1 Samuel 2 - Bible in Tzeltal Bachajón

Sc'ayoj Ana

¹ Te Ana la sc'opon Dios, hich la yal: Mero tse'el co'tan ta stojol Jehová, ya quich' xan quip ta scuenta Jehová; ta que ya jtse'lay te jcontratac, como tse'el co'tan yu'un te la acoltayon.

² Mayuc mach'a yan hich ch'ul Dios a te bin ut'il Jehová, mayuc yan, ha'at nax atuquel; mayuc yan ahnibal hich te bin ut'il te Dios cu'untique.

³ Ma me xc'opojex soc atoybahilic, ma me xloc' toyba-c'op ta awe'ic, como te Jehová ha te Dios te ya sna' spisil, soc ay ta scuenta stsahtayel te bintic ya yich' pasele.

⁴ Wac'ticlambil ste'el st'ihmalte'ic te mach'atic ay yipic, yan te mach'atic mayuc yipic ya me yich' yipic stuquelic.

⁵ Te mach'atic nojel sch'uhtic ya yac' sbahic ta jle-a'tel scuenta we'elil, yan te mach'atic ayic ta wi'nal, mayuquix swi'nalic. Te ants te ma x'alaj, ayinix huctuhl yal; yan te mach'a ay bayel yalatac, ay ta mel-o'tan.

⁶ Te Jehová ya yac' lajel soc ya yac' cuxlejal; ya yac' cohuc ta muquenal soc ya yac' loq'uel tal.

⁷ Te Jehová ya x'ac'awan ta pobre soc ya x'ac'awan ta jc'ulej; ya spehc'ambe sc'oblal soc ya stohytesbe sc'oblal.

⁸ Ha ya shach mohel ta ts'u'lum te pobre, ya shach ta sch'ayojibal c'a'pal te mach'a mayuc bin ay yu'un, scuenta yu'un ya yac' shuhcan sba soc príncipaletic soc ya yac' x'ich'otuc ta muc'. Como yu'un Jehová te yich'o-ip te lumq'uinal, tey la snahcan a te bahlumilale.

⁹ Ha ya scanantaybe yoc te mach'atic yu'un te ch'uhltesbilique, yan te mach'atic chopol yo'tanic ya me xlajic ta yihc'al q'uinal; como mayuc mach'a ya ya'iy tsalaw ta scuenta te yip stuquel.

¹⁰ Te mach'atic ya scontrahinic te Jehová ya me xlajinotic, ha ya xt'ohm tal ta stojolic c'alal ta ch'ulchan. Te Jehová ya me yich' ta c'op c'alal ta sti'il bahlumilal; ya me ya'be yip te ajwalil yu'un, soc ya me ya'be xan yip te Mach'a malbil ta aceite yu'une, xchi.

¹¹ Patil suht bahel ta sna ta Ramá te Elcana; te alal-querem hil ta a'batinel yu'un Jehová ta stojol te sacerdote Elí.

Smulic te snich'nab Elí

¹² Te snich'nab Elí mero chopol yo'tanic, ma ba la sna'beyic sba te Jehová.

¹³ Hich la spasulanic te sacerdotehetic ta stojol te pueblo: teme ay mach'a ya yac' milbil mahtanil, te c'alal yac ta ta'ajel a te ti'bal, ya xtal jtuhl ya'bat te sacerdote, yich'oj ya xtal ta sc'ab jun trinche te oxeb ye,

¹⁴ ya slap ochel ta perol, o ta oxom, caldero, o ta muc'ul sartén; spisil te bin ya stsac loq'uel ta trinche ha ya yich' te sacerdote. Hich ya spasbeyic spisil te israeletic te ya xtalic ta Silo.

¹⁵ Ha nix hich, te c'alal ma to ba chic'bil a te sjuhp'el, ya xtal te ya'bat te sacerdote, hich ya xc'oht yalbe te mach'a ya yac' te milbil mahtanil: A'bon ti'bal yu'un ya jwobe sti' te sacerdote, como ma ba ya yich'bat ti'bal te ta'ajemix, stsehel ya sc'an, xchi.

¹⁶ Teme ya xhalbot yu'un te winic: Ha nahil ya sc'an ya yich' chic'beyel te sjuhp'el, patil ich'a bahel te jayeb yac ac'an, teme xchihe, hich ya yal: Ma'uc, a'bon ta ora; teme ma'uque ya me jtsacbat bahel ta fuersa, xchi.

¹⁷ Ha yu'un te smul te winiquetic ini mero muc' c'oht ta stojol Jehová, como mayuc scuentahil ta yo'tanic te mahtaniletic yu'un Jehová.

¹⁸ Te querem Samuel yac yac'bel sba ta a'batinel ta stojol Jehová, sc'u'inej efod pasbil ta lino-pac'.

¹⁹ Te snan ya spasbe stut muc'ul-c'u', ya yich'be tal jujun ha'bil c'alal ya xmo tal soc smamalal ta yaq'uel te milbil mahtanil te ya yaq'uic jujun ha'bil.

