2 Reyes 14 - Bible in Tzeltal Bachajón

Ya'tel Amasías ta ajwalil yu'un Judá

¹ Ta schebal ha'bil yochel ta ajwalil yu'un Israel a te Joás snich'an Joacaz ajwalil yu'un Israel, och ta ajwalil ta Judá te Amasías snich'an Joás ajwalil yu'un Judá.

² Ay ho'eb scha'winic (25) ya'bilal a te och ta ajwalil; ay ta ajwalil ta Jerusalén baluneb scha'winic (29) ha'bil. Joadán sbihil te snane, talem ta Jerusalén.

³ Toj bin la spas ta stojol Jehová, aunque ma hichuc te bin ut'il te David te antiguo tatil yu'une. Hich nix la spas spisil te bintic la spas te Joás te state.

⁴ Ma ba la yich' loq'uesel te toyol awilaletic, como te ants-winiquetic la to yaq'uic milbil mahtaniletic soc la to schiq'uic pom tey ta toyol awilaletic.

⁵ C'alal la yich' yip ta ajwalil a, la smilticlan te a'batetic te la smilic te state.

⁶ Pero ma ba la smilticlambe stuquel te snich'nab te jmilawetic, hich te bin ut'il ts'ihbabil ta libro yu'un te mandariletic yu'un Moisés, te banti hich la yal ta mandar te Jehová: Ma me xamilic te tatiletic yu'un smul snich'nab, soc ma me xamilic te al-nich'aniletic yu'un smul te tatiletic, como ta jujutuhl ya xlaj yu'un te smulic, te xchihe.

⁷ Te Amasías ha nix hich la smil jpic soc ho'bahc' (10,000) edometic ta Spamlej yu'un Ats'am, soc la stsal ta guerra te Sela, la ya'be sbihilin Jocteel, hich ay sbihil c'alal ora.

⁸ Patil te Amasías la sticon ta halbeyel te Joás snich'an Joacaz, snich'an Jehú, ajwalil yu'un Israel, hich la yalbe: La', yu'un ya quilbe jba jsitic, xchi.

⁹ Pero te Joás hich la sticombe suhtib sc'op te Amasías ajwalil yu'un Judá: Te ch'ix te ay ta Líbano la sticon ta halbeyel te cedro te ay ta Líbano: A'beya yic' awantsil-nich'an te jquereme, xchi. Pero te ha'mal chambahlametic ta Líbano tal sts'o'ticlanic hilel ta teq'uel te ch'ixe.

¹⁰ Melel la atsalix te Edom soc la atoyix aba yu'un. Toya aba yu'un hiche, pero hilan ta ana. ¿Bin yu'un yac ale te bin ma lecuc te ya yac' te pajal ya xlajat soc te Judá? xchi sc'oblal.

¹¹ Pero te Amasías ma ba la yich' ta cuenta. Ha yu'un te Joás ajwalil yu'un Israel hahch ta behel, la sta sba soc te Amasías ajwalil yu'un Judá ta Bet-semes ta Judá.

¹² Te Judá tsalot yu'un Israel, tuhlultuhl bahtic ta ahnel ta snahic.

¹³ Te Joás ajwalil yu'un Israel la schuc ta Bet-semes te Amasías ajwalil yu'un Judá, snich'an Joás, snich'an Ocozías. Patil baht ta Jerusalén, c'oht swuybe sts'ahcul c'alal ta ochibal yu'un Efraín ha to ta ochibal ta xuhc, ha jbahc' (400) xuhc'ubil snahtil.

¹⁴ La yich' spisil te oro soc plata, spisil te bintic ya xtuhun ta sna Jehová soc te c'ulejalil ta sna te ajwalil. Soc la stsac bahel winiquetic yu'un prenda, suht bahel ta Samaria.

¹⁵ Te bintic xan ya'tel Joás, te bintic bayel sc'oblal la spasticlan soc te bin ut'il la ya'be guerra te Amasías ajwalil ta Judá, ts'ihbabil ta librohetic yu'un te ya'tel ajwaliletic yu'un Israel.

¹⁶ Cham te Joás, baht sjoquin ta muquenal te chawinic sme'stat, la yich' muquel ta Samaria ta smuquenal te yantic ajwaliletic yu'un Israel. Ha och ta sjelol ta ajwalil te Jeroboam te snich'ane.

¹⁷ Te Amasías snich'an Joás, ajwalil yu'un Judá, cuxaj xan ho'lajuneb (15) ha'bil ta patil te cham te Joás snich'an Joacaz, ajwalil yu'un Israel.

¹⁸ Te bintic xan sc'oblal te ya'tel te Amasías, ts'ihbabil ta libro yu'un te ya'tel ajwaliletic yu'un Judá.

¹⁹ La schapbeyic sc'oblal ta milel ta Jerusalén te Amasías, hich loc' ta ahnel, baht ta Laquis. Pero la snutsic bahel c'alal ta Laquis, tey c'oht smilic a.

²⁰ Patil la yiq'uic suhtel ta cawu, la smuquic ta Jerusalén soc te chawinic sme'stat ta Pueblo yu'un David.

²¹ Ha yu'un te pueblo yu'un Judá la yiq'uic te Azarías, te ay waclajuneb (16) ya'bilal a, la yotsesic ta ajwalil scuenta sjelol Amasías te state.

²² Te c'alal chamenix a te Amasías, la scha'pas xan te Elat soc la yac' suhtuc tal xan ta stojol Judá.

Ya'tel Jeroboam II ta ajwalil yu'un Israel

²³ Ta yo'lajunebal (15) ha'bil yochel ta ajwalil yu'un Judá a te Amasías snich'an Joás, ajwalil yu'un Judá, och ta ajwalil yu'un Israel ta Samaria te Jeroboam snich'an Joás; ay ta ajwalil jun yoxwinic (41) ha'bil.

²⁴ Chopol bin la spas ta stojol Jehová, ma ba la yihquitay te muliletic yu'un Jeroboam snich'an Nabat, te la ya'be sta smul a te Israel.

²⁵ La ya'be xan sta te sti'il sq'uinal Israel hich te bin ut'il ay ta nahil to, c'alal ta yochibal Hamat c'alal ta mar yu'un Arabá, hich te bin ut'il yaloj Jehová te Dios yu'un Israel ta scuenta te ya'bat, ha te Jonás snich'an Amitai, te jalwanej te talem ta Gat-hefer.

²⁶ Como te Jehová la yil te bayel swocol te Israel; mayuc moso o mach'a ay ta libre, mayuc mach'a ya scoltay te Israel.

²⁷ Ma ba snopoj te Jehová te ya slajimbe sbihil Israel ta ye'tal ch'ulchan, ha scuentahil te la scoltay ta scuenta Jeroboam snich'an Joás.

²⁸ Te bintic xan ya'tel Jeroboam soc spisil te bintic la spas, te bintic hu' yu'un spasel, spisil te guerrahetic la spas soc te bin ut'il la suhtesbe ta stojol Israel te Damasco soc te Hamat, te ha yu'un Judá, ts'ihbabil ta libro yu'un te ya'tel ajwaliletic yu'un Israel.

²⁹ Cham te Jeroboam, baht sjoquin ta muquenal te chawinic sme'stat, ha te ajwaliletic yu'un Israel. Ha och ta sjelol ta ajwalil te Zacarías te snich'ane.