1 Pedro 4 - Bible in Tzeltal Bachajón

Lequil jcananetic yu'un mahtaniletic a'bibil yu'un Dios

¹ Ha yu'un, te bin ut'il c'ax swocol te Cristo ta sbaq'uetal ta jcuentatic, ya sc'an te hich nix ay te co'tantic te bin ut'il ay te yo'tane, como te mach'a c'axemix swocol ta sbaq'uetal lajix sc'oblal mulil ta yo'tan;

² hich te jayeb xan c'ahc'al cuxul ta bahlumilal ma ba ya spas te bintic ya smulan spasel te bin scuenta ch'ich'-baq'uet, ha ya spas te bintic ya sc'an yo'tan te Diose.

³ Tic'uquix a te yorahil te c'axix awu'unic ta spasel te bin ya smulanic spasel te mach'atic ma ba ya sna'be sba te Diose, ha te ma q'uexlalil, chijil-o'tanil, yacubel, pas-q'uin, yac'oltayel q'uinal, soc sch'uhuntayel lotil diosetic te ihlaybilique.

⁴ Jchahp ya ya'iyic a te ma ba yac ajoquinic ta spasel te biluc nax mulil ya smulanic spasele, ya slabanex yu'un.

⁵ Pero ya me yaq'uic cuenta ta stojol te mach'a chapal ya yich' ta c'op te mach'atic cuxajtic soc mach'atic chamenic.

⁶ Ha scuentahil te la yich'ic halbeyel te lec yach'il c'op te mach'atic chameniquix, scuenta yu'un, aunque ich'otic ta c'op scuenta sbaq'uetalic hich te bin ut'il spisil ants-winiquetic, ya xcuxajic ta scuenta sch'uhlelic hich te bin ut'il cuxul stuquel te Diose.

⁷ Nopol ya sta yorahil te ya xlaj spisil bintic ay; ha yu'un na'ahic me q'uinal soc wic'sitaya me abahic scuenta yu'un ya xhu' yac ac'oponic Dios.

⁸ Ha tulan sc'oblal te talel c'axel c'ux xawa'iy abahic ta mero melel, como te c'uxul-o'tanil ya stup'be sc'oblal bayel muliletic.

⁹ Talel c'axel xawotses abahic ta anahic, ma me x'aletuc awo'tanic yu'un.

¹⁰ Te mahtanil a'bot yu'un Dios ta jtuhlutuhl, tuhunahic ta stojol yantic scuenta lequil jcanan yu'un te bayel ta chahp mahtaniletic ya yac' te Diose.

¹¹ Teme ay mach'a ya xc'opoj, hich ac'a c'opojuc te bin ut'il mach'a yac ta yalel te bintic yaloj te Diose; teme ay mach'a ya yac' sba ta a'batinel, ac'a me spas ta scuenta te yip te ya x'a'bot yu'un Dios, scuenta yu'un ta spisil ya xhalot yutsilal Dios ta scuenta te Jesucristo, te ha yu'un te utsilal soc te yu'el scuenta sbahtel q'uinal. Hichuc.

Pajal ya xc'ax jwocoltic soc Cristo

¹² Ha'ex te c'uxex ta co'tan, ma me jchahpuc xawa'iyic yu'un te tsajel talem ta atojolic te hich sc'uxul te bin ut'il c'ahc', ma me xacuyic te jchahp a te bin yac ta c'ohel ta atojolique.

¹³ Bayeluc me yutsil awo'tanic yu'un, como ha pajal yac ta c'axel awocolic soc te Cristo, scuenta yu'un hich me bayel yutsil awo'tanic a te c'alal ya xchicnaj tal yutsilal.

¹⁴ Teme ayex ta ixta'c'optayel ta scaj te sbihil te Cristo, bayel me awutsilic yu'un, como ay ta atojolic te Espíritu yu'un Dios te bayel yutsil.

¹⁵ Ha yu'un ma me ayuc mach'a ya xc'ax swocol ta scuenta milaw, elec', chopol a'tel, o te ya yotses sba ta banti ma yocheluc.

¹⁶ Yan teme ay mach'a ya xc'ax swocol ta scuenta te sch'uhunej Cristo, ma me xq'uexaw yu'un, ac'a yalbe yutsil sc'oblal Dios yu'un.

¹⁷ Como yorahilix te ya xhahch ta ich'el ta c'op te mach'atic yu'un Dios; teme ha nahil ya xhahch ta jtojoltic, ¿bin ut'il ya xc'ohtic ta loq'uel te mach'atic ma sch'uhunic te lec yach'il c'op yu'un te Diose?

¹⁸ Hich ya yal: Teme wocol ya xcol te mach'a toj yo'tan, ¿bin ut'il ya xc'oht ta loq'uel te mach'a ma ba ya sch'uhun Dios soc te mach'a jmulawil? xchi.

¹⁹ Ha yu'un te mach'atic ya xc'ax swocolic ta scuenta sc'anojel yo'tan te Diose, ac'a yac' sbahic ta sc'ab te Jpaswanej te stalel jun yo'tan, soc ha ac'a spas te bin leque.