1 Samuel 22 - Bible in Tzeltal Bachajón

¹ Hich loc' bahel tey a te David, baht ta ahnel ta ch'en yu'un Adulam. C'alal hich la ya'iyic te sbanquiltac soc te yantic mach'atic ay yu'un te stat, talic ta stojol.

² Soc talic ta joquinel yu'un te mach'atic ay swocolic, te mach'atic ay sbetic, soc spisil te mach'atic pich'il yo'tanic, ha jtsobaw c'oht yu'unic te David. Ay wan jbahc' ta tuhl (400) winiquetic la sjoquin.

³ Loc' bahel tey a te David, baht ta Mizpa ta sq'uinal Moab, hich c'oht yalbe te ajwalil yu'un Moab: Ya calbat wocol te yacuc sjoquinex hilel te jme'jtat ha to ya jna' te bin ya spasbon te Diose, xchi.

⁴ Hich la yic'ticlan tal ta stojol te ajwalil yu'un Moab te sme'stat, tey ayinic soc a te jayeb c'ahc'al halaj ta ahnibal te David.

⁵ Pero te jalwanej Gad, hich la yalbe te David: Ma me xhilat ta ahnibal li'i, bahan ta sq'uinal Judá, xchi. Hich baht te David, c'oht ta tohyem te'etic yu'un Haret.

Saúl ya smil sacerdotehetic ta Nob

⁶ La ya'iy te Saúl te na'bil banti ay te David soc te mach'atic sjoquinej. Te Saúl, hucul ta tsehl ta Gabaa ta ye'tal tamarisco-te', stsacoj slanza, joytaybil yu'un te a'batetic yu'une.

⁷ Te Saúl hich la yalbe te a'batetic joytaybil yu'un: A'iya awa'iyic snich'nab Benjamín, te snich'an Isaí ¿ya bal ya'beyex aq'uinalic soc ats'usubilic, soc ya bal yotsesex ta jtsobaw yu'un jmil ta tuhl soc yu'un ho'winic (100) ta tuhl soldadohetic?

⁸ ¿Ha bal scuentahil te yac achap ac'opic te yac acontrahinonique? Mayuc mach'a la yalbon ca'iy te bin ut'il te jnich'an la schap sc'op soc te snich'an Isaí, soc mayuc jtuhluquex te yac ana'bonic yo'bolil jba soc yac awalbonic te bin ut'il te jnich'an la sjuc sba soc te ca'bat te ya smacliyon, hich te bin ut'il yac spasbel ta ora ini, xchi.

⁹ Ha yu'un te Doeg te edom-winic, te ay ta yohlilic te a'batetic yu'un Saúl, hich la yal: La jquil te snich'an Isaí te tal ta Nob ta stojol te Ahimelec te snich'an Ahitob.

¹⁰ Te Ahimelec ay bin la sjoc'obe te Jehová ta scuenta David, soc la ya'be swe'el soc la ya'be te espada yu'un Goliat te filisteo-winic, xchi.

¹¹ Hich te ajwalil la sticon ta iq'uel tal te sacerdote Ahimelec te snich'an Ahitob soc spisil te mach'atic ay yu'un te stat, ha te sacerdotehetic te ayic ta Nob. Spisil talic ta stojol te ajwalil.

¹² Te Saúl la yalbe: A'iya me awa'iy, snich'anat Ahitob, xchi. Li' ayoni, cajwal, xchi te Ahimelec.

¹³ Hich joc'obot yu'un te Saúl: ¿Bin yu'un te la achap ac'op soc te snich'an Isaí yu'un yac acontrahinonic? La awa'be pan soc espada, soc ay bin la ajoc'obe Dios ta scuenta, yu'un ya xhahch scontrahinon soc ya smacliyon, hich te bin ut'il yac ta spasel ta ora ini, xchi.

¹⁴ Te Ahimelec la sjac'be sc'op te ajwalil: Ta spisil te a'batetic awu'un, ¿mach'a a te hich jun yo'tan ta atojol te bin ut'il te David, te ha nix snihal te ajwalil, te yich'oj ya'tel ta stojol soc te ich'bil ta cuenta ta ana?

¹⁵ ¿Yu'un bal shahchibal buelta te ay bin la joc'obe te Dios ta scuenta David? ¡Ma hichuc! Te ajwalil ma me ayuc bin ya ya'be smulin te ya'bat soc spisil te mach'atic ay yu'un te jtate; como te a'bat awu'un jxuht' mayuc bin ya sna' bin ut'il ay te c'op ini, xchi.

¹⁶ Pero la yal te ajwalil: Ya me xlajat, Ahimelec, soc spisil mach'atic ay yu'un te atate, xchi.

¹⁷ Hich te ajwalil la yalbe te jcananetic yu'un te ayic ta sts'ehl: Milahic te sacerdotehetic yu'un Jehová, yu'un ha nix hich jun yo'tanic soc David. Sna'ojic te yac ta ahnel ta jtojol, pero ma ba la yalbonic, xchi. Pero te a'batetic yu'un te ajwalil ma ba la sc'an la smilic te sacerdotehetic yu'un Jehová.

¹⁸ Ha yu'un te ajwalil la yalbe te Doeg: Milticlana ha'at te sacerdotehetic, la yut. Hich te Doeg te edom-winic och smilticlan te sacerdotehetique. Ta hich ora la smil ho'eb yo'winic (85) ta tuhl winiquetic te slapojic efod pasbil ta lino.

¹⁹ Soc te Saúl la smilticlan ta espada te mach'atic ayic ta Nob, ha te pueblo yu'un te sacerdotehetic: ha winiquetic, antsetic, alaletic soc tut alaletic te chu'ic to, soc wacaxetic, burrohetic soc tuminchijetic, spisil la smilticlan ta espada.

²⁰ Pero Abiatar, jtuhl snich'an Ahimelec snich'an Ahitob, loc' ta ahnel, baht ta banti ay te David.

²¹ C'oht yalbe te David bin ut'il Saúl la yac' ta milel te sacerdotehetic yu'un Jehová.

²² Te David la yalbe te Abiatar: Ta hich ora, te bin ut'il tey ay a te Doeg te edom-winic, jna'oj te ya me yalbe te Saúl. Ho'on ta jcuenta te la yich' milel spisil te mach'atic ay yu'un te atate.

²³ Hilan li'i, ma me xiwat. Te mach'a ya sc'an ya smilon ha nix hich ya sc'an ya smilat. Mayuc bin ya spasbat yu'un te ajoquinejonix, xchi.