2 Samuel 23 - Bible in Tzeltal Bachajón

Slajibal bin la yal David

¹ Hich ay te bin la yal ta slajibal te David: Hich la yal te David snich'an Isaí, te winic te tohytesbot sc'oblal, te mach'a tsahbil yu'un te Dios yu'un Jacob, te mach'a buen t'ujbil ya xc'ayojin ta Israel:

² Te espíritu yu'un Jehová c'opoj ta jcuenta, ay ta que te sc'ope.

³ Te Dios yu'un Israel c'opojix; hich la yalbon te Muc'ul Ton yu'un Israel: Te mach'a stojil ya scuentahin te ants-winiquetic, te ya xcuentahinwan ta scuenta xi'el te Diose,

⁴ hich ay te bin ut'il sacal q'uinal ta sab, hich te bin ut'il ya xloc' tal c'ahc'al ta sab c'alal mayuc tocal, hich te bin ut'il ya xcol te ha'mal ta lum c'alal ya xc'ax te ha'ale, xchi.

⁵ Ha scuentahil te yich'oj yip ta stojol Dios te jna; Dios schapoj sc'op ta jtojol scuenta sbahtel q'uinal; chapal ta lec soc canantaybil, aunque ma to la yac' nichinuc spisil te jcolel soc te bin ya sc'an co'tan.

⁶ Yan te mach'atic chopolic hich ayic te bin ut'il ch'ix te ya yich'ic bulel, te mayuc mach'a ya stsac ta sc'ab.

⁷ Teme ay mach'a ya sc'an ya stsac, ha to teme ya stsac a'tejibal-taq'uin soc ste'el lanza, soc tey nix ya yich'ic chiq'uel ta c'ahc', xchi.

Te winiquetic yu'un David te ma xiwic

⁸ Hich ay sbihilic te winiquetic yu'un David te ma xiwic: Joseb-basebet te tacmon-winic, ha príncipal yu'un te oxtuhlic; ha la smil ta lanza cha'bahc' (800) winiquetic ta junax buelta.

⁹ Ha schebal te Eleazar snich'an Dodo te ahohíta-winic, te jtuhl ta yoxebal te ma xiwic te sjoquinejic te David te c'alal la shachbeyic yo'tanic te filisteohetic te stsoboj sbahic yu'un guerra, te c'alal suht ta spatic te winiquetic yu'un Israel.

¹⁰ Te Eleazar hahch yehchentes te filisteohetic ha to c'alal luhb sc'ab soc snop'oj hilel ta sc'ab te espadahe. Ta hich ora te Jehová la yac' muc'ul tsalaw, soc te winiquetic suhtic tal ta st'unel te Eleazar yu'un ya stsobic te bintic pojbile.

¹¹ Te yoxebal ha te Sama snich'an Age, te ararat-winique. Te filisteohetic stsoboj sbahic ta Lehi te banti ay ts'umbil lenteja, te pueblo ahnic loq'uel ta stojolic.

¹² Pero te Sama la stehc'an sba ta yohlil te q'uinal, la scoltay te pueblo, la smilticlan te filisteohetic. Te Jehová la yac' ta muc'ul tsalaw.

¹³ Ay jun buelta ta yorahil stsobel sit awal-ts'unubil a, ay oxtuhl te loq'uem tal ta yohlil te lajuneb scha'winic (30) ta tuhl te hu'em yu'unic tsalaw, bahtic ta banti ay te David ta nahilch'en ta Adulam, te c'alal ayic ta spamlej yu'un Refaim a te scampamentohetic yu'un te filisteohetique.

¹⁴ Te David ay ta ahnibal ch'en, ha yorahil a te ay jchahp soldado yu'un te filisteohetic ta Belén.

¹⁵ Te David ay bin la sc'an yo'tan, hich la yal: Te ayuc mach'a ya ya'bon cuch' te ya'lel pozo ay ta yochibal Belén, xchi.

