1 Corintios 9 - Bible in Tzeltal Bachajón

Te bin ya sc'an pasbeyel te jpuc-c'op

¹ ¿Ma bal jpuc-c'opucon? ¿Ma bal librehuc ayon? ¿Ma bal quilojuc te Cajwaltic Jesús? ¿Ma bal ca'teluquex ta stojol te Cajwaltique?

² Aunque ma jpuc-c'opucon yu'un te yantique, pero jpuc-c'opon awu'unic te ha'exe, como ha'ex sello c'ohemex yu'un te quich'oj ca'tel ta jpuc-c'opil ta scuenta te Cajwaltique.

³ Hich ya jsutbe sc'op te mach'a ya slehbon jmul:

⁴ ¿Yu'un bal ma xpas te ya xwe' x'uch'otcotique?

⁵ ¿Yu'un bal ma xpas te ya quic'cotic ta behel quihnamcotic te sch'uhunejic Cajwaltic, hich te bin ut'il ya spasic te yantic jpuc-c'opetic soc te yihts'inab te Cajwaltic soc te Cefas?

⁶ O ¿ha nax bal ho'on soc Barnabé te ya sc'an ya x'a'tejotcotic yu'un ya jtahcotic bintic ya xtuhun cu'uncotic a?

⁷ ¿Mach'a ya x'och ta soldadohil te ha nix ya stoj sba? ¿Mach'a ya sts'un sts'usubil te ma ba ya swe'be te site? ¿Mach'a ya scanantay wacaxetic te ma ba ya yuch'be te leche yu'une?

⁸ ¿Sc'op nax bal winic te bin ut'il hich ya cale? ¿Ma bal hichuc nix ya yal ta Ley?

⁹ Como hich ts'ihbabil ta ley yu'un Moisés: Ma me xawa'be sbolsahil sni' te wacax te ya x'a'tej ta p'uy-trigo, xchi. ¿Ha bal ay ta yo'tan Dios te wacaxe?

¹⁰ ¿Ma bal ho'ucotic jc'oblaltic? Pues ho'otic jc'oblaltic te hich ts'ihbabil, como te mach'a ya spasbe slumil sts'unub yawal soc te mach'a ya sp'uy trigo, ya smahliy te ya stuhumbe te site.

¹¹ Teme la jts'uncotic ta atojolic te bintic scuenta espíritu, ¿c'ax muc' bal sc'oblal teme ya jtsobecotic sit scuenta jbaq'uetalcotic?

¹² Teme ay yantic te hich yac apasbeyic, ¿ma bal c'axuc hich a te ho'otcotique? Pero ma ba jtuhunejcotic te bin stojil ay ta pasel ta jcuentacotic, spisil cuhchem cu'uncotic scuenta yu'un mayuc bin ya xmacot yu'un a te lec yach'il c'op yu'un te Cristo.

¹³ ¿Ma bal ana'ojic, te mach'atic ya x'a'tejic ta templo tey nix ya sta swe'elic a, soc te mach'atic ya x'a'tejic ta scajtajib ta chiq'uel mahtanil ay bin ya stahic tey a?

¹⁴ Ha nix hich te Cajwaltic la yal mandar te mach'a ya ya'telinic spuquel te lec yach'il c'op te tey ya xcuxajic a.

¹⁵ Pero te ho'one, ma ba quich'oj ta cuenta ini, soc la jts'ihbay ini ma yu'unuc hich ya jc'an pasbeyel, como ha lec ya ca'iy te yacuc xchamon te bin ut'il ayuc mach'a ya spojbon te bin ya jtoy jba yu'une.

¹⁶ Pero teme ya cal te lec yach'il c'op, mayuc bin ya jtoy jba yu'un, como fuersa ya jpas; ¡Obol jba teme ma ba ya jpuc ta halel te lec yach'il c'ope!

¹⁷ Teme soc sc'anojel co'tan ya jpas, ay bin ya x'a'boton yu'un; yan teme ma ha'uc soc sc'anojel co'tan ya jpas, ha nax yacon ta spasel te bin ticombilon ta spasele.

¹⁸ ¿Bin a te ya x'a'boton yu'un te ca'tele? Ha te ta mahtanil yacon ta spuquel te lec yach'il c'op yu'un Cristo, scuenta yu'un ma ba ya xjelawon ta stojol te bin pasbeyel ya sc'an te mach'a ya yal te lec yach'il c'ope.

¹⁹ Ha yu'un, aunque libre ayon ta stojol spisilic, cac'oj jba ta a'batinel yu'un spisilic scuenta yu'un bayel xan mach'atic ya sch'uhunic a te Cristo.

²⁰ Ta yohlil te judíohetic ya jpas jba ta judío, scuenta yu'un hich ya jpas ta ganar a te judíohetique; te mach'atic cuentahimbilic yu'un te Ley, ya jpas jba te bin ut'il cuentahimbilon yu'un te Ley, (aunque ma ba cuentahimbilon yu'un te Ley), scuenta yu'un ya jpas ta ganar te mach'atic cuentahimbilic yu'un te Ley;

²¹ te mach'atic ma ba cuentahimbilic yu'un te Ley, ya jpas jba te ma ba cuentahimbilon yu'un te Ley, (ma yu'unuc ma ba cuentahimbilon yu'un te ley yu'un Dios, ha cuentahimbilon yu'un te ley yu'un Cristo), scuenta yu'un ya jpas ta ganar te mach'atic ma ba cuentahimbilic yu'un te Ley.

²² Te mach'atic mayuc yip yo'tanic, hich ya jpas jba te mayuc yip co'tan, yu'un ha ya jpas ta ganar; pajal la jpas jba soc spisil ants-winiquetic scuenta yu'un ayuc bin ut'il ay mach'atic ya xcolic a.

²³ Hich ya jpas ta scaj te lec yach'il c'op, scuenta yu'un ha nix hichon ya quich' te bendicionetic yu'une.

²⁴ ¿Ma bal ana'ojic te mach'atic ya stsal sbahic ta ahnimal, spisilic ya x'ahnimajic, pero jtuhl nax mach'a ya yich' te premio? Ahnimajanic scuenta yu'un hich yac atahic a te premio.

²⁵ Spisil te mach'atic ya ya'iyic tsaltamba bayel ya stsahtay sba; hich ya spasic scuenta yu'un ya yich'ic te corona te ya xlaj, pero te ho'otic ya jpastic scuenta yu'un ya quich'tic te corona te ma xlaje.

²⁶ Ha yu'un ma ba hich ya x'ahnimajon te bin ut'il mach'a ma sna' stojlinel banti ya xbaht; ma ba hich ya ca'iy majtamba te bin ut'il mach'a ya smaj te iq'ue;

²⁷ ha ya jmaj te jbaq'uetal soc ya cac' ta mosohinel scuenta yu'un ma ba loq'uesbilon ya xc'ohon, ho'on te la jcalbe ya'iyic sc'op Dios te yantique.