1 Reyes 4 - Bible in Tzeltal Bachajón

¹ Te Salomón ha ajwalil ta spisil Israel.

² Hich ay te mach'atic ay ya'telic yu'un: Azarías snich'an sacerdote Sadoc;

³ Elihoref soc Ahías, snich'nab Sisa, ha secretariohetic; Josafat snich'an Ahilud, ha jts'ihbajel;

⁴ Benaía snich'an Joiada, ha jtsobaw yu'un te soldadohetic; Sadoc soc Abiatar, ha sacerdotehetic;

⁵ Azarías snich'an Natán, ha scuentahinwanej gobernadoretic; Zabud snich'an Natán, ha sacerdote soc yamigo te ajwalil;

⁶ Ahisar, ha mayordomo ta sna ajwalil; Adoniram snich'an Abda, ha scuentahinej te sujaw ta a'tel.

⁷ Te Salomón ay lahchaytuhl gobernadoretic ta stojol spisil Israel. Ha ya'telic te la stsobeyic tal spisil bintic tuhun yu'un soc mach'atic ay yu'un te ajwalile. Ta tuhlultuhl ta jujun u la scuentahinic stsobeyel tal te bintic tuhun yu'un te ajwalil, hich ay ta sjunal ha'bil.

⁸ Te lahchaytuhl gobernadoretic, hich ay te sbihilique: Ben-Hur, ta switsul Efraín;

⁹ Ben-Decar, ta Macaz, Saalbim, Bet-semes, Elón soc ta Bet-hanán;

¹⁰ Ben-Hesed, ta Arubot, soc ha nix hich ta Soco soc ta spisil sq'uinal Hefer;

¹¹ Ben-Abinadab, ta spahmal sq'uinal Dor; te yihnam ha Tafat, yantsil-nich'an Salomón.

¹² Baana snich'an Ahilud, ta Taanac, Meguido, soc spisil Bet-seán te slac'oj sba soc Saretán ta ye'tal xan yu'un Jezreel, c'alal Bet-seán ha to ta Abel-mehola, c'alal ta jehch Jocmeam;

¹³ Ben-Geber, ta Ramot yu'un Galaad, ha te pueblohetic yu'un Jair snich'an Manasés te ayic ta Galaad; soc te sq'uinal Argob te ay ta Basán, te banti ay oxwinic (60) muc'ul pueblohetic te ay sjoyob ts'ahcul soc te ay spuertahul te yich'oj sc'atal-te'el pasbilic ta bronce;

¹⁴ Ahinadab snich'an Ido, ta Mahanaim;

¹⁵ Ahimaas, ta Neftalí; ha yic'oj Basemat, yantsil-nich'an Salomón;

¹⁶ Baana snich'an Husai, ta Aser soc Alot;

¹⁷ Josafat snich'an Parúa, ta Isacar;

¹⁸ Simei snich'an Ela, ta Benjamín;

¹⁹ Geber snich'an Uri, ta Galaad, ha te sq'uinal Sehón, ajwalil yu'un te amorreohetic, soc te Og, ajwalil yu'un Basán. Ha nax gobernador stuquel ta q'uinal ini.

²⁰ Te Judá soc Israel mero bayelic, hich te bin ut'il hi' ta ti'mar. Yacalic ta we'el uch'el, soc mero tse'el yo'tanic.

²¹ Te Salomón la scuentahin spisil te yantic nacionetic c'alal ta muc'ul-ha' Éufrates ha to ta sq'uinal filisteohetic soc ta sti'il sq'uinal Egipto. La yich'beyic tal mahtaniletic soc la yac' sbahic ta a'batinel yu'un Salomón te jayeb c'ahc'al cuxule.

²² Te swe'el yuch'el Salomón ta jujun c'ahc'al ha lajuneb scha'winic (30) coro lequil harina, yoxwinic (60) coro harina,

²³ lajuncoht juhp'en torohetic, jtahb (20) ta coht torohetic colem ta aquiltic, soc ho'winic (100) ta coht tuminchijetic. Ma ba ahtaybil te chijetic, gacela-chijetic, corzo-chijetic soc juhp'en mutetic.

²⁴ Como ha scuentahinej te q'uinal ta stojol smahlib c'ahc'al yu'un Éufrates, c'alal Tifsa ha to ta Gaza, spisil te ajwaliletic te ayic ta stojol smahlib c'ahc'al yu'un Éufrates; lamal q'uinal ta sjoyobal.

²⁵ Te Judá soc Israel jun yo'tan nahinic, jujutuhl ta ye'tal sts'usubetic soc te higuera-te' yu'unic, c'alal Dan ha to ta Beerseba, te jayeb c'ahc'al cuxul te Salomón.

²⁶ Te Salomón ay ho'pic (40,000) ta coht cawuhetic ta yawilic yu'un ya sjochic carretahetic, soc ay j'ohlil scha'pic (12,000) ta tuhl soldadohetic te ya xmohic ta cawu ta guerra.

²⁷ Te gobernadoretic ini ya ya'be bin ya xtuhun yu'un te ajwalil Salomón soc spisil te mach'atic ya xwe'ic soc, jujutuhl ta jujun u. La spasic te mayuc bin ya xpasot falta yu'une.

²⁸ Soc la yich'ic tal cebada soc ac yu'un te cawuhetic soc te yantic cawuhetic yu'un ihc'atsijel, chican te banti lugaril ya xhalbot; hich xmelmon la spasic ta tuhlultuhl.

²⁹ Dios la ya'be bayel sp'ijil te Salomón soc bayel snopojibal yu'un, soc te c'ax bayel bintic ya sna' hich yipal te bin ut'il hi' ay ta ti'mar.

³⁰ C'ax hich sp'ijil yo'tan Salomón a te bin ut'il te mach'atic ayic ta stojol sloq'uib c'ahc'al soc spisil te sp'ijilic te egipciohetique.

³¹ C'ax hich sp'ijil yo'tan a te bin ut'il spisil yantic winiquetic; c'ax hich te bin ut'il Etán te ezra-winic, te Hemán, Calcol soc Darda snich'nab Mahol. Nabot sba ta yantic nacionetic ta sjoyobal.

³² La spas j'ohlil swaxacbahc' (3,000) tsahbil p'ijil c'opetic soc lajunwinic yoxbahc' soc ho'eb (1,005) c'ayojetic.

³³ Soc la yalbe sc'oblal te'etic, c'alal ta cedro-te' ta Líbano ha to ta hisopo-te' ya xcol ta ts'ahc. Soc la yalbe sc'oblal chambahlametic, mutetic, chambahlametic te staslajan ta lum, soc chayetic.

³⁴ Talic ta ya'iybeyel sp'ijil Salomón ta spisil nacionetic soc ajwaliletic ta q'uinal, te ban c'alal c'ohem ta a'iyel te sp'ijil yo'tane.