¹⁶ Ha yu'un te oxtuhl winiquetic te ma xiwic hu' yu'unic yochintayel te campamento yu'un te filisteohetic, la sloq'uesic ha' ta pozo te ay ta yochibal te Belén, la yich'beyic tal te David. Pero ma ba la sc'an la yuch'; la smal ta stojol Jehová,

¹⁷ yu'un hich la yal: Ma ba ya jpas ini, Jehová. ¿Ya bal cuch'be sch'ich'elic te winiquetic te la sloq'ues sba ta yo'tanic te scuxlejalic? xchi. Hich ma ba la sc'an la yuch'. Hich la spasic te oxtuhl winiquetic te ma xiwic.

¹⁸ Te Abisai yihts'in Joab, te yal Sarvia, ha jtsobaw yu'un te lajuneb scha'winic (30) ta tuhl mach'atic ma xiwic. Ay la smil ta lanza ho'lajunwinic (300) winiquetic. Hich pajal sc'oblal c'oht soc te oxtuhlique.

¹⁹ Ha toyol xan sc'oblal c'oht yu'un te lajuneb scha'winic (30) ta tuhl, ha jtsobaw c'oht yu'unic; pero ma ba la spaj te oxtuhlique.

²⁰ Benaía snich'an Joiada te talem ta Cabseel, ma xiw, bayel bintic muc' spasoj. Ha la smil cha'tuhl snich'nab Ariel ta Moab. Soc ha nix yorahil a te yac ta yahlel me'sic, co bahel ta ch'en, la smil jcoht choj tey a.

²¹ Soc la smil jtuhl nahtil egipcio-winic. Yich'oj lanza ta sc'ab te egipcio-winic, pero te Benaía baht scontrahin soc te'. La sloq'uesbe ta sc'ab te slanza te egipcio-winic, ha nix la smil a.

²² Hich la spas te Benaía snich'an Joiada, pajal sc'oblal c'oht soc te oxtuhlic.

²³ C'ax hich tohy sc'oblal a te bin ut'il te yantic lajuneb scha'winic (30), pero ma ba la spaj te oxtuhlique. Te David la yotses ta jtsobaw yu'un te soldadohetic te ya xcanantayot yu'une.

²⁴ Ha nix ahtaybilic soc te lajuneb scha'winic (30) ta tuhl te Asael yihts'in Joab; te Elhanán snich'an Dodo te talem ta Belén;

²⁵ Sama te talem ta Harod; Elica te talem ta Harod;

²⁶ Heles te paltita-winic; Ira snich'an Iques, te talem ta Tecoa;

²⁷ Abiezer te talem ta Anatot; Mebunai te talem ta Husah;

²⁸ Salmón te ahohíta-winic; Maharai te talem ta Netofa;

²⁹ Heleb snich'an Baana, te talem ta Netofa; Itai, snich'an Ribai, te talem ta Gabaa, sts'umbal Benjamín;

³⁰ Benaía te talem ta Piratón; Hidai, talem ta uc'um yu'un Gaas;

³¹ Abi-albón te talem ta Arba; Azmavet te talem ta Bahurim;

³² Eliaba te talem ta Saalabín; Jonatán, jtuhl te snich'nab Jasén;

³³ Sama te ararat-winic; Ahíam snich'an Sarar te ararat-winic;

³⁴ Elifelet snich'an Ahasbai, snich'an Maaca; Eliam snich'an Ahitofel, te talem ta Gilo;

³⁵ Hezrai te talem ta Carmel; Paarai te arbita-winic;

³⁶ Igal snich'an Natán, te talem ta Soba; Bani te talem ta Gad;

³⁷ Selec te talem ta Amón; Naharai te talem ta Beerot, jcuch-mahquil yu'un Joab, yal Sarvia;

³⁸ Ira te itra-winic; Gareb te itra-winic;

³⁹ soc Urías te hitita-winic. Ta spisil huclajuneb scha'winic (37) ta tuhl.