1 Reyes 8 - Bible in Tzeltal Bachajón

Salomón ya sohltes bahel ta Templo te scaxahul te chapbil-c'op

¹ Te Salomón la stsob ta stojol ta Jerusalén te mamaletic ta Israel, spisil te jcuentahinwanejetic yu'un te jujuchahp yu'un Israel soc te tatiletic ta jujun sna te snich'nab Israel, scuenta yu'un ya yich'ic tal te scaxahul te chapbil-c'op yu'un Jehová te ay ta Pueblo yu'un David, ha te Sión.

² La stsob sbahic soc te ajwalil Salomón spisil te winiquetic yu'un Israel ta u Etanim, te ha shuquebal u yu'un te ha'bil, ta yorahil q'uin.

³ C'alal talic spisil te mamaletic yu'un Israel, te sacerdotehetic la sq'uechic te scaxahul te chapbil-c'op,

⁴ la yich'ic bahel soc te Nahilpac' Templo yu'un tahojibal soc spisil bintic ch'ultesbil te tuhun ta Nahilpac' Templo. Ha la yich'ic bahel te sacerdotehetic soc te levitahetique.

⁵ Te ajwalil Salomón soc spisil te pueblo yu'un Israel te stsoboj sbahic soc, ayic ta stojol te scaxahul te chapbil-c'op, yac yac'belic milbil mahtanil tuminchijetic soc torohetic, ma ba hu' ta ahtayel yu'un yipal.

⁶ Te sacerdotehetic la yaq'uic te scaxahul te chapbil-c'op yu'un Jehová ta ch'ul awilal ta Na, ha te Mero Ch'ul Awilal, ta ye'tal xiq'uic te querubinetic,

⁷ como te querubinetic slich'oj xiq'uic ta stojol te lugar yu'un te scaxahul te chapbil-c'op, hich la yaxintesic te scaxahul te chapbil-c'op soc te sq'uechojibal.

⁸ Hich snahtilic te sq'uechojibal te ya xchicnaj ta ilel sni'il c'alal ta Ch'ul Awilal, te snuhp'usitayej sba soc te Mero Ch'ul Awilal, pero ma ba chican ta ilel ta fuera. Hich ayic c'alal ora.

⁹ Mayuc bin yan te ay ta yutil te scaxahul te chapbil-c'op, ha nax te cha'pehch ton te la yotses Moisés ta wits Horeb, te banti Jehová la schap sc'op soc te snich'nab Israel te c'alal loq'uic tal ta sq'uinal Egipto.

¹⁰ C'alal loq'uic ta Ch'ul Awilal te sacerdotehetic, noj ta tocal te sna te Jehová.

¹¹ Ma ba hu' yu'unic spasel ya'telic te sacerdotehetic ta scaj te tocale, como noj ta yutsilal Jehová te Na yu'une.

Salomón ya yac' ta stojol Dios te Templo

¹² Te Salomón hich la yal: Yaloj te Jehová te ya xnahin ta yihc'al q'uinal;

¹³ pero ho'on la jpasbatix jun na ta banti ya xnahinat, jun lugar te banti ya xnahinat spisil ora, xchi.

¹⁴ Patil te ajwalil la sut sit, la ya'be bendición te pueblo Israel te c'alal teq'uelic spisilic.

¹⁵ Hich la yal: Bayel me yutsil te Jehová, te Dios yu'un Israel te ha nix la yac' c'ohtuc ta pasel te bin la yalbe ta jamal te jtat David, te hich la yal:

¹⁶ C'alal bin ora la jloq'ues tal ta Egipto te Israel te pueblo cu'un ha to c'alal ora mayuc banti jtsahoj jun pueblo ta yohlil spisil ta chahp te sts'umbal Israel te banti ya yich' pasel na te ya x'ayin te jbihile, pero la jtsa te David yu'un ya scuentahin te pueblo Israel cu'un, te xchihe.

¹⁷ Te jtat David ay ta yo'tan te ya spas na ta scuenta yich'el ta muc' te sbihil Jehová te Dios yu'un Israel.

¹⁸ Pero te Jehová la yalbe te jtat David: Te bin ut'il la anop ta awo'tan te yac apas na yu'un te jbihil, lec te bin la sc'an awo'tan.

¹⁹ Pero ma ha'ucat te yac apas te Nahe, ha ya spas te na yu'un te jbihil te anich'ane, xchi sc'oblal.

