1 Reyes 21 - Bible in Tzeltal Bachajón

Acab soc sts'usubil Nabot

¹ Ta patil bahel, te Nabot te talem ta Jezreel ay sts'usubil ta nopol sna Acab ajwalil yu'un Samaria.

² Te Acab hich la yalbe te Nabot: A'bon ats'usubil yu'un yawil ts'unubil cu'un, como nopol ay ta jna. Ya ca'bat sjelol yan ts'usubil te c'ax hich yutsil a, o teme yac ac'ane, ya jmambat, xchi.

³ Pero te Nabot la sjac'be te Acab: Ma hichuc ya sc'an Jehová te ya ca'bat te bin ya'beyejon hilel jme'jtat, xchi.

⁴ Te Acab baht ta sna, smeloj yo'tan a soc ilinem yu'un te hich halbot yu'un Nabot talem ta Jezreel: Ma ba ya ca'bat te bin a'bibilon hilel yu'un jme'jtat, te xchihe. La smehtsan sba ta swayib, la sut bahel sit ta pahc', ma ba we'.

⁵ Tal te Jezabel te yihnam, hich la yalbe: ¿Bin yu'un te ameloj awo'tan soc ma xac'an ya xwe'at? xchi.

⁶ La sjac': Como la jc'opon te Nabot ta Jezreel, la jcalbe te yacuc schombon te sts'usubil, o teme ya sc'an, ya jelbe ta yan ts'usubil, pero la yal: Ma ba ya ca'bat te ts'usubil cu'un, xchi.

⁷ Te Jezabel te yihnam la yalbe: ¿Ma bal ha'ucat ajwalilat yu'un Israel? Hahchan, we'an, tse'eluc me awo'tan. Ho'on ya ca'bat te sts'usubil Nabot ta Jezreel, xchi.

⁸ Ha yu'un te Jezabel la spas cartahetic ta scuenta sbihil Acab, la ya'be te sello yu'un, la sticombe te mamaletic soc te príncipaletic te nahinemic ta pueblo yu'un Nabot.

⁹ Hich la yal te cartahetic te la sts'ihbay: Halahic te ya me yich' comel we'elil, soc huhcanahic te Nabot ta stojol te pueblo.

¹⁰ Ac'a cha'tuhl chopol winiquetic ta stojol te hich ya yalic ta testigo ta scontrahinel: Ha'at la awixta'c'optay Dios soc te ajwalil, xchihic. Hich yac aloq'uesic te Nabot, yac amilic ta ch'ojel ta ton, xchi.

¹¹ Te winiquetic yu'un te pueblo, te mamaletic soc te príncipaletic te nahinemic tey a la spasic te bin halbotic yu'un Jezabel, hich te bin ut'il ts'ihbabil ta cartahetic ticombotic yu'une.

¹² La yalic te ya me yich' comel we'elil, la shuhcanic te Nabot ta stojol te pueblo.

¹³ Talic cha'tuhl chopol winiquetic, la shuhcan sbahic ta stojol. La yalic testigo c'op ta scontra Nabot ta stojol te pueblo, hich la yalic: Te Nabot la yixta'c'optay Dios soc te ajwalil, xchihic. Hich la sloq'uesic bahel ta ti'pueblo, tey c'oht smilic ta ch'ojel ta ton a.

¹⁴ Patil la sticonic ta halbeyel te Jezabel: La yich'ix milel ta ch'ojel ta ton te Nabot, xchihic.

¹⁵ Te c'alal la ya'iy te Jezabel te lajix ta ch'ojel ta ton te Nabot, hich la yalbe te Acab: Hahchan, ich'beya te sts'usubil Nabot ta Jezreel, te ma ba la sc'an la schombat, como te Nabot ma ba cuxulix, lajemix, xchi.

¹⁶ C'alal la ya'iy Acab te lajix te Nabot, co bahel, baht yich'be te sts'usubil Nabot ta Jezreel.

¹⁷ Ha yu'un c'oponot yu'un Jehová te Elías te tisbe-winic, hich la yalbe:

¹⁸ Hahchan, cohan bahel ta stahel te Acab ajwalil yu'un Israel te ay ta Samaria. Ayix ta sts'usubil Nabot, cohemix bahel ta yich'el.

¹⁹ Hich me yac awalbe: Hich ya yal te Jehová: ¿Ma bal lajuc awa'iy milaw soc la apojbe sq'uinal? xchihat. Soc hich yac awalbe xan: Hich ya yal te Jehová: Ta banti lugar te lec'bot sch'ich'el Nabot yu'un ts'i'etic, tey nix ya slec'bat ach'ich'el a te ts'i'etique, xchi.

²⁰ Te Acab la yalbe te Elías: ¿La bal atahonix, jcontrahat? xchi. La yal te Elías: La jtahat, como la awac' aba ta spasel te bin chopol ta stojol Jehová.

²¹ Ya cac' taluc wocol ta atojol, ya jtup'bat te patil al-nich'anetic awu'un, jc'axel me ya jlajin spisil sts'umbal Acab, teme a'bat o mach'a libre ay ta Israel.

²² Hich ya jpasbe te ana te bin ut'il te sna Jeroboam snich'an Nabat, soc hich te bin ut'il te sna Baasa snich'an Ahías, ta scaj atoybahil te la yac' ilinucon soc te la ya'be sta smul a te Israel, xchi te Jehová.

²³ Soc te Jezabel hich halbot sc'oblal yu'un te Jehová: Ya xlaj ta ti'el ta ts'i'etic te Jezabel ta sts'ahcul Jezreel, xchi.

²⁴ Te mach'atic ay yu'un Acab te ya xlajic ta pueblo, ya xlajic ta ti'el ta ts'i'etic; teme ya xlajic ta aquiltic, ya xti'otic ta mutetic te ya xwihlic ta toyol, xchi.

²⁵ (Ta melel mayuc mach'a yan hich te bin ut'il Acab te la yac' sba ta spasel te bin chopol ta stojol Jehová, como ha jucot yu'un te Jezabel te yihname.

²⁶ Mero ihlaybil, la sch'uhun loc'ombahetic hich te bin ut'il la spasic te amorreohetic te loq'uesotic yu'un Jehová ta stojol te snich'nab Israel.)

²⁷ C'alal hich la ya'iy te Acab, la sch'i' sc'u' yu'un, la slap ch'ixal pac' soc la scom swe'el. Way ta ch'ixal pac' soc pehc'aj yu'un.

²⁸ Ha yu'un c'oponot yu'un Jehová te Elías te tisbe-winic, hich la yal:

²⁹ ¿La bal awilix te Acab te la spehc'anix sba ta jtojol? Te bin ut'il bic'tajix ta jtojol, ma ba ya cac' taluc wocol te jayeb c'ahc'al cuxul, ha to ya xc'oht ta scuenta te snich'ane, xchi.