1 Timoteo 1 - Bible in Tzeltal Bachajón

Spatil-o'tanil

¹ Pablo, jpuc-c'op yu'un te Jesucristo ta scuenta smandar Dios te Jcoltaywanej cu'untic, soc te Cajwaltic Jesucristo te ha smuc'ul co'tantic,

² ta stojol Timoteo, te mero jnich'an ta scuenta sch'uhunel-o'tanil: Ayuc me awu'un yutsil-o'tanil, sc'uxul-o'tanil soc lamal q'uinal yu'un te Jtatic Dios soc te Cajwaltic Cristo Jesús.

Ma me xyich' ch'uhunel te bin ma stojiluc ta ch'uhunel

³ C'alal bohon ta Macedonia, la jcalbat wocol te yacuc xhilat ta Éfeso scuenta yu'un yac apasticlan ta mandar cha'oxtuhlic te manchuc ya yaq'uic ta nopel te bin ma stojiluc ta ch'uhunel,

⁴ soc te manchuc ya xbaht ta yo'tanic sna'el namey c'opetic te ay ta halel soc te bihililetic yu'un ts'umbalil te ma xlaj ta halel, te ha ya shach c'op, te ma ba ya yac' muc'ubuc te ya'tel Dios te ay ta scuenta sch'uhunel-o'tanil.

⁵ Te bin scuentahil te mandar ini ha te c'uxul-o'tanil te hahchem tal ta o'tanil te mayuc yabacul, ta o'tanil te mayuc bin ya yal yu'un, soc ta sch'uhunel-o'tanil te melel ay.

⁶ Ay mach'atic howiyic bahel ta stojol ini, ha ya yalic c'opiletic te mayuc scuentahil.

⁷ Ya sc'anic te ha maestrohetic ya xc'ohtic yu'un te Ley, pero ma sna'beyic scuentahil te bin ya yalic o te bin ya yaq'uic ta nopel te ha smelelil ta sc'opic.

⁸ Jna'ojtic te lec ay te Ley teme stojil ya yich' tuhunel,

⁹ teme na'bil cu'untic te Ley ma ha'uc a'bot ta scuenta te mach'atic toj ayic, ha a'bot ta scuenta te jc'axun-mandaretic soc jtoybahetic, te bohloben sc'oblalic soc jmulawiletic, te ma x'ich'awanic ta muc' soc jbohlobteswanejetic, te mach'atic ya smil te static o snanic, te jmilawetic,

¹⁰ j'antsiwejetic soc j'antsineletic, te mach'atic smohlol nix ta winiquil te ya sjoquin sbahic soc, te mach'atic ya snaq'uic ants-winiquetic, jlotetic soc mach'atic ya spasic lot ta stojol Dios, soc biluc yan te ya scontrahin te lequil nohptesel,

¹¹ hich ya yal te t'ujbil lec yach'il c'op yu'un te Dios te bayel yutsil, te ha a'bilon ta jcuentahe.

Ya'tel Pablo

¹² Ya calbe wocol te Cajwaltic Cristo Jesús te la ya'bon yip co'tan, como la yil te jun co'tan, hich la ya'bon quich' ca'tel ta stojol,

¹³ aunque ha jbohlc'optaywanejon, j'uts'inwanejon soc j'ixta'c'optaywanejon ta nahil to; pero la jquich' c'uxultayel yu'un te ma ba la jna' bin la jpas soc mayuc sch'uhunel co'tan a.

¹⁴ C'ax bayel yutsil yo'tan te Cajwaltic c'oht ta jtojol soc sch'uhunel-o'tanil soc sc'uxul-o'tanil te ayic ta stojol te Cristo Jesús.

¹⁵ Ha stojil c'op ini te ya sc'an ch'uhunel yu'un spisilic: ha te xtaluquix ta bahlumilal te Cristo Jesús ta swehtesbeyel scolel jmulawiletic, te c'ax hich jmulawilon a te bin ut'il spisil te yantique.

¹⁶ Pero ha scuentahil te la jquich' c'uxultayel, scuenta yu'un te Jesucristo ya xhu' ya yac' ta ilel te lec yo'tan te mayuc slajibal, te hich chican ta jcuenta, ho'on te c'ax bayel jmul, scuenta yu'un hich ya sna'ic a te mach'atic patil ya sch'uhunic Cristo soc ya yich' scuxlejalic scuenta sbahtel q'uinal.

¹⁷ Ha yu'un ac'a ich'ec ta muc' soc ayuc me yutsil sc'oblal sbahtel q'uinal te Ajwalil te sbahtel q'uinal ay, te stalel cuxul, te ma chicanuc ta ilel, te ha nax Dios stuquel. Hichuc.

¹⁸ Jnich'an, Timoteo, ya ca'bat te mandar ini, te hich nix halbilix ac'oblal ta sc'op-jalwanej ta nahlilal, scuenta yu'un yac awac' te lequil tsaltamba ta scuenta te c'opetic ini,

¹⁹ te ma xch'ay te sch'uhunel awo'tan soc mayuc bin ya xhalbotat ta awo'tan a. Ay mach'atic la yihquitayic ini, hich jihn te sch'uhunel yo'tanic.

²⁰ Hich te bin ut'il la spasic te Himeneo soc te Alejandro, te la jcaq'uic ta sc'ab Satanás scuenta yu'un ya snopic te ma me sbohlc'optayic te Diose.