²⁰ Te Jehová la yaq'uix c'ohtuc ta pasel te bin yaloj; como ho'on ochon ta sjelol te jtat David, soc ho'on huhcajon ta huctajibal yu'un Israel, hich te bin ut'il yaloj te Jehová, te Dios yu'un Israel.

²¹ Soc tey chapal cu'un a jun lugar yu'un te scaxahul te chapbil-c'op te banti ay te c'op la schap Jehová soc te jme'jtatic te c'alal la sloq'ues tal ta sq'uinal Egipto, xchi te Salomón.

²² Patil te Salomón la stehc'an sba ta stojol te scajtajib smahtan Jehová ta comonsitil yu'un spisil te pueblo Israel, la shach mohel sc'ab ta ch'ulchan,

²³ hich la yal: Jehová, Dios yu'un Israel, mayuc yan dios ta ch'ulchan o ta bahlumilal hich te bin ut'il ha'at, te yac awac' c'ohtuc ta pasel te chapbil-c'op soc te sc'uxul awo'tan ta stojol te a'batetic awu'un te ayic ta atojol.

²⁴ La awac' c'ohtuc ta pasel te bin la awalbe te awa'bat David, te jtat; la awal ta jamal soc la awac' c'ohtuc ta pasel yo'tic, hich te bin ut'il c'ohtix ta pasel ta ora ini.

²⁵ Yo'tic, Dios yu'un Israel, c'ohtesa ta pasel te bin la awalbe te awa'bat David te jtat, te hich la awal: Ma ba ya spas falta jtuhl ats'umbal ta jtojol te ya shuhcan sba ta huctajibal yu'un Israel, teme ya st'umbon jbe te awal-anich'nab soc teme ya xbehenic ta jtojol hich te bin ut'il behenat ta jtojol te ha'ate, xchihat.

²⁶ Yo'tic, Jehová, Dios yu'un Israel, ac'a c'ohtuc ta pasel te bin la awalbe te awa'bat David te jtate.

²⁷ Pero ¿melel bal te ya xnahin Dios ta bahlumilal? Como te ch'ulchan, soc te stoyolil ch'ulchan, ma xhu' ya x'ochat a, ¿ha'uc to balix a te Na te la jpase?

²⁸ Pero a'iybeya sc'op te a'bat awu'un te bin ya sc'ambat, Jehová, Dios cu'un; a'iybeya yaw soc te bin ya yalbat yo'tic te a'bat awu'une.

²⁹ Jamaluc asit ta c'ahc'alel soc ta ahc'abal ta stojol te Na ini, te banti lugar te hich awaloj: Tey ya x'ayin a te jbihil, te xchihate, scuenta yu'un yac awa'iybe sc'op te a'bat awu'un te c'alal ya sc'oponat ta lugar ini.

³⁰ A'iybeya awa'iy te sc'op te a'bat awu'un soc te sc'op te pueblo Israel awu'un. C'alal ya sc'oponat ta lugar ini, a'iybeya sc'opic c'alal banti nahinemat ta ch'ulchan. A'iybeya soc pasbeya perdón.

³¹ Teme ay mach'a ya sta smul ta stojol te spat-xuhc soc teme ya sujot ta yalel ta jamal, teme hich ya xtal yal ta jamal ta stojol te scajtajib ta chiq'uel mahtanil awu'un li' ta na ini,

³² a'iybeya awa'iy c'alal ta ch'ulchan, pasa te bin ya sc'an pasele. Chahpana te a'batetic awu'un, a'beya stoj smul te mach'a ay smul, ac'a c'ohtuc ta stojol te castigo yu'un te bin spasoj, soc ya me awal te mayuc smul te mach'a toj soc a'beya stojol ha chican bin yilel te ya'tele.

³³ Te c'alal ya xtsalot yu'un scontra te pueblo Israel awu'un ta scaj smulic ta atojol, teme ya suht tal ta atojol soc ya yalic ta jamal te abihil, teme ya sc'oponat soc te ya yalbat wocol li' ta Na ini,

³⁴ a'iybeya sc'opic c'alal ta ch'ulchan, pasbeya perdón te smulic te pueblo Israel, soc suhtesa talel ta q'uinal te la awa'be te sme'statique.

