2 Pedro 1 - Bible in Tzeltal Bachajón

Spatil-o'tanil

¹ Simón Pedro, a'bat soc jpuc-c'op yu'un te Jesucristo, ta stojol te mach'atic ta scuenta stojil yo'tan te Jesucristo te Dios soc Jcoltaywanej cu'untic, stahojic sch'uhunel yo'tanic te pajal st'ujbilal soc te cu'uncotique:

² Ayuc bayel yutsil-o'tanil soc lamal q'uinal awu'unic ta scuenta bin ut'il yac ana'beyic sba te Dios soc te Cajwaltic Jesús.

Pajal quich'beyejtic te stalel Dios

³ Ta scuenta yu'el te Dios la ya'botic spisil te bintic ya xtuhun cu'untic ta jcuxlejaltic soc ta sch'uhunel Dios, ta scuenta te ya jna'betic sba te Mach'a la yic'otic ta scuenta te yutsilal soc t'ujbil ya'tel.

⁴ Ha nix ta scuentahic ini te ay bintic yalbeyejotic te Dios te c'ax t'ujbil soc te muc' sc'oblal, scuenta yu'un ta scuenta bintic yaloj, yac awich'beyic stalel te Dios soc ya x'ahnex loq'uel ta stojol te bin ya xjinawan te ay ta bahlumilal ta scaj chijil-o'tanil.

⁵ Ha yu'un ac'ahic fuersa te ya snuhp'in sba soc te sch'uhunel awo'tanic soc te lec atalelic; teme lequix te atalelic, ya sc'an te ay bintic yac ana'ic;

⁶ teme ay bintic ana'ojic, ya sc'an te yac ana' scomel abahic; teme la ana' scomel abahic, ya sc'an te ya xcuhch awu'unic; teme ya xcuhchix awu'unic, ya sc'an te lec yac ach'uhunic Dios;

⁷ teme la ach'uhunic ta lec, ya sc'an te jun awo'tanic soc awermanotac; teme jun awo'tanic soc awermanotac, ya sc'an te ay sc'uxul awo'tanic.

⁸ Teme awich'ojic ini soc teme yaquic ta p'ohlel ta awo'tanic, ya yaq'uic te ay bintic ya xhu' awu'unic spasel soc te ya sitinex, te bin ut'il yac ana'beyic sba te Cajwaltic Jesucristo.

⁹ Yan te mach'a mayuc yu'un ini, ma ba lec te site, ma xyil q'uinal, ch'ayem ta yo'tan te pocbotix loq'uel te smul la sta ta nahil to.

¹⁰ Ha yu'un, quermanotac, ac'ahic xan fuersa te smelelil ya xc'oht te iq'uel soc te tsahel awu'unic, como teme hich yac apasic, ma jaymehl ya xyahlex.

¹¹ Hich me muc' ya xjambotex ochel sbehlal ta banti ay te cuentahinel sbahtel q'uinal yu'un te Cajwaltic Jesucristo, te Jcoltaywanej cu'untique.

¹² Ha yu'un ma ba ya xlaj co'tan te ya calbeyex ini, aunque ana'ojiquix soc junix awo'tanic ta stojol te smelelil c'op awich'ojiquix.

¹³ Stojil ya ca'iy te ya hultesbeyex awo'tanic te jayeb xan c'ahc'al cuxulon soc jbaq'uetal,

¹⁴ yu'un jna'oj te ma ba halix c'ahc'al ya quihquitay hilel te jbaq'uetal, hich te bin ut'il la ya'bon jna' te Cajwaltic Jesucristo.

¹⁵ Soc ya cac' fuersa te ayuc bin ut'il ya xhu' yac ana'ulanic spisil ora ha'i c'op ini te c'alal wayemix jbaq'uetal a.

Ay testigohetic te yilbeyejic yutsilal Cristo

¹⁶ Te c'alal la jca'beyexcotic ana'ic bin ut'il ay sc'oblal te ya xtal te Cajwaltic Jesucristo soc bin ut'il ay sc'oblal te yu'el, ma ba jt'umbeyejcotic nopbil cuentohetic, ho'otcotic nix la jquilcotic ta jsitcotic te smuc'ul yutsilale.

¹⁷ Ha ac'ot ta ich'el ta muc' soc a'bot yutsilal yu'un te Dios Tatil te c'alal chicnaj tal c'op ta stojol te Muc'ul Utsilal te hich la yal: Ha Jnich'an ini te c'ux ta co'tan, te bayel yutsil co'tan yu'un, xchi sc'oblal.

¹⁸ Ho'otcotic la jca'iycotic te c'op te tal ta ch'ulchan te c'alal joquinejcotic ta ch'ul wits.

¹⁹ Ha yu'un chican xan ta lec te ha smelelil te sc'op te jalwanejetique. Lec te yac awich'ic ta cuenta, hich te bin ut'il c'ahc' te yac ta tihlel ta yihc'al q'uinal, ha to c'alal ya sacub q'uinal soc te ya yac' sts'anabul ta awo'tanic te jsacubel ec'.

²⁰ Ha bayel sc'oblal te yac ana'ic te mayuc sc'op-jalwanejetic ta Shun Dios te ay mach'a te stuquel nax ya xhu' ya sna'be scuentahil;

²¹ como te sc'op-jalwanejetic ma ba talem ta scuenta sc'anojel yo'tan ants-winic, ha cuentahinotic yu'un te Ch'ul Espíritu te winiquetic te hich c'opojic ta scuenta Dios.