2 Corintios 3 - Bible in Tzeltal Bachajón

J'a'teletic yu'un yach'il chapbil-c'op

¹ ¿Ya bal xhahch calcotic lec jc'oblalcotic yan buelta? O ¿ya bal sc'an te hich te bin ut'il yantic, te ha ta carta ya xhalot lec jc'oblalcotic ta atojolic, o ha'ex yac awalbotic te lec jc'oblalcotique?

² Ha'ex nix cartahex cu'uncotic te ts'ihbabil ta co'tancotic, te na'bil abahic soc ilbil yu'un spisil ants-winiquetic.

³ Jamal chican te ha'ex cartahex yu'un Cristo te pasbil cu'uncotic, ma ba ts'ihbabil ta tinta, ha ts'ihbabil ta Espíritu yu'un te cuxul Dios; ma ha'uc ta pehchel tonetic, ha ts'ihbabil ta awo'tanic.

⁴ Te smuc'ul co'tancotic ini, ha nax ta scuenta Cristo ta stojol Dios.

⁵ Ma yu'unuc ya calcotic te jtuquel-o'tancotic ya xhu' cu'uncotic; ha nix Dios ya yac' te ay bin ya xhu' cu'uncotic spasel.

⁶ Ha nix la yac' hu'uc cu'uncotic te ya ca'telincotic yalbeyel sc'oblal te yach'il chapbil-c'op, ma ha'uc te bin ts'ihbabil hilel, ha te bin yu'un te Espíritu; como te bin ts'ihbabil hilel ya xmilawan, yan te Espíritu ya yac' cuxlejal stuquel.

⁷ Te ya'tel te ley te ya yac' lajel, te ts'ihbabil ta ton, teme hich tal soc yutsilal, scuenta yu'un te israeletic ma ba hu' yu'unic yilbeyel sit yelaw te Moisés ta scaj sts'anabul, te ch'ay bahel ta hich ora,

⁸ ¿ma bal c'axuc to xan hich yutsilal a te ya'tel te Espíritu?

⁹ Teme ay yutsilal ya'tel te ley te ya yac' ta tojel mulil, c'ax to xan hich yutsilal a te a'tel te ya yac' te toj ya xc'ohotic ta stojol Dios;

¹⁰ como te bin ay yutsilal ta namey, ma hichuquix ay yutsilal teme ya jpajtic soc te bin mero bayel yutsilal ay ta ora ini.

¹¹ Teme ay yutsilal te bin ya xlaj bahel, c'ax to xan hich ay yutsilal a te bin stalel ay.

¹² Ha yu'un te bin ut'il hich ay te smuc'ul co'tancotic, soc yip co'tan ya x'a'tejotic,

¹³ ma hichuc te bin ut'il te Moisés te la smac ta pac' te sit yelaw scuenta yu'un ma ba ya yilic a te yal-snich'nab Israel te ya xtup' te sts'anabul sit yelawe.

¹⁴ Pero mahc te spensaric, como c'alal ora yo'tic, te c'alal ya yilic te namey chapbil-c'op, ha nix hilem te pac' te mucul sit yelawic a, te ha ta scuenta Cristo ya yich' loq'uesel.

¹⁵ C'alal ora yo'tic, te c'alal ya yilic bin ts'ihbabil yu'un Moisés, macbibil yo'tanic yu'un pac'.

¹⁶ Pero c'alal ya suhtes yo'tanic ta stojol te Cajwaltic, ya xloq'uesbot te paq'ue.

¹⁷ Te Cajwaltic, ha te Espíritu; soc te banti ay te Espíritu yu'un te Cajwaltic, ayic ta libre tey a.

¹⁸ Ha yu'un ta jpisiltic, te ma ba macbilix ta pac' te jsit quelawtic, te yacotic ta yilbeyel yutsil te Cajwaltic hich te bin ut'il ta espejo, yacotic ta yanijel te pajal quileltic soc, te behbe quich'bel cutsilaltic, ta scuenta ya'tel te Cajwaltic, te ha nix te Espíritu.