el ta c'op, ha chican bin la spasic.

¹⁴ Te lajel soc te stsobojibal mach'atic chamenic ch'ojotic ochel ta banti yac ta tihlel pamal c'ahc'. Ha schebal buelta lajel abi.

¹⁵ Te mach'a ma ba ts'ihbabil sbihil ta libro scuenta cuxlejal, ch'ojotic ochel ta banti yac ta tihlel pamal c'ahc'.