Biblia Todo Logo
Bìoball air-loidhne

- Sanasan -

1 Reyes 15 - Bible in Tzeltal Bachajón


Ya'tel Abiam ta ajwalil yu'un Judá

1 Ta swaxaclajunebal (18) ha'bil yochel ta ajwalil a te Jeroboam snich'an Nabat, och ta ajwalil yu'un Judá te Abiam.

2 Oxeb ha'bil ay ta ajwalil ta Jerusalén. Maaca sbihil te snan, ha yantsil-nich'an Abisalom.

3 Ha nix la spas te bin muliletic la spas te stat ta nahil to, ma ba jun yo'tan ta stojol Jehová te Dios yu'un, ma hichuc te bin ut'il te yo'tan David te state.

4 Pero ta scuenta sc'uxul yo'tan ta stojol David, te Jehová te Dios yu'un la ya'be hilel tsumbil c'ahc' ta Jerusalén, ha te ya yac' ta sjelol te snich'an soc ya ya'be yip te Jerusalén;

5 como te David la spas te bintic toj ta stojol Jehová, soc mayuc bin ma ba la spas te bintic halbot yu'un Dios te jayeb c'ahc'al cuxul, ha nax te bin la spasbe te Urías te heteo-winique.

6 La ya'be sbahic guerra te Roboam soc te Jeroboam te jayeb c'ahc'al cuxulic.

7 Te bintic xan sc'oblal te Abiam soc te bintic la spas, ha ts'ihbabil ta libro yu'un te ya'tel ajwaliletic yu'un Judá. Soc la ya'be sbahic guerra te Abiam soc te Jeroboam.

8 Cham te Abiam, baht sjoquin ta muquenal te chawinic sme'stat, la yich' muquel ta Pueblo yu'un David. Ha la sjelolin ta ajwalil te Asa te snich'ane.


Ya'tel Asa ta ajwalil yu'un Judá

9 Ta jtahb (20) ha'bil yochel ta ajwalil yu'un Israel a te Jeroboam, och ta ajwalil yu'un Judá te Asa.

10 Halaj jun yoxwinic (41) ha'bil ta ajwalil ta Jerusalén. Maaca sbihil te schuchu'me'el, ha te yantsil-nich'an Abisalom.

11 Te Asa lec bin la spas ta stojol Jehová, hich te bin ut'il la spas te David te state.

12 La stenticlan loq'uel ta q'uinal te sodomita-winiquetic soc la sloq'ues spisil te loc'ombahetic te la spasticlan te sme'state.

13 Soc la sloq'ues ta snan-ajwalil te Maaca te schuchu'me'el, yu'un spasoj sloc'omba Asera. Te Asa la sts'et te loc'omba pasbil yu'un te schuchu'me'el, la schic' ta uc'um Cedrón.

14 Aunque ma ba la yich' loq'uesel te toyol awilaletic, te Asa jun yo'tan ta stojol Jehová te jayeb c'ahc'al cuxul.

15 La yotses ta sna Jehová te oro, plata soc yan biluquetic te yac'oj ta stojol Jehová te stat, soc te bintic ha nix la yac'.


Asa soc Ben-adad la schap sc'opic

16 La ya'be sbahic guerra te Asa soc te Baasa te ajwalil yu'un Israel te jayeb c'ahc'al cuxulic.

17 Te Baasa mo bahel ta ya'beyel guerra te Judá, la schahpan ta lec te Ramá scuenta yu'un mayuc mach'a ya xhu' ya xloc' o ya x'och ta stojol Asa te ajwalil yu'un Judá.

18 Ha yu'un te Asa la sloq'ues spisil te plata soc oro te ay ta yawil c'ulejalil ta sna Jehová soc ta sna ajwalil, la ya'be te a'batetic yu'un, la sticonlan bahel ta stojol Ben-adad snich'an Tabrimón, snich'an Hezión, te ajwalil yu'un Siria te nahinem ta Damasco. Hich la yalbe bahel:

19 Ya jchap jc'optic hich te bin ut'il la spasic te jtatique. La jticombat amahtan plata soc oro. Bahan, jina te achapbil-c'op soc Baasa te ajwalil yu'un Israel scuenta yu'un ya yihquitayon, xchi.

