1 Reyes 6 - Bible in Tzeltal Bachajón

Salomón ya spas templo

¹ Ayix jbahc' soc chanwinic (480) ha'bil sloq'uelic tal ta Egipto a te snich'nab Israel, ta schanebal ha'bil soc cheb u yochel ta ajwalil yu'un Israel a te Salomón, ha te u Ziv, te Salomón hahch ta spasel te Na yu'un Jehová.

² Te Na te la spasbe Jehová te ajwalil Salomón ha oxwinic (60) xuhc'ubil snahtil, jtahb (20) xuhc'ubil sjamalil, soc lajuneb scha'winic (30) xuhc'ubil stoyolil.

³ Te jtsahl ta yochibal te templo, ha jtahb (20) xuhc'ubil snahtil, pajal soc te sjamalil te templo, soc lajuneb xuhc'ubil xuhc.

⁴ Soc la spasbe sventanahul te muc' stahn te yutil soc jay stahn ta spat.

⁵ La spas yan na ta spat ta sjoyobal te sts'ahcul te ch'ul awilal soc te mero ch'ul awilal, tsahlatsahl ta sjoyobal.

⁶ Te jcaj ay ta ye'tal ha ho'eb xuhc'ubil sjamalil; te scha'cajal ha waqueb xuhc'ubil sjamalil; te yoxcajal ha huqueb xuhc'ubil sjamalil; como tutub mohel te ts'ahc ta sjoyobal te templo scuenta yu'un hich ma ba la yich' ts'apel ochel sni'il sts'amte'el ta sts'ahcul te templohe.

⁷ C'alal la yich' pasel te templo, la yich' pasel ta tonetic te walubilix a te la yich'ic tale, hich ma ba chicnaj sc'ojc'on martillo o echej o yantic xan a'tejibal-taq'uinetic.

⁸ Te spuertahul te jcaj te ay ta ye'tal ay ta jehch ta wa'el yu'un te templo. Te mohel bahel ta scha'cajal soc ta yoxcajal, ay jun mohibal hich te bin ut'il puy.

⁹ Hich hu' spasbel te templo; la smac ta sts'amte'el soc tablahetic yu'un cedro.

¹⁰ Soc la spas te cajalcaj ta sjoyobal te templo te ha ho'eb xuhc'ubil stoyolil jujucaj, soc stsacoj sba soc te templo ta sts'amte'el ta cedro.

¹¹ Te Jehová la sc'opon te Salomón, hich la yalbe:

¹² Te Na te yacat ta spasel, teme yac at'un te chahpambil mandariletic cu'un, teme yac apas te bin caloj ta mandar, soc teme yac acanantay spisil te mandariletic cu'un te tey ya xbehenat a, ya cac' c'ohtuc ta pasel ta acuenta te bin la jchap soc David, te atate.

¹³ Ya xnahinon ta yohlil te snich'nab Israel soc ma ba ya jpihtes te pueblo Israel cu'un, xchi.

¹⁴ Hich te Salomón hu' spasbel te templo.

¹⁵ La smacbe ta tabla yu'un cedro te spahc'ul ta yutil, c'alal ta ye'tal c'alal ta smuhquil; soc la smac te piso ta tablahetic ta ciprés.

¹⁶ Soc ta slajibal yutil te templo la spas stsahlul na te ha jtahb (20) xuhc'ubil snahtil, la smac ta tabla yu'un cedro c'alal ta ye'tal c'alal ta toyol. Hich la spas tey a te Mero Ch'ul Awilal.

¹⁷ Te sba tsahlul te templo ha cha'winic xuhc'ubil (40) snahtil.

¹⁸ La smac ta cedro te spahc'ul te templo, ch'albil ta sloc'omba ch'umetic soc nichimetic. Spisil puro cedro, mayuc chican ta ilel te tone.

¹⁹ La schahpan te Mero Ch'ul Awilal ta yutil te templo scuenta yu'un ya yac' tey a te scaxahul te chapbil-c'op yu'un Jehová.

²⁰ Te yutil te Mero Ch'ul Awilal, jtahb (20) xuhc'ubil snahtil, jtahb (20) xuhc'ubil sjamalil, soc jtahb (20) xuhc'ubil stoyolil. La spots ta lequil oro, soc la spots ta oro te scajtajib ta chiq'uel pom pasbil ta cedro.

²¹ Te Salomón la spots ta puro oro te yutil te templo soc la yac'ticlan cadenahetic pasbil ta oro ta yochibal.

²² Hich la spots ta oro spisil te yutil te templo, soc la spots ta oro te scajtajib chic'ojibal pom te ay ta stojol te Mero Ch'ul Awilal.

²³ Soc ta olivo-te' la spas sloc'ombahil cheb querubinetic ta Mero Ch'ul Awilal. Te jujune ha lajuneb xuhc'ubil stoyolil.

²⁴ Te jujun xic' ha ho'eb xuhc'ubil snahtil. Ha yu'un tey ta jun sni'il xic' c'alal ta yan sni'il xic', lajuneb xuhc'ubil yiloj sba te jujun xic'.

²⁵ Ha nix hich te yan querubín ha ho'eb xuhc'ubil stoyolil; como ta schebal te querubinetic pajal smuc'ulic soc pajalic ta pasel.

²⁶ Te stoyolil schebalic ha ho'eb xuhc'ubil.

²⁷ La yac'ticlan te querubinetic ta yutil te Mero Ch'ul Awilal, slich'oj xiq'uic schebalic; stahoj pahc' ta jehch ta jehch te xiq'uic, te yan schebal xiq'uic stahoj sbahic ta ohlil yu'un te Na.

²⁸ La spots ta oro te querubinetic.

²⁹ Ta spisil sts'ahcul te Na ta yutil soc ta fuera la spasticlambe sloc'ombahil querubinetic, xahnetic soc nichimetic.

³⁰ Soc la spots ta oro te piso ta scha'tsahlal te Nahe.

³¹ Ta yochibal te Mero Ch'ul Awilal la spasbe spuertahul ta olivo, te smarcohil soc te oyetic yu'un ay ho'eb xuhc.

³² Ta schebal te puertahetic pasbilic ta olivo; la spasticlambe sloc'ombahil querubinetic, xahnetic soc nichimetic, soc la spots ta oro; soc la spots ta oro te querubinetic soc te xahnetic.

³³ Ta yochibal te templo la spas oyetic ta olivo te chanxuhc ay.

³⁴ Ta schebal te puertahetic pasbilic ta ciprés, te scha'pehchel te puerta ya sjam sba, soc te scha'pehchel te yan puerta ya sjam sba.

³⁵ La spasbe sloc'ombahil querubinetic, xahnetic soc nichimetic, soc la yich' limbeyel oro.

³⁶ Soc te sts'ahcul amac' te ay ta yutil la spas ta oxchohl walubil tonetic soc jchohl ts'amte'etic yu'un cedro.

³⁷ Ta schanebal ha'bil, ta u Ziv, la yich' hahchbeyel sts'ahcul te sna Jehová.

³⁸ Ta sbuluchebal (11) ha'bil, ta u Bul, ha te swaxaquebal u, hu' ta pasel te Na soc bintic ay tey a, hich te bin ut'il chapal ta pasel. Huqueb ha'bil la spas te templo.