Apocalipsis 16 - Bible in Tzeltal Bachajón

Te copahetic yu'un ilimba

¹ La jca'iy loc' tal tulan c'op ta templo te hich la yalbe te huqueb ch'ul a'batetic: Bahanic, malahic ta bahlumilal te sbahl te huqueb copahetic yu'un te yilimba Dios, xchi.

² Hich baht te primer ch'ul a'bat, la smal ta lumq'uinal te sbahl te copa yu'un, chicnaj chacaletic te chopol soc c'ux ta stojol te mach'atic yich'ojic te marca yu'un te chambahlam te xiweltic sba soc te la sch'uhuntayic te sloc'ombahile.

³ Te schebal ch'ul a'bat la smal ta mar te sbahl te tasa yu'une, c'atp'uj ta ch'ich' te mar, sjel ta sch'ich'el mach'a lajem; cham spisil bintic cuxajtic ta mar yu'un.

⁴ Te yoxebal ch'ul a'bat la smal te sbahl te copa yu'un ta muc'ul-ha'etic soc ta sloq'uib ha'etic, hich c'atp'ujic ta ch'ich'.

⁵ La jca'iy c'opoj te ch'ul a'bat te scuentahinej te ha'etic, hich la yal: Ha stojil te bin ut'il hich la awa'be stoj, Cajwal, ha'at te atalel ayat soc te atalel ayat ta namey, Ch'ul Diosat,

⁶ como la smalbeyic sch'ich'el te mach'atic ch'uhltesbilic soc te jalwanejetic; ha nix hich ch'ich' la awa'be yuch'ic, como hich ya sc'an pasel ta stojolic, xchi.

⁷ Soc la jca'iy ay mach'a c'opoj talel tey ta scajtajib ta chiq'uel mahtanil, hich la yal: Melel, Cajwaltic Dios te spisil ya xhu' awu'un, smelelil soc stojil te chahpanel awu'une, xchi.

⁸ Te schanebal ch'ul a'bat la smal te sbahl te copa yu'un ta c'ahc'al, ha a'bot te ya schic' te ants-winiquetique.

⁹ Hich chic'otic yu'un te tulan sc'ahc'al, hahch sbohlc'optaybeyic sbihil te Dios te scuentahinej te wocoletic ini, ma ba la suhtes yo'tanic yu'un soc ma ba la yalbeyic yutsil sc'oblal.

¹⁰ Te yo'ebal ch'ul a'bat la smal te sbahl te copa yu'un ta smuc'ul-huctajib te chambahlam te xiweltic sba, ihc'ub ban c'alal scuentahinej. Te ants-winiquetic la sti'ticlan yaq'uic yu'un sc'uxul te wocol

¹¹ soc la sbohlc'optayic Dios te ay ta ch'ulchan ta scaj sc'uxul te swocolic soc te schacalique; ma ba la suhtes yo'tanic yu'un te bintic spasojique.

¹² Te swaquebal ch'ul a'bat la smal te sbahl te copa yu'un ta muc'ul-ha' Éufrates, tup' ya'lel te muc'ul-ha' scuenta yu'un chapal ya xc'oht te be yu'un te ajwaliletic ya xtalic ta stojol banti ya xloc' tal c'ahc'al.

¹³ La jquil loc' ta ye te dragón, ta ye te chambahlam te xiweltic sba soc ta ye te lotil jalwanej oxeb bohl pucujetic, sjelic ta xch'uch'.

¹⁴ Ha'ic espírituhetic yu'un pucujetic te ya spasic señahiletic soc ya xbahtic ta stojol te ajwaliletic te ayic ta swohlol bahlumilal yu'un ya stsobic ta guerra ta yorahil te muc' sc'ahc'alel yu'un Dios te spisil ya xhu' yu'une.

¹⁵ Ya xtalon hich te bin ut'il j'elec'. Bayel me yutsil te mach'a wiq'uil sit soc te ya scanantay sc'u' spac', scuenta yu'un ma ba watal ya xbehen, te q'uexlaltic sba ya x'ilot, xchi te Cajwaltique.

¹⁶ Hich la stsobic tal te ajwaliletic ta jun lugar Armagedón sbihil ta hebreo.

¹⁷ Te shuquebal ch'ul a'bat la smal ta ic' te sbahl te copa yu'un, loc' tulan c'op ta templo, ta stojol te muc'ul-huctajibal, hich la yal: Hu'ix, xchi.

¹⁸ Xliplajan hahchel tsantsehwaletic, c'opetic, chahwuquetic soc tulan la snic sba te q'uinal, mayuc hich tulan nihquel te jayeb ora ayic ta bahlumilal te ants-winiquetique.

¹⁹ Oxeht' loc' a te muc'ul pueblo soc hemts'uj cohel te muc'ul pueblohetic yu'un te nacionetic. Dios la sna' te muc'ul Babilonia, la ya'be yuch' te vino yu'un yilimba te ay ta copahe.

²⁰ Ahn bahel spisil te q'uinal joytaybilic ta ha', soc ma chicanuc banti baht te witsetique.

²¹ Xtitet cohel tal ta ch'ulchan ta stojol ants-winiquetic niwac bat te jun talento yalal te jujune. Te ants-winiquetic la sbohlc'optayic Dios yu'un te wocol yu'un te bate, como c'ax tulan te wocole.