³⁵ Te c'alal ya xmahc te ch'ulchan, te ma ba ya yac' ha'al ta scaj stahoj smulic ta atojol, teme ya sc'oponat li' ta lugar ini soc teme ya yalic ta jamal te abihile; teme ya suhtes yo'tanic yu'un te smulic te c'alal yac awa'be swocolic,

³⁶ a'iybeya sc'opic c'alal ta ch'ulchan, pasbeya perdón te smulic te a'batetic awu'un, ha te pueblo Israel. A'beya snopic te lequil be te ya xbehenic bahel a, soc a'beya tal ha'al li' ta aq'uinal te la awa'be sq'uinalin te pueblo awu'une.

³⁷ Teme ay wi'nal ta q'uinal, o jmilawal-chamel, schamel o stotol awal-ts'unubiletic, muc'ul c'ulubetic o tut c'ulubetic; teme joytaybilix yu'un scontra a ta q'uinal te banti nahinemic, o biluc wocol o chamel te ya xtale,

³⁸ mach'ayuc a, o teme spisil te pueblo Israel awu'un te ya sc'oponat o te ya yalbat wocol, te bin ora ya yil te ay swocol soc ya shach sc'abic ta stojol te Na ini,

³⁹ a'iybeya sc'opic c'alal ta ch'ulchan, te banti nahinemat, pasbeya perdón, pasa te bin ya sc'an pasel. A'beya ta tuhlultuhl ha chican bin yilel te bin spasojic, como ha'at ana'beyej yo'tan (como ha'at nax atuquel ana'beyej yo'tan spisil ants-winiquetic),

⁴⁰ scuenta yu'un ya yich'at ta muc' te jayeb c'ahc'al cuxulic ta q'uinal te la awa'be te jme'jtatcotique.

⁴¹ Ha nix hich te jyanlum, te ma ha'uc te pueblo Israel awu'un, te ya xtal ta namal q'uinal scaj te abihile,

⁴² (como ya me ya'iybeyic sc'oblal te muc' abihil, te yip ac'ab soc te ac'ab te ahachoj) teme ya xtal sc'oponat li' ta Na ini,

⁴³ a'iybeya sc'op c'alal ta ch'ulchan, ta lugar te banti nahinemat, a'beya spisil bintic ya sc'ambat te jyanlum, scuenta yu'un spisil te pueblohetic ta bahlumilal ya sna'bat abihil soc ya yich'at ta muc', hich te bin ut'il te pueblo Israel awu'un, soc hich ya sna'ic a te ay ta halel abihil ta stojol te Na ini te la jpase.

⁴⁴ Te c'alal ya xloc' bahel ta ya'beyel guerra te scontra te pueblo awu'un, ta bayuc behil te yac aticon bahel, teme ya yac' sitic ta stojol te pueblo te tsahbil awu'un soc ta stojol te Na te la jpasbat yu'un te abihil c'alal ya sc'oponic Jehová,

⁴⁵ a'iybeya c'alal ta ch'ulchan te sc'opic soc te bin ya yalic wocol ta atojol, soc pasbeya te bin stojil ya sc'an pasele.

⁴⁶ Te c'alal ya sta smulic ta atojol, (como mayuc mach'a ma sta smul), teme ilinat ta stojolic, teme la awac' ta sc'ab te scontra yu'un ya yic' bahel ta chuquel ta sq'uinal te scontra, teme namal o nopol,

⁴⁷ teme tey ta q'uinal ta banti ayic ta chuquel ya suhtes yo'tanic, ya suhtic tal ta atojol soc ya sc'oponat tey ta sq'uinal te mach'atic ic'otic bahel ta chuquel yu'un, teme hich ya yalic: La jta jmulcotic, la jpascotic te bin chopol, ma lecuc te bin la jpascotic, teme xchihique,

⁴⁸ teme ya suhtes yo'tanic ta atojol ta spisil yo'tanic soc ta spisil sch'uhlelic tey ta sq'uinal te scontrahic te ic'otic bahel ta chuquel yu'un, teme ya sc'oponat tal ta stojol te q'uinal la awa'be te sme'static, ta stojol te pueblo te tsahbil awu'un soc te Na la jpasbat yu'un te abihile,

⁴⁹ a'iybeya c'alal ta ch'ulchan ta lugar te banti nahinemat te sc'opic soc te yalel wocol, soc pasbeya te bin stojil ya sc'an pasele.

⁵⁰ Soc pasbeya perdón te pueblo awu'un te la sta smul ta atojol, soc spisil te sc'axun mandar te la stoy sbahic ta atojol, ac'a ta c'uxultayel yu'un te mach'atic ic'otic bahel ta chuquel yu'un;

⁵¹ como ha pueblo awu'un soc ay ta acuenta te yac awich', te la aloq'ues tal ta Egipto, ta yohlil te horno yu'un yuhltesel taq'uin c'ohem.

