2 Corintios 12 - Bible in Tzeltal Bachajón

Snahalsitil soc ch'ix ta sbaq'uetal Pablo

¹ Ya sc'an te ya jtoy jba xan, aunque mayuc bin ya jta yu'un; pero ya calbe sc'oblal nahalsitiletic soc te bintic la yac' ta na'el te Cajwaltique.

² Ya jna'be sba jtuhl winic te jun ay soc Cristo te ayix schanlajunebal (14) ha'bil te ic'ot mohel c'alal ta yoxcajal ch'ulchan, (ma jna' teme ta sbaq'uetal o teme ma ba ta sbaq'uetal, ha nax ya sna' te Diose).

³ Ya jna' te winic ini, (teme ta sbaq'uetal o teme ma ba ta sbaq'uetal, ma jna', ha nax ya sna' te Diose),

⁴ te ic'ot mohel c'alal ta paraíso te banti la ya'iy c'op te c'ax bayel yutsil te ma ba a'bibil ants-winic te ya yalbe sc'oblale.

⁵ Ha ya jtoy jba yu'un te winic ini, pero ma ho'uconix ya jtoy jba yu'un, ha nax ya jtoy jba yu'un te mayuc quip.

⁶ Pero te yacuc jc'an ya jtoy jba, ma lomlomc'opuc, como ya cal te bin melele; pero ma hichuc ya jpas, scuenta yu'un mayuc mach'a c'ax hich ya stoybon jc'oblal a te bin ut'il ayon ya yilic o te bin ut'il ya ya'iybon jc'oblale.

⁷ Soc scuenta yu'un ma ba jc'axel ya jtoy jba yu'un te bintic muc' a'bibilon quilticlan, a'boton c'uxul wocol ta jbaq'uetal, ha ya'bat Satanás te ya yuts'inone.

⁸ Oxeb buelta la jc'ambe te Cajwaltic te yacuc sloq'uesbon.

⁹ Pero la yalbon: Tic'at a yu'un te cu'ele, como tey ya xchicnaj xan a te cu'el te banti mayuc awip, xchi. Ha yu'un tse'el co'tan ya jtoy jba yu'un te mayuc quip, scuenta yu'un ya xchicnaj te yu'el Cristo ta jcuenta.

¹⁰ Ha yu'un, ta scuenta Cristo tse'el co'tan yu'un te mayuc quip, te ya quich' ixta'c'optayel, te bin ut'il mayuc bin ay cu'un, te ay uts'ineletic, soc te ay wocoletic; como te c'alal mayuc quip, ha bayelix quip a.

¹¹ Hich jpasoj jba te bin ut'il mach'a ma sna' q'uinal, pero ha'ex la awa'bonic te hich jpase. Ya sc'an te ha'uquex yac awalbonic lec jc'oblal, como ma ba peq'uel ayon yu'un te muc'ul jpuc-c'opetic, aunque mayuc jc'oblal te ho'one.

¹² Te bintic ya yaq'uic ta na'el te ha jpuc-c'op, ha te señahiletic, yutsil a'teliletic soc jchahp a'teliletic, bayel buelta la yich'ic pasel ta awohlilic.

¹³ ¿Binti a te peq'uel ayex yu'un te yantic iglesiahetic? ha nax te ma ba la jca'beyex awocolic yu'un te bintic tuhun cu'une. ¡Pasbonic perdón yu'un te bin ma lecuc la jpas!

Pablo ya yal te ya xbaht ta ilaw ta yoxebal buelta

¹⁴ Yo'tic chapalonix yu'un ya xtal quilex ta yoxebal buelta. Ma ba ya ca'beyex awocolic, como ma ha'uc ya jle te bin ay awu'unic, ha ya jlehex te ha'exe; como te al-nich'anetic ma ha'uc ya slehbe bin ya xtuhun yu'un te sme'static, ha te sme'static ya slehbe bin ya xtuhun yu'un te yal-snich'anique.

¹⁵ Ha yu'un te ho'one tse'el co'tan ya jlajin bin ay cu'un, soc ya jlajin jba ta acuentahic. Teme bayel xan c'ux ya ca'iyex ta co'tan, ¿jteb nax bal c'ux yac awa'iyon ta awo'tanic te ha'exe?

¹⁶ Aunque yac ana'ic te ma ba la jca'beyex awocolic yu'un te bin tuhun cu'un, ay ya yalic te jlo'loywanejon, te la jca'beyex ayacolic.

¹⁷ ¿Ay bal la jlo'loyex ta scuenta te mach'atic la jticombeyex ta atojolique?

¹⁸ La jcalbe wocol te Tito te yacuc xbaht yilex, soc la jca'be bahel sjoquin jtuhl quermanotic. ¿La bal slo'loyex te Tito? ¿Ma bal hichuc yo'tan te bin ut'il co'tan te ho'one? ¿Ma bal junuc nax be jt'unojcotic?

¹⁹ ¿Yu'un bal acuyojic te yac nax jcoltaybel jbahcotic ta c'op a? Ta stojol Dios c'opojemotcotic ta scuenta Cristo. Quermanotac te c'uxex ta co'tancotic, spisil te bintic ya jpascotic, yu'un hich ya yich' yip awo'tanic a.

²⁰ Ya jxi' te c'alal ya xc'ohon ma hichuc ya jtahex te bin ut'il ya jc'an, soc ma hichuc yac atahonic te bin ut'il yac ac'anique. Ya jxi' te ay wan c'op ta awohlilic, o il-o'tantaywanej, ilimba, jatamba, hach-c'op, le-c'op, toybahil soc ma ba ich'apastay.

²¹ C'alal ya xcha'talon, ya jxi' te ya spehc'anon ta atojolic te Diose, soc te ya x'oc'on yu'un tsobol te stahojic smulic pero ma ba suhtem yo'tanic yu'un te bin bohlobtesbil sc'oblal, yu'un antsiwej soc antsinel, soc te bintic chopol ya smulan sbaq'uetal te spasojique.