2 Reyes 5 - Bible in Tzeltal Bachajón

Eliseo soc Namaan

¹ Te Naamán te jtsobaw yu'un soldadohetic yu'un te ajwalil ta Siria muc' sc'oblal ta stojol te yajwal, como ha ta scuenta te a'bot ya'iyic tsalaw yu'un Jehová te siriahetique. C'ax bayel yip yo'tan ta winiquil, pero ay sc'a'el-chamel.

² Ta Siria ay loq'uic bahel jpoj-biluquetic te yic'ojic tal ta chuquel jtuhl ach'ix ta sq'uinal Israel te och ta scriada te yihnam Naamán.

³ Te ach'ix hich la yalbe te yajwal: Te yacuc xbaht ta stojol te jalwanej te ay ta Samaria te cajwal, ya xch'aybot te sc'a'el-chamel yu'un te hichuque, xchi.

⁴ Te Naamán och bahel ta ban ay te ajwalil yu'un, hich la yalbe: Hich ay soc hich la yal te ach'ix talem ta sq'uinal Israel, xchi.

⁵ La sjac' te ajwalil yu'un Siria: Bahan, soc ya jticombe carta te ajwalil yu'un Israel, xchi sc'oblal. Hich baht te Naamán, yich'oj bahel lajuneb (10) talento plata, ho'lajunbahc' (6,000) ta sehp oro, soc lajunlihc c'u'uletic.

⁶ Soc la yich' bahel carta ta stojol te ajwalil yu'un Israel te hich la yal: Te c'alal ya xc'oht ta acuenta te carta ini, ya me ana' te ya jticombat ta atojol te ca'bat Naamán scuenta yu'un yac alecubtes ta c'a'el-chamel, xchi te carta.

⁷ Te c'alal la yil te carta te ajwalil yu'un Israel, la sch'i' sc'u' yu'un soc hich la yal: ¿Yu'un bal Dioson te ya cac' cuxajuc soc te ya cac' te ya xlaj, te bin ut'il la sticombon tal te jtuhl winic ini yu'un ya jch'aybe sc'a'el-chamel? Tsahtaya awa'iyic ta lec, ilawilic bin ut'il ya sle bin ya yut ya scontrahinon, xchi.

⁸ C'alal la ya'iy te Eliseo te winic yu'un Dios te la sch'i' sc'u' te ajwalil yu'un Israel, hich la sticon ta halbeyel: ¿Bin yu'un te la ach'i' ac'u'? Ac'a taluc ta jtojol, hich me ya sna' te ay jalwanej ta Israel, xchi.

⁹ Te Naamán baht soc scarreta soc cawuhetic yu'un, c'oht scom sba ta sti'il sna Eliseo.

¹⁰ Te Eliseo la sticon ta halbeyel: Bahan, poca aba huqueb buelta ta muc'ul-ha' Jordán, ya me xlecub abaq'uetal yu'un soc hich lec ya xhilat, xchi.

¹¹ Te Naamán ilin bahel, hich la yal: La jcal te yacuc xloc' tal stahon, ya stehc'an sba, ya sc'opon ta scuenta sbihil te Jehová te Dios yu'un, soc ya shach sc'ab, ya sc'ases ta banti ay te chamel, hich ya xlecubon ta c'a'el-chamel.

¹² Te Abana soc Farfar, te muc'ul-ha'etic yu'un Damasco, ¿ma bal ha'uc c'ax hich lequic xan a te bin ut'il spisil te muc'ul-ha'etic yu'un Israel? Teme tey ya jpoc jba a ¿ma bal yacuc xlecubon yu'un? xchi. Ilinem a suht bahel.

¹³ Pero te a'batetic yu'un nohpojic talel, hich la yalbeyic: Jtatic, te ayuc bin mero tulan ta pasel la ya'bat apas te jalwanej, ¿ma bal lajuc apas te hichuque? ¿Ha'uc to balix a te hich la yalbat: Poca aba, hich ya xlecubat? xchihic.

