2 Corintios 10 - Bible in Tzeltal Bachajón

Pablo ya xc'opoj yu'un te ya'tel

¹ Ho'on Pablohon ya calbeyex wocol ta scuenta bin ut'il manso yo'tan soc lec yo'tan te Cristo, ho'on te peq'uel ayon te c'alal ayon ta awohlilic, yan te c'alal ma ba ayon ta awohlilic tulan ya cac' jba ta atojolic ta ac'opic;

² hawocolicuc, te c'alal ya xc'ohon manchuc me tulan ya cac' jba te hich jnopoj te ya jpas ta stojol te mach'atic scuyojic te ha ta scuenta nax ch'ich'-baq'uet te bin ya jpascotique.

³ Aunque ch'ich'-baq'uetotcotic, ma ba hich ya cac'cotic guerra te bin ut'il ya yich' pasel ta scuenta ch'ich'-baq'uet,

⁴ como te a'tejibaletic cu'untic yu'un yaq'uel guerra ma scuentahuc ch'ich'-baq'uet, ha a'tejibaletic te yich'beyej yu'el Dios yu'un sjinel te bintic ay yip;

⁵ ya jintic tsaltamba-c'op soc spisil toybahil te ya scontrahin te bin ay ta na'el yu'un Dios, soc ya jtsacticlantic spisil snopojibal yu'un ya sch'uhunic smandar a te Cristo.

⁶ Soc teme ts'acalix yac ach'uhunic mandar, chapalotic te ora nax ya ca'becotic castigo spisil jc'axun-mandar.

⁷ Te ha'axe ha nax yac awilic te bin chican ta ilel ta asitic. Teme ay mach'a ya yal sba te ha yu'un Cristo, ac'a me sna' te ha nix hich te ho'otcotic yu'unotcotic te Cristo.

⁸ Aunque ya jtoy xan jc'oblal, ma ba ya xq'uexawon yu'un te bin ut'il ay yip ca'telcotic, te a'botcotic yu'un te Cajwaltic scuenta yu'un yac ata xan yip awo'tanic a, ma ha'uc yu'un te ya xjihnex yu'une.

⁹ Ma jc'an te hich yilel te ya jc'an ya jxiwtesex ta cartahetic.

¹⁰ Melel ay mach'atic ya yalic te tulan te cartahetic soc ay yipic, pero te c'alal li' ay, mayuc yip soc mayuc ta cuenta te bin ya yale.

¹¹ Te mach'a hich ya yal, ac'a me sna' te hich te bin ut'il ayotcotic ta c'op ta carta te c'alal ma ba tey ayotcotic a, hich ya jpascotic te c'alal tey ayotcotiquix ahe.

¹² Ma ba ya calcotic soc ma ba ya jpajcotic soc te mach'atic ha'ic nix ya stoy sc'oblalic; ya yaq'uic ta ilel te ma sna'ic stsahtayel, te c'alal ha'ic nix ya sp'is sbahic soc ya spajaltay sbahic.

¹³ Yan te ho'otcotic ma ba ya xjelawotcotic ta stoyel jc'oblalcotic, ha nax ya calcotic te ban c'alal ya'beyejotcotic ca'telcotic te Dios, te ha la yac' te la stahex te ca'telcotique.

¹⁴ Ma ba ya xjelawotcotic ta stoyel jc'oblalcotic; te manchuc la jtahexcotic ya xjelawotcotic ta c'op te hichuque, pero ho'otcotic te nahil la jquich'cotic bahel te lec yach'il c'op yu'un Cristo ta atojolic.

¹⁵ Soc ma ba ya xjelawotcotic ta stoyel jc'oblalcotic yu'un ya'tel yantic. Te bin yacotcotic ta smahliyel, ha te behbe ya yich' xan yip te sch'uhunel awo'tanic, hich ya xmuc'ub ca'telcotic ta awohlilic te ban c'alal p'isbil te ya x'a'tejotcotique.

¹⁶ Hich ya xhu' ya xc'axotcotic xan bahel ta banti ayex yu'un ya calcotic te lec yach'il c'op, ma ba ya cochintaybecotic ya'tel yan yu'un ya jtoy jc'oblalcotic yu'un te a'tel pasbilixe.

¹⁷ Te mach'a ya sc'an ya stoybe sba q'uinal ya'iy, ac'a stoybe sc'oblal te Cajwaltique.

¹⁸ Como ma ha'uc lec sc'oblal c'ohem te mach'a ha nix ya yal te lec sc'oblale, ha lec sc'oblal stuquel te mach'a ya xhalbot lec sc'oblal yu'un te Diose.