²⁰ Te Elí ya ya'be bendición te Elcana soc te yihnam, hich ya yal: Jehová ac'a ya'bat anich'nab soc te ants ini scuenta sjelol te la sc'ambe te Jehová, xchi. Patil ya suhtic bahel ta sna.

²¹ Te Jehová la sna' te Ana, hich hahch yal, ayin xan oxeb squerem-al soc cheb yantsil-al. Te querem Samuel xquechcon ta muc'ubel ta stojol Jehová.

²² Te Elí mero mamalix, soc ya'iyej te bin yacalic ta spasel te snich'nab ta stojol spisil Israel, soc te ya xwayic soc te antsetic yac'oj sbahic ta a'batinel ta yochibal te Nahilpac' Templo yu'un tahojibal.

²³ Ha yu'un hich la yalbe: ¿Bin yu'un te hich yac apasic? Spisil te pueblo ya yalbonic sc'oblal te chopol awa'telique.

²⁴ Ma'uc, jnich'nab, ma lecuc ac'oblalic yac ca'iybel te yac awa'beyic sle smul te pueblo yu'un Jehová.

²⁵ Teme ay mach'a ya sta smul ta stojol yan, Dios ya xc'opoj yu'un, pero teme ay mach'a ya sta smul ta stojol Jehová, ¿mach'a ya xc'opoj yu'un stuquel? xchi. Pero ma ba la ya'iybeyic sc'op te statique, como te Jehová chapalix yu'un te ya smilticlan.

²⁶ Yan te querem Samuel xquechcon ta muc'ubel soc lec sc'oblal yac ta c'ohel ta stojol Dios soc ta stojol te ants-winiquetique.

²⁷ Tal jtuhl winic yu'un Dios ta stojol te Elí, hich la yalbe: Hich yaloj te Jehová: ¿Ma bal jamaluc la jcac' jba ta na'el ta stojol te mach'atic ay yu'un atat, te c'alal ayic to ta Egipto a te cuentahimbilic yu'un faraón?

²⁸ Ha la jtsa loq'uel ta yohlil spisil te jchahp yu'un Israel scuenta sacerdote cu'un ya xc'oht, yu'un ya yac' chic'bil mahtanil ta scajtajib cu'un, ya schic' pom, soc ya slap efod ta jtojol. La jca'be te mach'atic ay yu'un atat spisil te mahtaniletic chic'bilic ta c'ahc' te ya yaq'uic te snich'nab Israel.

²⁹ ¿Bin yu'un te mayuc sc'oblal ta awo'tanic te chic'bil mahtaniletic soc te yantic mahtaniletic cu'un te la jpas ta mandar te ya yich' aq'uel ta Nahilpac' Templo; soc te c'ax hich yac awich' ta muc' a te anich'nab te bin ut'il te ho'one, ha te yac ajup'teslambel ta banti c'ax lec yu'un te mahtaniletic ya yaq'uic te pueblo Israel cu'un? xchi te Jehová.

³⁰ Ha scuentahil te hich ya yal te Jehová te Dios yu'un Israel: Calojix ta jamal te mach'atic ay awu'un soc te mach'atic ay yu'un atat ya me x'a'tejic ta jtojol spisil ora, te xchihe. Pero yo'tic ya yal te Jehová: Mayuc bin ora te hich ya jc'ohtes ta pasel, como ha ya quich' ta muc' te mach'atic ya yich'onic ta muc', yan te mach'atic mayuc jc'oblal ta yo'tanic, mayuc sc'oblal ya xc'oht cu'un.

³¹ Ya xtal yorahil te ya jlajimbat awip soc te yip te mach'atic yu'un atat, scuenta yu'un ma me ayuc mamal ya xhil ta ana.

³² Ya me awil te peq'uel ya xc'oht te mach'atic ay awu'un. Aunque Dios ya spas bin lec ta stojol Israel, mayuc bin ora te ay mamal ya xhil ta ana.

³³ Te mach'a awu'un te ma ba ya jloq'ues ta a'tel ta stojol te scajtajib ta chiq'uel mahtanil cu'un, ha ya ya'bat te ya xlaj asit yu'un oq'uel soc te ya xnoj ta mel-o'tan te awo'tane; soc spisil mach'atic ya x'ayinic ta ana, jcolel winic to a ya me xchamic.

³⁴ Ha me seña awu'un ini te bin ya xc'oht ta pasel ta stojol te cha'tuhl anich'nab, ha te Ofni soc Finees: ta schebalic ya me xlajic ta junax c'ahc'al.

³⁵ Ya cotses yan sacerdote te jun yo'tan ta jtojol, te ya spas te bin ya sc'an co'tan. Ya cac' ya xhalaj te sts'umbal, soc ya me x'a'tej spisil ora ta stojol te mach'a tsahbil cu'une.

³⁶ Te mach'atic hilemic awu'un ya me xtal bic'tajuc ta stojol ta sc'anel jsehpuc plata o jxehtuc pan, soc ya me yalbe: Awocoluc a'bon biluc a'telil ta sacerdotehil scuenta yu'un hich ya xhu' ya jwe' jxeht'uc pan a, xchi te winic yu'un Dios.