Apocalipsis 13 - Bible in Tzeltal Bachajón

Te cheb chambahlam te xiweltic sba

¹ La jtehc'an jba ta shi'al ti'mar, la jquil loc' tal ta mar jcoht chambahlam te xiweltic sba te ay huqueb sjol soc lajunch'ix xulub. Yahtalal scorona te jujuch'ix xulub, soc ta jujun sjol ay sbihil te ya xbohlc'optaywan.

² Te chambahlam te xiweltic sba la jquil sjel ta ti'awal c'an bo'olay choj, sjel ta yoc oso te yoc soc sjel ta ye choj te yehe. Te dragón la ya'be yich' yu'el, te smuc'ul-huctajib soc te tulan ya'tele.

³ Te jun sjol hich yilel te yich'oj ehchen scuenta lajel, pero c'ax te yehchene. Spisil mach'atic ayic ta bahlumilal xcham yo'tanic yu'un soc la st'unic te chambahlam te xiweltic sbahe.

⁴ La sch'uhuntayic te dragón te la ya'be yich' ya'tel te chambahlam te xiweltic sba, soc la sch'uhuntayic te chambahlam te xiweltic sba, hich la yalic: ¿Mach'a a te pajal soc te chambahlam te xiweltic sba, soc mach'a ya xhu' ya ya'be guerra? xchihic.

⁵ Te chambahlam te xiweltic sba a'bot ye yu'un ya yal toyba-c'op soc bohlc'op, soc a'bot yich' ya'tel cheb yoxwinic (42) u.

⁶ La sjam ye yu'un ya sbohlc'optay Dios, soc yu'un ya sbohlc'optaybe te sbihil, te banti nahinem soc te mach'atic nahinemic ta ch'ulchan.

⁷ A'bot permiso te ya ya'be guerra te mach'atic ch'uhltesbilic, soc te ya stsalticlan. Soc a'bot ya'tel ta stojol spisil ta chahp ts'umbaliletic, pueblohetic, c'opiletic soc nacionetic.

⁸ Spisil mach'atic nahinemic ta bahlumilal la sch'uhuntayic, spisil te mach'atic ma ba ts'ihbabil sbihilic te ma to ba pasbil a te bahlumilal ta libro scuenta cuxlejal yu'un te Jcolel Tuminchij te yich'oj milel.

⁹ Te mach'a ay schiquin, ac'a me ya'iy:

¹⁰ Te mach'a ya x'ic'awan bahel ta chuquel, ya me x'ic'ot bahel ta chuquel. Te mach'a ya yich' milel ta espada, ya me yich' milel ta espada. Ha ini ya sc'an te ay yip yo'tanic soc te ay sch'uhunel yo'tanic te mach'atic ch'ultesbilique.

¹¹ Patil la jquil yac ta loq'uel tal ta q'uinal yan chambahlam te xiweltic sbahe. Ay cha'ch'ix xulub hich te bin ut'il jcolel tuminchij, pero hich ya xc'opoj te bin ut'il dragón.

¹² Ta stojol te nahil chambahlam te xiweltic sba ya stuhun spisil te tulan ya'tel yich'oje. Spisil te mach'atic nahinemic ta bahlumilal ha ya ya'be sch'uhuntayic te shahchibal chambahlam te xiweltic sba te c'ax te yehchen scuenta lajel.

¹³ Soc ya spas muc'ul señahiletic, ya yac' cohuc tal c'ahc' ta ch'ulchan q'uelel sit ants-winiquetic a.

¹⁴ Ya slo'loylan mach'atic nahinemic ta bahlumilal ta scuenta te señahiletic ya x'a'bot spas ta stojol te chambahlam te xiweltic sba, ya spasticlan ta mandar te ya me spasbeyic sloc'ombahil te chambahlam te xiweltic sba te ehchentesot ta espada pero cuxaj.

¹⁵ A'bot te ya ya'be yich' ic' te sloc'ombahil te chambahlam te xiweltic sba, scuenta yu'un ya xhu' ya xc'opoj te loc'omba soc ya yac'ticlan ta milel spisil te mach'atic ma ba ya xch'uhuntayot yu'une.

¹⁶ Soc ya yac'ticlan ta a'beyel marca ta swa'el-c'abic o ta sti'bahic spisil ants-winiquetic, muc' biq'uit, jc'uhlejetic, pobrehetic, te ayic ta mosohil o te ayic ta libre,

¹⁷ scuenta yu'un mayuc mach'a ya xhu' ya ya'iy mambajel chombajel teme ma ba yich'oj te marca, ha te sbihil te chambahlam te xiweltic sba o te número yu'un te sbihile.

¹⁸ Ya sc'an p'ijil-o'tanil li'i. Te mach'a ya sna' q'uinal ac'a sna'be te snumerohil te chambahlam te xiweltic sba, como ha snumerohil winic. Hich ay te snumerohile: 666 (waqueb, waqueb, waqueb).