2 Samuel 1 - Bible in Tzeltal Bachajón

David la ya'iy lajix Saúl

¹ Te c'alal lajix a te Saúl, te c'alal suhtemix tal a te David ta Siclag ta stsalel te amalequetic, tey ay cheb c'ahc'al a;

² ta yoxebal c'ahc'al c'oht jtuhl winic te hahch tal ta campamento yu'un Saúl, ch'i'emtic sc'u' spac' soc ya'tinej ts'u'lum sjol a. C'alal c'oht ta stojol David, la spahcan sba ta lum scuenta yich'el ta muc' te David.

³ Hich joc'obot yu'un te David: ¿Banti talemat? xchi. Loc'on tal ta ahnel ta campamento yu'un Israel, xchi.

⁴ ¿Bin c'ohem ta pasel hiche? Awocoluc, halbon ca'iy, xchi te David. Loq'uic ta ahnel ta guerra te winiquetic; bayel lajic. Soc lajic te Saúl soc te Jonatán te snich'ane, xchi te winique.

⁵ Te David hich la yalbe te jcolel winic te la yalbe ya'iy te bin c'oht ta pasel: ¿Bin ut'il yac ana' teme lajic te Saúl soc Jonatán te snich'ane? xchi.

⁶ Hich la yal te winic: C'alal tey ayon ta wits Gilboa a, la jquil te yich'oj yip ta slanza te Saúl, soc yacalic ta talel ta spat te carretahetic yu'un guerra soc te winiquetic cajajtic ta cawu.

⁷ La sut sit ta spat, la yilon soc la yic'on; hich la jac'be: Li' ayoni, xchihon.

⁸ ¿Mach'ayat a? xchi. La jcalbe: Ho'on amalec-winicon, xchihon.

⁹ La yalbon: Awocoluc, la', milawon, como bayel jwocol, pero cuxulon to, xchi.

¹⁰ Ha yu'un nohpojon bahel soc la jmil, como la jna' te ma ba ya xcuxajix teme yahl bahele. La jloq'uesbe te corona ay ta sjol soc te xotxot-taq'uin ay ta sc'ab, la jquich'bat tal ta atojol, cajwal, xchi.

¹¹ Ha yu'un te David la stsac sc'u', la sch'i'; hich nix la spasic te winiquetic sjoquinejic.

¹² La smel yo'tanic, oq'uic soc la scom swe'elic yalel yihc'ubel q'uinal yu'un te Saúl soc te Jonatán te snich'an, soc yu'un te soldadohetic yu'un Jehová soc te pueblo yu'un Israel, te bin ut'il lajic ta milel ta espada.

¹³ Te David hich la sjoc'obe te jcolel winic te tal ta halbeyel ya'iy yu'un te c'ope: ¿Ban talemat? xchi. Ho'on snich'anon jyanlum, amalec-winicon, xchi.

¹⁴ ¿Bin ut'il ay a te ma ba la axi' te la ahach ac'ab ta smilel te mach'a tsahbil yu'un te Jehová? xchi te David.

¹⁵ Ha yu'un te David la yic' tal jtuhl swinic, la yalbe: Bahan, mila, la yut. Hich la smil te winique.

¹⁶ Hich halbot yu'un David: Ay ta acuenta te ach'ich'ele, como ha'at nix la awal ta testigo ta acontra te c'alal hich la awal: La jmil te mach'a tsahbil yu'un Jehová, te xchihate, xchi.

C'ayoj scuenta mel-o'tan yu'un Saúl soc Jonatán

¹⁷ Te David la spas c'ayoj scuenta mel-o'tan yu'un te Saúl soc Jonatán te snich'ane.

¹⁸ La yal te ya me yich' a'beyel snopic te snich'nab Judá. Hich ts'ihbabil ta libro yu'un Jaser:

¹⁹ ¡Lajemix te yutsilal Israel ta stoyolil q'uinal! ¡Yahlic te mach'atic ay yipic te ma xiwic!

²⁰ Ma me xawalic ta Gat, soc ma me xawalic ta callehetic ta Ascalón, scuenta yu'un ma me tse'eluc yo'tanic a te yantsil-nich'nab te filisteohetic, scuenta yu'un ma ba ya xwihlic yu'un yutsil yo'tanic te yantsil-nich'nab te mach'atic ma ba yich'ojic circuncisión.

²¹ Ha'ex witsetic yu'un Gilboa, ma me xyahlix ts'ujul o ha'al ta abahic, soc ma ha'uquex q'uinal te ya yac' mahtaniletic; como tey ch'aybil c'oht a te smahquil te mach'atic ay yipic te ma xiwic, te smahquil Saúl te ma ba ya yich'ix jaxel ta aceite.

²² Te st'ihmalte' Jonatán mayuc bin ora suht ta spat, te espada yu'un Saúl ma ba jochol suht tal, te ma ba yich'beyej sch'ich'el te mach'atic lajic, te ma ba yich'beyej sjuhp'el mach'atic ma xiwic.

²³ Saúl soc Jonatán, c'uxic ta o'tanil soc mulambil, ma ba la spit sbahic c'alal cuxulic, soc ma ba la spit sbahic te c'alal lajic. C'ax hich ahnimajic a te bin ut'il ya xwihl jxiquetic, c'ax hich yipic a te bin ut'il chojetic.

²⁴ Yantsil-nich'nab Israel, oq'uetayahic te Saúl, te mach'a la ya'beyex ac'u'inic lequil tsajal pac', te mach'a la sch'albeyex ac'u'ic ta ch'albil oro.

²⁵ ¡Ilawil bin ut'il yahlic ta guerra te mach'atic ma xiwic! Te Jonatán lajemix ta stoyolil q'uinal.

²⁶ Ay jwocol ta mel-o'tan awu'un, Jonatán, quermanohat, c'ax ay yutsil ac'oblal la jca'iy. C'ax hich la jca'iy a te sc'uxul awo'tan te bin ut'il sc'uxul yo'tan te antsetique.

²⁷ ¡Ilawil bin ut'il yahlic te mach'atic ma xiwic, bin ut'il jihnemix te a'tejibaletic yu'un guerra!