20 Te Ben-adad lec la ya'iy te bin la yal te ajwalil Asa, hich la sticonlan bahel te jtsobawetic yu'un te soldadohetic yu'un ta ya'beyel guerra te pueblohetic yu'un Israel. Hich la stsalticlan Ijón, Dan, Abel-bet-maaca, spisil Cineret soc spisil sq'uinal Neftalí.

21 C'alal hich la ya'iy te Baasa, la yihquitay hilel schahpanel te Ramá, hil ta Tirsa.

22 Hich te ajwalil Asa la sticon ta iq'uel tal spisil Judá, mayuc mach'a hil. La yich'ic bahel te tonetic soc te'etic te la stuhun te Baasa ta schahpanel Ramá; te ajwalil Asa la schahpan a te Geba ta sq'uinal Benjamín soc te Mizpa.


Cham Asa

23 Te bintic xan sc'oblal te Asa, spisil te yip ya'tel, spisil te bintic yan la spasticlan soc te pueblohetic te la spas, spisil ts'ihbabil ta libro yu'un te ya'tel ajwaliletic yu'un Judá. Te c'alal mamalix a, tsacot ta chamel ta yoc.

24 Cham te Asa, baht sjoquin ta muquenal te chawinic sme'stat, la yich' muquel soc ta Pueblo yu'un David. Ha la sjelolin ta ajwalil te Josafat te snich'ane.


Ya'tel Nadab ta ajwalil yu'un Israel

25 Ta schebal ha'bil yochel ta ajwalil yu'un Judá a te Asa, och ta ajwalil yu'un Israel te Nadab snich'an Jeroboam. Cheb ha'bil halaj ta ajwalil ta Israel.

26 Ha la spas te bin chopol ta stojol Jehová, la st'umbe sbe te stat soc te bin mulil te la ya'be sta smul a te snich'nab Israel.

27 Te Baasa snich'an Ahías, te ha sts'umbal Isacar, la schapbe sc'oblal ta milel te Nadab, hich la smil ta Gibetón, te ha yu'un te filisteohetic, como yac ta sjoytayel ta guerra a te Gibetón te Nadab soc spisil Israel.

28 Te Baasa la smil te Nadab ta yoxebal ha'bil yochel ta ajwalil yu'un Judá a te Asa, ha hil ta sjelol ta ajwalil te Baasa.

29 Te c'alal ochel to ta ajwalil a, la smilticlambe spisil te mach'atic ay yu'un Jeroboam, mayuc mach'a cuxul hil, jc'axel la slajin, hich te bin ut'il yaloj te Jehová ta scuenta te ya'bat Ahías te talem ta Silo.

30 Hich la spas ta scaj te muliletic la spas te Jeroboam, te ha la ya'be sta smul a te Israel, te hich la yac' ilinuc a te Jehová te Dios yu'un Israel.

31 Te bintic xan sc'oblal te Nadab soc spisil te bintic la spas, ts'ihbabil ta libro yu'un te ya'tel ajwaliletic yu'un Israel.

32 Te Asa soc te Baasa ajwalil yu'un Israel la ya'be sbahic guerra te jayeb c'ahc'al cuxulic.


Ya'tel Baasa ta ajwalil yu'un Israel

33 Ta yoxebal ha'bil yochel ta ajwalil yu'un Judá a te Asa, te Baasa snich'an Ahías hahch ta a'tel ta ajwalil yu'un spisil Israel ta Tirsa; chaneb scha'winic (24) ha'bil ay ta ajwalil.

34 Ha la spas te bin chopol ta stojol Jehová, ha nix la spas te bin la spas te Jeroboam soc te bin mulil te la ya'be sta smul a te Israel.

Biblia Tzeltal Bachajon © Sociedad Bíblica de México, A.C., 2006.

Bible Society of Mexico
Lean sinn:



Sanasan