1 Reyes 20 - Bible in Tzeltal Bachajón

Acab la stsal siriahetic

¹ Te Ben-adad ajwalil yu'un Siria la stsob spisil te soldadohetic yu'un, soc joquinot yu'un lahchayeb scha'winic (32) ajwaliletic soc cawuhetic soc carretahetic yu'unic. Mohic bahel ta Samaria, la sjoytayic ta ya'beyel guerra.

² La sticonlan bahel a'batetic yu'un ta Samaria ta stojol Acab ajwalil yu'un Israel, hich c'oht yalbeyic:

³ Hich yaloj te Ben-adad: Te plata soc oro, te antsetic soc te t'ujbil anich'nab ho'on cu'unix, xchihic.

⁴ Te ajwalil yu'un Israel hich la yal: Hich te bin ut'il la awal, ajwalil cu'un, ho'on awu'unon soc spisil te bintic ay cu'un, xchi.

⁵ Suhtic tal yan buelta te a'batetic yu'un, hich la yalic: Hich la yal te Ben-adad: La jticombatix ta halbeyel: Ya me awa'bon te plata soc oro, te antsetic soc te anich'nabe.

⁶ Soc xan te pajel ta hichilan ora, ya me jticon tal a'batetic cu'un ta stsahtayel te ana soc te sna te a'batetic awu'un; spisil te bintic mulambil te ay awu'un ya me yich'ic tal, xchihic.

⁷ Ha yu'un te ajwalil yu'un Israel la sticon ta iq'uel tal spisil te mamaletic yu'un te q'uinal, hich la yalbe: Na'ahic soc ilawilic bin ut'il yac slehbel te ya x'uts'inwan. La sticon tal ta iq'uel bahel te antsetic cu'un, te jnich'nab, soc te plata soc oro cu'un, ma ba la jmucbe ta co'tan, xchi.

⁸ Spisil te mamaletic soc spisil te pueblo la sjaq'uic: Ma xawa'iybe sc'op, ma me xapas te bin ya sc'ambat, xchihic.

⁹ Ha yu'un la sjac'be te a'batetic ticombilic tal yu'un te Ben-adad: Halbeya te ajwalil cu'un: Ya jpas spisil te bin la awalbon ta shahchibal, pero ma xhu' ya jpasix ini, xchi. Hich bahtic te a'batetic, la yalbeyic ya'iy te suhtib sc'ope.

¹⁰ Te Ben-adad la sticombe xan ta halbeyel: Ac'a ya'bon tulan castigo te diosetic, teme tic' ya xhil a te sts'ubil Samaria te ya yich'ic johpuc jujutuhl te st'unojonic, xchi.

¹¹ La sjac' te ajwalil yu'un Israel: Halbeya: Te mach'a ya xchuc ya'tejib yu'un guerra ma me hichuc ya stoy sba te bin ut'il mach'a ya schol loq'uel ya'tejib yu'un guerra, xchi.

¹² Te c'alal la ya'iy te c'op ini te Ben-adad, yac ta uch'el a soc te ajwaliletic ta snahilpaq'uic, hich la yalbe te a'batetic yu'un: ¡Chahpana abahic ta guerra! xchi. Hich la schahpan sbahic ta ya'beyel guerra te Samaria.

¹³ Ta hich ora tal jtuhl jalwanej ta stojol Acab ajwalil yu'un Israel, hich la yal: Hich ya yal te Jehová: ¿Awiloj bal te c'ax bayelic? Ho'on ya ca'bat ta ac'ab yo'tic, scuenta yu'un hich me yac ana' a te ho'on te Jehovahon, xchi.

¹⁴ ¿Mach'a ta scuenta te hich ya spas? xchi te Acab. Hich ya yal te Jehová: Ta scuenta sc'abic te a'batetic yu'un te príncipaletic yu'un te jujuchahp q'uinal, xchi te jalwanej. ¿Mach'a nahil ya shach te guerra? xchi te Acab. Ha'at, xchi te jalwanej.

