1 Timoteo 6 - Bible in Tzeltal Bachajón

¹ Spisil te mach'atic ayic ta mosohil ac'a me yich'ic ta muc' te yajwalic, scuenta yu'un ma ba ya xbohlob sc'oblal yu'un te sbihil te Dios soc te bin ay ta ch'uhunele.

² Te mach'atic ay yajwal te sch'uhunejic Dios, ma me peq'ueluc sc'oblal ya xc'oht yu'unic te bin ut'il yermano sbahic; lecuc xan ac'a yac' sbahic ta a'batinel yu'unic, como te mach'atic ay bin ya stahic yu'un te slequil ya'telic ha te mach'atic sch'uhunejic Dios soc te c'ux ta yo'tanique. Hich me xawac' ta nopel soc yac awa'iy tsitsaw.

Sch'uhunel Dios soc junuc co'tantic

³ Teme ay mach'a yan bin ya yac' ta nopel, te ma pajaluc soc te lequil c'opetic yu'un te Cajwaltic Jesucristo soc te nohptesel bin ut'il toj ta ch'uhunel te Diose,

⁴ ha stoyoj sba soc mayuc bin ya sna', ha nax ay ta yo'tan shachel c'op soc tentamba-c'op te ya yac' hahchuc bic'tal-o'tanil, tsaltamba-c'op, bohlc'op, te chopol ya yil yan,

⁵ soc te tulan ya stsac sbahic ta c'op te mach'atic chopol spensaric, te ma sna'ic bin ut'il ay te smelelil c'op, te ha ya spasic ganar a te bin stojil ay ta ch'uhunel te Diose.

⁶ Pero ha bayel ganar te bin stojil ta ch'uhunel Dios soc te jun yo'tan ay,

⁷ como mayuc bin quich'ojtic tal te c'alal ayinotic li' ta bahlumilal, soc mayuc bin ya xhu' ya quich'tic bahel.

⁸ Ha yu'un teme ay jwe'el cuch'eltic soc jc'u' jpac'tic, junuc co'tantic yu'un.

⁹ Yan te mach'atic ya sc'an ya xc'uhlejubic ya xyahlic ta sujel soc ta yaquil, soc ta banti bayel bintic chopol te ya sc'an yo'tanic soc te ya xjinawan, te ya yac' ochuc ta jinel soc ta ch'ayel te winiquetique.

¹⁰ Como te slohp' spisil te bintic chopole ha te sbic'sitayel taq'uin. Ay mach'atic la sbic'sitayic taq'uin, hich la yihquitayic sch'uhunel Dios soc ha'ic nix la ya'be sba bayel swocolic yu'un.

A'beya te lequil tsaltamba yu'un sch'uhunel-o'tanil

¹¹ Yan te ha'ate, winicat yu'un Dios, ahnan loq'uel ta stojol spisil ini, t'una te bin toj ta pasel, te lec sch'uhunel Dios, sch'uhunel-o'tanil, c'uxultaywanej, te ya xcuhch awu'un, soc manso-o'tanil.

¹² A'beya te lequil tsaltamba yu'un te sch'uhunel-o'tanil; u'untaya te cuxlejal scuenta sbahtel q'uinal, te ha nix ic'bilat yu'un soc te ha ta scuenta te la awal te lequil testigo-c'op ta stojol tsobol testigohetic.

¹³ Ya calbat mandar ta stojol Dios, te ha ya ya'be scuxlejal spisil bintic ay, soc ta stojol te Jesucristo, te la yal lequil testigo-c'op ta stojol te Poncio Pilato,

¹⁴ ma me ayuc yabaquil soc ma me ayuc bin ya xhalbotat yu'un a te yac ach'uhun te mandar ini, ha to c'alal ya xchicnaj tal te Cajwaltic Jesucristo,

¹⁵ te ha ya xc'oht ta pasel ta yorahil yu'un te Dios te ay yutsil soc te stuquel ay ta ajwalil, ha Ajwalil yu'un ajwaliletic soc Yajwal principaletic,

¹⁶ te ha nax stuquel ma xcham, te nahinem ta sacal q'uinal te ma xhu' ochel tey a, te mayuc mach'a yiloj soc ma xhu' ya yil. Ha ac'a ich'ec ta muc' soc ayuc yu'el sbahtel q'uinal stuquel. Hichuc.

¹⁷ Halbeya mandar te jc'uhlejetic te ma me stoy sbahic soc ma me xyac' smuc'ulin yo'tanic a te ta sc'uhlejalic te ma staleluc aye; ha ac'a smuc'ulin yo'tanic te cuxul Dios, te c'ax bayel bin ya ya'botic spisil yu'un ya jmulantic.

¹⁸ Halbeya mandar te ac'a spasic te bin lec, ha'uc me sc'uhlejalic te lequil a'teliletic, soc te bayeluc bintic ya yaq'uic soc orahuc ay bin ya sq'uebenic.

¹⁹ Hich ya stsob sc'uhlejalic scuenta tulan yich'o-ip te ya xtuhun yu'unic ta patil, soc hich ya stahic te smelelil scuxlejalique.

Slajibal mandar halbot yu'un Pablo te Timoteo

²⁰ Timoteo, canantaya te bin a'bilat acuentahin; ma xawac' aba a te banti yac ta halel howilc'opetic te mayuc scuentahil soc te banti yac ta halel c'opetic cuybil ta p'ijil-c'op.

²¹ Ay mach'atic yalojic te ay p'ijil-c'op yu'unic, hich la yihquitayic te bin ay ta ch'uhunel. Ac'a sjoquinex te yutsil-o'tanil. Hichuc.