1 Corintios 8 - Bible in Tzeltal Bachajón

Milbil mahtanil ac'bil ta stojol loc'ombahetic

¹ Te bin ut'il ay sc'oblal te milbil mahtaniletic ac'bilic ta stojol loc'ombahetic, jna'ojtic te jpisiltic bayel na'bil cu'untic. Te bin na'bil ya yac' toybahil, yan te c'uxul-o'tanil ya xmuc'ubteswan.

² Teme ay mach'a ya scuy te ay bin ya sna', ma to hichuc sna'oj a te bin ut'il ya sc'an ya na'e.

³ Yan te mach'a c'ux ya ya'iy ta yo'tan te Diose, na'bibil sba yu'un stuquel.

⁴ Te bin ut'il ay sc'oblal te we'elil te ya yich' aq'uel scuenta milbil mahtanil ta stojol loc'ombahetic, jna'ojtic te mayuc stuc ta q'uinal te loc'omba, te junax Dios ay.

⁵ Aunque ay cuyticlambil ta diosetic ta ch'ulchan o ta bahlumilal (como ay tsobol diosetic soc tsobol ajwaliletic ta sc'opic),

⁶ pero te ho'otique, jna'ojtic te junax Dios ay, ha te Tatil, te ha talem ta stojol spisil bintic ay soc te ha cuxulotic ta scuenta; soc junax Cajwaltic, ha te Jesucristo, te ha ta scuenta te la yich' pasel spisil bintic ay soc te ha cuxulotic ta scuenta.

⁷ Pero ma spisiluc hich sna'ojic, ay mach'atic c'ahyemic soc te loc'ombahetic, ha yu'un te bin ya swe'ic ay ta yo'tanic te ha a'bibil ta stojol loc'ombahetic, hich ya xbohlob yo'tanic, yu'un mayuc yip yo'tanic.

⁸ Pero ma ha'uc lec xan ya yilotic Dios yu'un te bin ya jwe'tic, ma ha'uc lec ya xc'ohotic yu'un teme ya jwe'tic, ni ha'uc lec ya xc'ohotic yu'un teme ma ba ya jwe'tique.

⁹ Pero tsahtaya me abahic, te bin ut'il libre ayex ta spasel, ma me ha'uc sc'ohchinojibal ya xc'ohat yu'un te mach'atic mayuc yip yo'tanic,

¹⁰ como te mach'a mayuc yip yo'tan teme ya yilat te yacat ta we'el ta mesa yu'un loc'ombahetic ha'at te ana'beyej scuentahil, ¿ma bal yacuc snop te ha nix hich ya swe' te bin ac'bil ta stojol te loc'ombahetique?

¹¹ Hich ta scuenta te bin yac ana' ha'at, yac awac' ch'ayuc awermano te mayuc yip yo'tan, te cham Cristo yu'une.

¹² Te bin ut'il hich yac ata amulic ta stojol te awermanotac soc yac awehchentesbe yo'tan te mayuc yip, ha yac ata amulic ta stojol Cristo yu'un.

¹³ Ha yu'un teme ta scaj we'elil ya xyahl te quermano, ha lec te mayuc bin ora ya jwe' ti'bal, scuenta yu'un ma ba ya cac' te ya sc'ohchin sba a te quermanohe.