¹⁵ Ha yu'un te Acab la yahtay te a'batetic yu'un te príncipaletic ta jujuchahp q'uinal, loc' lahchayeb slahchaywinic (232) ta tuhl. Patil la yahtay spisil Israel, ay j'ohlil swaxaclajunbahc' (7,000) ta tuhl.

¹⁶ Loq'uic bahel ta ohlil c'ahc'al, te c'alal jun yo'tan yacalic ta yacubel ta snahilpaq'uic a te Ben-adad soc te lahchayeb scha'winic (32) ajwaliletic sjoquinej.

¹⁷ Ha nahil loq'uic bahel te a'batetic yu'un te príncipaletic yu'un te jujuchahp q'uinal. Te Ben-adad sticonejix bahel a te mach'a baht tsahtay yil, hich halbot yu'un: Loq'uemix tal winiquetic ta Samaria, xchihic.

¹⁸ Ha yu'un la yal: Teme loq'uemic tal yu'un lamal q'uinal, cuxul me xawiq'uic tal; ha nix hich teme loq'uemic tal ta guerra, cuxul me xawiq'uic tal, xchi.

¹⁹ Loq'uemiquix hahchel ta pueblo a te a'batetic yu'un te príncipaletic yu'un te jujuchahp q'uinal, t'umbilic yu'un te soldadohetique.

²⁰ Ta tuhlultuhl la smil te scontrahic. Te siriahetic loq'uic ta ahnel, nutsotic bahel yu'un Israel. Te Ben-adad ajwalil yu'un Siria, loc' ta ahnel ta cawu soc yantic soldadohetic te cajajtic ta cawu.

²¹ Loc' bahel te ajwalil yu'un Israel, la stsal te soldadohetic te cajajtic ta cawu soc ta carretahetic, la smilticlan bayel te siriahetique.

²² Patil te jalwanej tal ta stojol te ajwalil yu'un Israel, hich la yalbe: Bahan, ich'a xan awip, nopa awa'iy soc ilawil bin xan ya sc'an yac apas, como ta yan ha'bil ya me xcha'tal scontrahinat te ajwalil yu'un Siria, xchi.

²³ Te a'batetic yu'un te ajwalil ta Siria, hich la yalbe: Te diosetic yu'unic ha diosetic yu'un te witsiltic, ha yu'un te la stsalotic. Pero teme ya ca'betic guerra ta spamlej, ya me jtsaltic.

²⁴ Hich me xapas: Loq'ueslambeya ya'telic te ajwaliletic, otsesa capitanetic ta sjelolic.

²⁵ Soc ya me ale xan hich yipal soldadohetic te bin ut'il te ch'ayemiquix hilel awu'un, soc leha sjelol jujun cawu soc jujun carreta. Hich ya ca'betic guerra ta spamlej, ya quiltic teme ma ba ya jtsaltic, xchihic. Te ajwalil la ya'iybe sc'opic, hich la spas.

²⁶ C'alal c'ax jun ha'bil, te Ben-adad la stsob te siriahetic, baht ta Afec ta ya'beyel guerra te Israel.

²⁷ Hich nix te snich'nab Israel la yich'ic stsobel, a'botic bintic ya xtuhun yu'unic, baht sta sbahic soc. La spas scampamentohic ta stojol te siriahetic, hich yilelic te bin ut'il cha'tsohb tentsunetic, yan te siriahetic la snojesic te q'uinale.

²⁸ Tal te winic yu'un Dios ta stojol te ajwalil yu'un Israel, hich la yalbe: Hich ya yal te Jehová: Te bin ut'il hich la yalic te siriahetic: Te Jehová ha Dios yu'un witsiltic, ma Diosuc yu'un spamlejtic, te xchihique, ha yu'un ya ca'bat ta ac'ab spisil te hich yipalic, scuenta yu'un hich yac ana' a te ho'on Jehovahon, xchi.

²⁹ Huqueb c'ahc'al snuhp'usitayej sbahic te campamentohetic yu'unic, ta shuquebal c'ahc'al hahch guerra yu'unic. Ta junax c'ahc'al te snich'nab Israel la smilic j'ohlil yoxlajunpic (100,000) soldadohetic yu'un Siria te ay ta behel ta yoquique.

