2 Corintios 4 - Bible in Tzeltal Bachajón

¹ Ha yu'un te bin ut'il quich'ojcotic te a'tel ini ta scuenta te sc'uxul yo'tan Dios, ma xpehc'aj co'tancotic.

² Ha hilix cu'uncotic te bin muquen ay ta pasel soc te bintic q'uexlaltic sba, ma ba ya ca'iycotic lo'loywanej soc ma ba ya jyanijtesbecotic sc'oblal te sc'op Dios. Yan bin ya jpascotic, te bin ut'il jamal ya cac'cotic ta ilel te bin smelelil, ta stojol Dios ya cac' jbahcotic ta na'el ta yo'tanic spisil ants-winiquetic.

³ Pero teme macal to te lec yach'il c'op cu'uncotic, ha macal to ta stojol te mach'atic ch'ayel ya xbahtic;

⁴ ha te mach'atic ma xch'uhunic, te macbibil spensaric yu'un te dios yu'un te bahlumilal ini, scuenta yu'un ma ba ya yilic te sacal q'uinal yu'un te lec yach'il c'op yu'un te yutsilal te Cristo, te ha slop'tayej sba a te Diose.

⁵ Como ma ba ya jpucbe jc'oblalcotic, ha ya jpucbecotic sc'oblal te ha Ajwalil te Jesucristo, soc te ho'otcotic a'batotcotic awu'unic ta scuenta sc'uxul yo'tan Jesús.

⁶ Como te Dios te la yal mandar te ac'a sacubuc q'uinal ta banti ay yihc'al q'uinal, ha nix la yac' tal sts'anabul ta co'tantic scuenta yu'un hich ya jna'tic a te yutsilal Dios ta sit yelaw te Jesucristo.

Te cuxajel ta scuenta sch'uhunel-o'tanil

⁷ Pero quich'ojcotic te c'uhlejalil ini ta vaso pasbil ta ahch'al, scuenta yu'un ya xchicnaj te ha nix yu'un Dios te yutsil yu'el, te ma cu'uncoticuc.

⁸ Bayel bin ay jwocolcotic yu'un, pero ma ba ya slajimbotcotic quipcotic; ma xna'baj bin ya jpascotic, pero ma ba ya xlaj yutsil co'tancotic yu'un;

⁹ ayotcotic ta uts'inel, pero ma ba pihtesbilotcotic; lajelotcotic, pero ma ba jc'axel ya xlajotcotic.

¹⁰ Spisil ora quich'ojcotic ta jbaq'uetalcotic te lajel yu'un te Jesús, scuenta yu'un ha nix hich ya xchicnaj ta jbaq'uetalcotic te scuxlejal te Jesús.

¹¹ Como ho'otcotic te cuxulotcotic, spisil ora ac'bilotcotic ta lajel ta scaj te Jesús, scuenta yu'un ha nix hich ya xchicnaj te scuxlejal Jesús ta jbaq'uetalcotic te ay ta scuenta lajel.

¹² Ha yu'un yac ta a'tel ta jtojolcotic te lajele, yan te ha'exe yac ta a'tel ta atojolic te cuxlejale.

¹³ Te bin ut'il ay sch'uhunel co'tancotic pajal soc te bin ts'ihbabil: La jch'uhun, ha yu'un c'opojon, te xchihe, ha nix hich jch'uhunejcotic, ha yu'un ya xc'opojotcotic.

¹⁴ Jna'ojcotic te mach'a la scha'cuxajtes tal te Cajwaltic Jesús, ha nix hich ya me scha'cuxajtesotcotic tal soc Jesús, soc pajalotic ya me stehc'anotic ta stojol.

¹⁵ Ta spisil ini scuenta awutsil alequilic, scuenta yu'un te yutsil yo'tan Dios, te yac ta p'ohlel ta stojol tsobolic, ya me yac' te bayel ya yich' halbeyel wocol yu'un, ta scuenta yich'el ta muc' te Diose.

¹⁶ Ha yu'un ma ba ya xlaj yip co'tantic; aunque behbe yac ta lajel yip te jbaq'uetaltic, jujun c'ahc'al behbe yich'bel yip te co'tantic,

¹⁷ como te jteb nax jwocoltic ini te jc'axel nax ay, ha yac yac'belotic cutsilaltic te c'ax lec xan a soc te mayuc slajibal;

¹⁸ ma ha'uc ya jt'ojan jsitic a te bintic chicanic ta ilel, ha ya jt'ojan jsitic a te bintic ma chicanuc ta ilele; como te bintic chicanic ta ilel, jc'axel nax ay, yan te bintic ma chicanuc ta ilele, sbahtel q'uinal ay stuquel.