Amós 4 - Bible in Tzeltal Bachajón

¹ A'iya awa'iyic te c'op ini, ha'ex wacaxetic yu'un Basán, te nahinemex ta wits yu'un Samaria, te yac awa'beyic swocol te pobrehetic soc yac awuts'inic te mach'atic mayuc bin ay yu'unique; te hich yac awalbeyic te amamalalic: Ich'ahic tal bin ya cuch'tic, te xchihexe.

² Te Jehová, te Ajwalil, hich la yal ta jamal ta scuenta te ha Ch'ul Dios: Ya xtal yorahil, antsetic, te ya yiq'uex bahel ta ganchohetic, soc te ats'umbalic ya x'ic'otic bahel ta slucojibal chay.

³ Acholoj abahic a ya xloq'uex bahel ta banti jamal te ts'ahc, yac awich'ic ch'ojel bahel ta wits Hermón, xchi te Jehová.

Israel ma xtojob yu'un te castigo yu'une

⁴ ¡Bahanic ta Bet-el, pasahic mulil tey a! ¡P'ohltesahic xan toybahil ta Gilgal! Ich'ahic tal ta sab te chic'bil mahtaniletic awu'unic, soc te jun ta slajunebal awu'unic ta oxoxeb c'ahc'al.

⁵ Ac'a pan te yich'oj levadura scuenta mahtanil ta yalel wocol, soc pucbeyahic ta bayuc sc'oblal te mahtaniletic te sc'anojel awo'tan yac awaq'uique, como hich yac ac'anic, snich'nabex Israel, xchi te Jehová, te Ajwalil.

⁶ Ho'on la jcac' taluc wi'nal ta stojol spisil te muc'ul pueblohetic awu'unic, soc te mayuc we'elil ta spisil te pueblohetic awu'unique, pero ma ba suhtex tal ta jtojol yu'un, xchi te Jehová.

⁷ Ha nix hich la jcom ha'al oxeb u te ma to sta yorahil a te ya xloc' sit te awal-ts'unubil; la jcac' tal ha'al ta jun pueblo, ma ba la jcac' ta yan pueblo; jsehp nax q'uinal banti la yac' ha'al, soc jsehp banti ma la ya yac', hich taquij.

⁸ Ha yu'un talic che'oxeb pueblohetic ta yan pueblo yu'un ya yuch'ic ha', pero ma ba ch'ay staquinti'il; pero ma ba suhtex tal ta jtojol yu'un, xchi te Jehová.

⁹ La jmajat ta c'ahc'al ic' soc ta yol, te c'ulub la slajimbat bayel bintic ts'umbil soc te ts'usubiletic awu'unic, te higuerahetic soc te olivohetic awu'unic, pero ma ba suhtex tal ta jtojol yu'un, xchi te Jehová.

¹⁰ La jticombeyex tal jmilawal-chamel hich te bin ut'il ta Egipto; la jmil ta espada te queremetic awu'unic, chucotic bahel te acawuhic, la jcac' mohuc ta ani'ic stuhil te campamento awu'unic, pero ma ba suhtex tal ta jtojol yu'un, xchi te Jehová.

¹¹ La jinex hich te bin ut'il la jin Sodoma soc Gomorra; hich hilat te bin ut'il xutunte' loq'uesbil tal ta c'ahc'; pero ma ba suhtex tal ta jtojol yu'un, xchi te Jehová.

¹² Ha yu'un, ha nix hich ya jpasbat, Israel; soc te bin ut'il hich ya jpasbat, ¡chahpan aba te yac ata aba soc te Dios awu'un, Israel!

¹³ Te mach'a ya spas te witsiltic soc te ic', te ya ya'be sna' te ants-winiquetic te bin snopoj ta yo'tan, te ya yac' te ha yihc'al q'uinal ya xc'oht te sacubel q'uinal, soc te ya xbehen ta stoyolil te q'uinale, ha Jehová, te Dios te scuentahinej spisil te sbihile.