³⁰ Te yantique ahnic bahel ta pueblo Afec; pero jihn cohel te sts'ahcul, oxpic soc j'ohlil swaxacbahc' (27,000) winiquetic lajic yu'un. Ha nix hich te Ben-adad loc' tal ta ahnel ta pueblo, la snac' sba ta yutil na.

³¹ Ha yu'un te a'batetic yu'un hich la yalbeyic: Ca'iybeyejtic sc'oblal te ajwaliletic yu'un Israel te ay sc'uxul yo'tanic. Ha yu'un ya me jchuctic ch'ixal pac' ta jch'uhtic soc lazo ta jnuc'tic, ya xbohotic ta stojol te ajwalil yu'un Israel, teme repente ya yac' xcuxajat, xchihic.

³² Hich la schuc ch'ixal pac' ta sch'uhtic soc la xoj lazo ta snuq'uic, bahtic ta stojol te ajwalil yu'un Israel, hich c'oht yalbeyic: Te awa'bat Ben-adad hich ya yal: Awocoluc, ac'a cuxajucon, xchihic. La sjac' te Acab: ¿Cuxul to bal? Ha hermano cu'un, xchi.

³³ Te winiquetic mero lequil seña la ya'iyic te bin la yal, ha yu'un ora la sjac'beyic te sc'op: Te awermano Ben-adad cuxul, xchihic. Bahanic, ic'ahic tal, xchi te Acab. Ha yu'un te Ben-adad baht stehc'an sba ta stojol te Acab, ha la yic' mohel ta scarreta.

³⁴ Hich la yal te Ben-adad: Ya jsuhtesbat te pueblohetic te pojbot yu'un jtat te atate, soc ya xhu' yac awa'iy mambajel chombajel ta Damasco, hich te bin ut'il la spas ta Samaria te jtate, xchi. Ya jchahp jc'optic, hich ya cac'at bahel a, xchi te Acab. Hich la schap sc'opic, la yac' suhtel.

³⁵ Pero ay jtuhl winic te ha smohlol te jchahp jalwanejetic, hich la yalbe te smohlol ta scuenta smandar Jehová: Awocoluc, ehchentesawon, xchi. Pero te yane ma ba la sc'an la yehchentes.

³⁶ Ha yu'un hich halbot yu'un te jalwanej: Te bin ut'il ma ba la ach'uhumbe te sc'op Jehová, te c'alal ya xhahchat bahel li'i ya me smilat choj, xchi. Hich te c'alal loc' bahel ta stojol te jalwanej, tahot yu'un choj, milot yu'un.

³⁷ Patil te jalwanej la sta xan sba soc yan winic, hich la yalbe: Awocoluc, ehchentesawon, xchi. Te winic la smaj, ehchenaj yu'un.

³⁸ Hich te jalwanej baht smahliy ta be te ajwalil. Syanijtesej sba a, ha smacoj sit ta pohtsil-ehchen.

³⁹ Te c'alal yac ta c'axel a te ajwalil, hich la yawtay te ajwalil: Te a'bat awu'un baht ta yohlil te guerra, tal jtuhl soldado, la yic' tal jtuhl jchuquel, hich la yalbon: Canantaya ha winic ini, teme loc' ta ahnel, ha me ya sjelolin acuxlejal te scuxlejale, o yac' atoj jun talento plata.

⁴⁰ Pero te c'alal ay bin yac ta spasel a te a'bat awu'un, loc' ta ahnel te winique, xchi. Te ajwalil yu'un Israel hich la yalbe: Ha'at nix la awal te bin a te castigo awu'un, xchi.

⁴¹ Pero ora la sloq'ues te pohtsil-ehchen macal sit a. Te ajwalil la sna' te ha jtuhl jalwanej.

⁴² Te jalwanej hich la yal: Hich ya yal te Jehová: Te bin ut'il la acoltay bahel te winic te ho'on calojix te ya xlaje, ha'at me ya xlajatix ta scuenta, soc te pueblo awu'un ya me xlaj ta scuenta te pueblo yu'une, xchi te Jehová, xchi.

⁴³ Te ajwalil yu'un Israel yac ta mel-o'tan soc ilinem a baht ta sna ta Samaria.