Amós 7 - Bible in Tzeltal Bachajón

Oxchahp nahalsitil yu'un jinel

¹ Hich la ya'bon quil te Jehová te Ajwalil: Ha la yac' ta pasel c'ulubetic ta yorahil yac ta puhl te aquiltic te patilix ya xcol, te lajix ta tsobel a te sit te ha yu'un te ajwalile.

² C'alal lajix swe'bel a te ya'malel q'uinal te c'ulubetic, hich la jcal: ¡Cajwal Jehová, pasa perdón! ¿Bin ut'il c'an cuhchuc yu'un te Jacob, te melel ha tut? xchihon yu'un.

³ Ha yu'un te Jehová la suht sc'op, hich la yal: Ma hichuc ya xc'oht ta pasel, xchi.

⁴ Te Jehová te Ajwalil hich la ya'bon quil: Te Jehová te Ajwalil yac yich'bel tal c'ahc' scuenta chahpanel; ha la slajin te muc'ul xahab soc jsehp te q'uinale.

⁵ Hich la jcal: ¡Coma aba, Cajwal Jehová! ¿Bin ut'il c'an cuhchuc yu'un te Jacob, te melel ha tut? la jcut.

⁶ Ha yu'un te Jehová la suht sc'op, hich la yal: Ha nix hich ma ba ya xc'oht ta pasel, xchi.

⁷ Soc la ya'bon quil ini: Te Cajwaltic teq'uel ta ba ts'ahc te toj pasbil ta plomo, soc ay plomo yu'un albañil ta sc'ab.

⁸ Hich la sjoc'obon te Jehová: ¿Bin yac awil, Amós? xchi. Jun plomo yu'un albañil, xchihon. Hich la yalbon: Ilawil, ya cac' te plomo yu'un albañil ta yohlil te pueblo Israel cu'un; ma ba ya jpasbeyiquix xan perdón.

⁹ Te toyol awilaletic yu'un Isaac ya me yich'ic jinel, te ch'ul awilaletic yu'un Israel ya me yich'ic jinel, soc ya jach espada ta scontrahinel te sna Jeroboam, xchi.

Amós soc Amasías

¹⁰ Te Amasías te sacerdote ta Bet-el la sticon ta halbeyel te Jeroboam ajwalil yu'un Israel, hich la yal: Te Amós hahch scontrahinat ta yohlil te Israel. Te q'uinal ma xcuhch yu'un spisil te sc'ope.

¹¹ Como hich yaloj te Amós: Te Jeroboam ya xlaj ta espada, soc ya x'ic'ot bahel ta chuquel te Israel, xchi.

¹² Te Amasías hich la yalbe te Amós: Ha'at j'il-q'uinalat, loc'an bahel, ahnan bahel ta sq'uinal Judá, we'an tey a te pan awu'une, hala sc'op-jalwanej tey a;

¹³ pero ma me xawalix sc'op-jalwanej ta Bet-el, como ha ch'ul awilal yu'un te ajwalil soc ha muc'ul templo yu'un te ban c'alal scuentahinej, xchi.

¹⁴ Ha yu'un te Amós hich la sjac'be te Amasías: Ma ba jalwanejon soc ma ba yal-snich'anon jalwanej, ho'on jcanan-tuminchijon soc ya jtsob sit ha'mal higuerahetic.

¹⁵ Pero te Jehová la yic'on loq'uel ta scanantayel te tuminchijetic, hich la yalbon: Bahan, halbeya sc'op-jalwanej te Israel te pueblo cu'une, xchi.

¹⁶ Ha yu'un, a'iybeya awa'iy te sc'op Jehová. Ha'at yac awal: Ma me xawal sc'op-jalwanej ta scontrahinel Israel, ma me xc'opojat ta scontrahinel te sna Isaac, xchihat.

¹⁷ Ha yu'un hich yaloj te Jehová: Te awihnam ha j'antsinel ants ya xc'oht ta yohlil te muc'ul pueblo, te ach'ix-queremetic awu'un ya me xlajic ta espada soc te aq'uinal ya me yich' puhquel ta scuenta spasel seña ta na'el; te ha'at ya me xchamat ta q'uinal te ma lecuc sc'oblal, soc te Israel chucul ya x'ic'otic bahel, namal ya xhil sq'uinalic, xchi.