⁵² Jamaluc me asit ta yilel te bin ya sc'ambat te a'bat awu'un soc te bin ya yalbat wocol yu'un te pueblo Israel awu'un, yu'un yac awa'iybe spisil te bin ya sc'ambat,

⁵³ como ha'at parte la awac' ta yohlil spisil te pueblohetic ta bahlumilal yu'un ha'at awu'un ya xc'oht, hich te bin ut'il la awal ta scuenta te awa'bat Moisés te c'alal la awic' loq'uel tal te jme'jtatcotic ta Egipto, Cajwal Jehová, xchi ta sc'oponel Dios te Salomón.

⁵⁴ Te c'alal laj yo'tan te Salomón ta sc'oponel Jehová soc ta yalbeyel wocol, hahch ta stojol te scajtajib ta chiq'uel mahtanil te banti squejanej sba soc shachoj sc'ab ta stojol ch'ulchan.

⁵⁵ La stehc'an sba, la ya'be bendición spisil te pueblo Israel, hich tulan la yal:

⁵⁶ ¡Bayel me yutsil te Jehová te la yac' lahmajuc q'uinal ta stojol te pueblo Israel yu'un, hich te bin ut'il yaloj! Mayuc ch'ay jp'ahluc yu'un spisil te bin yaloj ta scuenta te ya'bat Moisés.

⁵⁷ Ac'a sjoquinat te Jehová te Dios cu'untic, hich te bin ut'il la sjoquin te jme'jtatique. Ma me spihtesotic soc ma me xyihquitayotic.

⁵⁸ Ac'a me cac' co'tantic ta stojol scuenta yu'un ya jt'untic bahel te behetic yu'un soc ya jch'uhumbetic te mandariletic soc spisil te bintic yaloj ta mandar te la yalbe te jme'jtatique.

⁵⁹ Te bin la jcalix ta stojol Jehová ayuc me ta stojol te Jehová te Dios cu'untic ta c'ahc'al ahc'abal, scuenta yu'un ya scoltay te a'bat yu'un soc te pueblo Israel yu'un, ha chican te bin ya sc'an ta jujuntic c'ahc'al,

⁶⁰ scuenta yu'un spisil te pueblohetic ta bahlumilal ya me sna'ic te ha Dios te Jehová, te mayuc yan.

⁶¹ Tojuc me awo'tanic ta stojol Jehová te Dios cu'untic, ha te yac at'unic te bintic yaloj soc te yac ach'uhunic spasel te mandariletic yu'un, hich te bin ut'il ta ora ini, xchi.

⁶² Hich te ajwalil soc spisil Israel la yaq'uic milbil mahtaniletic ta stojol Jehová.

⁶³ Te Salomón la yac' milbil mahtaniletic scuenta lamal q'uinal ta stojol Jehová cha'pic soc ho'lajunbahc' (22,000) ta coht torohetic soc ho'lajunpic (120,000) ta coht tuminchijetic. Hich te ajwalil soc spisil te snich'nab Israel la yaq'uic ta stojol Dios te na yu'un Jehová.

⁶⁴ Ha nix ta yorahil a, te ajwalil la sch'ultes te yohlil te amac' te ay ta stojol te sna Jehová, yu'un tey la ya'be a te scohtol chic'bil mahtaniletic soc te mahtanil harina soc te sjuhp'el te mahtanil scuenta lamal q'uinal, como tut te scajtajib smahtan Dios pasbil ta bronce te ay ta stojol Jehová, ma ba och tey a spisil te scohtol chic'bil mahtaniletic, te mahtaniletic harina soc te sjuhp'el te mahtaniletic scuenta lamal q'uinal.

⁶⁵ Ta hich ora te Salomón la spas q'uin soc spisil Israel, mero bayel talemic c'alal ta yochibal Hamat ha to ta uc'um yu'un Egipto, la spasic q'uin ta stojol Jehová te Dios cu'untic scuenta huqueb c'ahc'al, soc huqueb xan c'ahc'al, ha chanlajuneb (14) c'ahc'al te q'uine.

⁶⁶ Ta yan c'ahc'al la sticon bahel te pueblo. La ya'beyic hilel bendición te ajwalil, hich tse'el yo'tanic bahtic ta snahic, bayel yutsil yo'tanic yu'un spisil te bintic lec pasbot yu'un Jehová te David te a'bat yu'un, soc te pueblo Israel yu'une.