1 Timoteo 2 - Bible in Tzeltal Bachajón

Bin ut'il ya sc'an c'oponel Dios

¹ Ha nahil ya jtsits spisilic te ya me sc'oponic Dios, te ay bintic ya sc'ambeyic soc te ya yalbeyic wocol Dios yu'un spisil ants-winiquetic,

² soc te ajwaliletic soc spisil mach'atic ay ya'telic, scuenta yu'un lamaluc me q'uinal ya x'ayinotic soc junuc co'tantic ta sch'uhunel Dios soc lecuc jc'oblaltic a.

³ Como ha lec ini soc ha lec yo'tan Dios yu'un, te Jcoltaywanej cu'untic,

⁴ te yo'tanuc ya xcol spisil ants-winiquetic soc te yacuc xc'oht ta yo'tanic te smelelil-c'ope;

⁵ yu'un jtuhl nax Dios ay soc jtuhl nax te mach'a ya xc'opoj yu'un ants-winiquetic ta stojol te Diose, ha te winic Jesucristo,

⁶ te la yac' sba ta lajel yu'un smambeyel scolel spisilic, ha te la yich' halel ta testigo c'op te c'alal la sta yorahil.

⁷ Ha scuentahil te la jquich' ca'tel ta yalel sc'op Dios soc ta jpuc-c'op soc ta maestro yu'un te jyanlumetic yu'un ya ca'be sna'ic bin ay ta ch'uhunel soc bin a te smelelil c'ope. Melel te bin ya cal ta stojol Cristo, ma jlotuc.

⁸ Ha yu'un ya jc'an te ya sc'oponic Dios ta bayuc te winiquetic, te mayuc ilimba soc mayuc hach-c'op a ya shach sch'ul c'abic.

⁹ Soc te scuentahiluc ya slap sc'u'-spaq'uic te antsetic, te stojiluc soc ma ba c'ax bayel ch'albilic: ha te ma ba c'ax ch'albil sjolic, o te ch'albil ta oro, perla, o slapojic c'u'ul pac'aletic te bayel stojolic,

¹⁰ ac'a sch'ahl sbahic a te ta lequil a'teliletic, hich te bin ut'il ya sc'an pasel yu'un antsetic te sch'uhunejic te Diose.

¹¹ Te ants ac'a slahman sba ta snopel soc peq'ueluc yo'tan.

¹² Ma ba ya cac' te ya xp'ijubteswan te ants ta stojol winic o te ya scuentahin; ya me slahman sba.

¹³ Como ha nahil la yich' pasel te Adán, patil te Eva;

¹⁴ soc ma ha'uc lo'loyot te Adán, ha lo'loyot te ants, hich la sta smul a.

¹⁵ Pero ya xcol ta scuenta alajel, teme ay sch'uhunel yo'tan, sc'uxul yo'tan, ch'ultesbil soc lamal yo'tan ya x'ayin.