¹⁴ Ha yu'un co bahel te Naamán, la smul sba huqueb buelta ta muc'ul-ha' Jordán, hich te bin ut'il yaloj te winic yu'un Dios. Lecub te sbaq'uetal, hich c'oht te bin ut'il sbaq'uetal alal, mero lec hilel.

¹⁵ Patil te Naamán soc spisil mach'atic sjoquinejic suhtic tal ta banti ay te winic yu'un Dios, la stehc'an sba ta stojol, hich la yal: Yo'tic la jna'ix te mayuc yan Dios ta spisil te q'uinal, ha nax stuquel ta Israel. Awocoluc, ich'a amahtan te ya ya'bat te a'bat awu'une, xchi.

¹⁶ Pero la yal te Eliseo: ¡Yiloj Jehová te ayon ta stojol! ma ba ya jtsac, xchi. Aunque la suj te ayuc bin ya yich', ma ba la sc'an.

¹⁷ Ha yu'un la yal te Naamán: Teme ma'uque, awocoluc, a'beya te a'bat awu'un te slumil te q'uinal ini te ya yich' bahel cha'coht ta mulahil, como ta ora ini te a'bat awu'un ma ba ya yaq'uix scohtol chic'bil mahtanil soc milbil mahtanil ta stojol yantic diosetic, ha nax ta stojol Jehová.

¹⁸ Pero te Jehová ac'a spasbe perdón te a'bat awu'un ta scuenta ini: ha te c'alal ya x'och bahel ta templo yu'un Rimón te ajwalil cu'un ta sch'uhuntayel soc ya yich' yip ta jc'ab, teme ha nix hichon ya jquejan jba ta templo yu'un Rimón, ac'a spasbe perdón te a'bat awu'un te Jehová, xchi.

¹⁹ Lamaluc me q'uinal ya xbahat, xchi te Eliseo. C'alal behen bahel j'ohlil lewa te Namaan,

²⁰ te Giezi te ya'bat Eliseo te winic yu'un Dios la yal ta yo'tan: Te cajwal la yaq'uix bahel te Naamán te siria-winic; ma ba la yich'be te bintic yich'oj talel. ¡Yiloj Jehová! ya xbaht jnuts ta ora, ay bin ya quich'be tal, xchi.

²¹ Hich baht te Giezi ta spat te Naamán. C'alal la yil te Naamán te yac ta talel ta spat, co ta scarreta ta stahel, hich la sjoc'obe: ¿Lec bal ay ta spisil? xchi.

²² Lec ay. Te cajwal la sticonon talel yu'un ya calbat: Hulel to cheb queremetic yu'un te jtsohb jalwanejetic te talemic ta witsiltic yu'un Efraín. Awocoluc, a'beya jun talento plata soc cha'lihc c'u'uletic, xchi te Giezi.

²³ La yal te Naamán: Awocoluc, ich'a bahel cheb talento plata, xchi. La suj te Giezi, hich la schuc cheb talento plata ta cheb bolsa, soc cha'lihc yach'il c'u'ul. La ya'be scuch cha'tuhl a'batetic yu'un te ya yich'beyic bahel yu'un te Giezi.

²⁴ C'alal c'ohtic ta wits, te Giezi la stsacbe ta sc'ab, la sq'uej ta sna, soc la sticonlan suhtel te winiquetique.

²⁵ Patil och bahel ta stojol te yajwal. Te Eliseo la sjoc'obe: Giezi, ¿banti c'ohat tal? xchi. Mayuc banti c'oht tal te a'bat awu'un, xchi te Giezi.

²⁶ Pero hich la yal te Eliseo: ¿Ma bal teyuc ay co'tan a te c'alal co ta scarreta te winic yu'un tal stahat? ¿Yorahil bal ta ich'el plata soc c'u'uletic, olivohetic, ts'usubiletic, tuminchijetic, wacaxetic soc a'bat ants-winiquetic?

²⁷ Ha yu'un te sc'a'el-chamel te Naamán ya me xc'oht ta atojol soc ta stojol ats'umbal ta spisil ora, xchi sc'oblal. Ayix sc'a'el-chamel a te loc' ta stojol, mero sac hich te bin ut'il me'-sic.