1 Corintios 7 - Bible in Tzeltal Bachajón

Sc'oblal nuhpunel

¹ Te bin ut'il ay sc'oblal te bintic la ajoc'obonic ta hun: Lec teme ma ba ya sta sba soc ants te winique.

² Pero ta scaj te ay ya sta smulic ta scuenta antsiwej, ha lec te ayuc yihnam te jujutuhl winiquetic, soc ayuc smamalal te jujutuhl antsetic.

³ Te winic ac'a spas te bin ya sc'an pasel ta stojol te yihnam, hich nix te ants ta stojol te smamalale.

⁴ Te ants ma stuqueluc yu'un te sbaq'uetal, ha yu'un te smamalal; hich nix te winique ma stuqueluc yu'un te sbaq'uetal, ha yu'un te yihname.

⁵ Ma me talel c'axeluc ma xac'an yac ata abahic, ha nax teme hich achapojic chican jayeb c'ahc'al, yu'un yac awa'telinic sc'oponel Dios. Patil joquina abahic, scuenta yu'un ma ba ya sujex a te Satanás ta scaj te ma xhu' yac acom abahique.

⁶ Pero ya cal ini, ma ha'uc scuenta mandar, pero scaj ma xcuhch awu'unic.

⁷ Co'tanuc te hichuc ay spisil winiquetic te bin ut'il ayon. Pero ta jujutuhl chican bin a te smahtan yu'un Dios, yan smahtan te yane, yan smahtan te yane.

⁸ Ya calbe te mach'atic ma to ba nuhpunemic soc te me'ba' antsetic, lec te hichuc ya xhilic te bin ut'il te ho'one.

⁹ Pero teme ma ha'uc smahtanic te ya xhu' ya scom sbahic, ac'a nuhpunicuc, como ha lec xan teme ya xnuhpunic te bin ut'il yac ta c'axel swocol yu'un.

¹⁰ Te mach'atic nuhpunemic, hich ya jpas ta mandar, (ma ho'ucon jmandar, ha smandar Cajwaltic): Te ants ma me xyihquitay smamalal.

¹¹ Teme ya yihquitay, ma me xcha'nuhpun xan o ac'a scha'lecubtesbe xan sba yo'tanic. Te winic ma me sch'ay hilel te yihname.

¹² Ho'on hich ya calbe te yantique, (ma ha'uquix te Cajwaltic): Teme ay quermanotic te ma ba sch'uhunej Dios te yihnam, pero teme jun yo'tan cuxul soc, ma me sch'ay hilel.

¹³ Ha nix hich teme ay jtuhl ants te ma ba sch'uhunej Dios te smamalal, pero teme jun yo'tan cuxul soc, ma me sch'ay hilel;

¹⁴ como te smamalal te ma ba sch'uhunej Dios ch'ultesbil ya xc'oht ta scuenta te yihname, soc ha nix hich te ants te ma ba sch'uhunej Dios, ch'ultesbil ya xc'oht ta scuenta te smamalal. Te manchuque, bohloben sc'oblal te awal-anich'nabic, pero yo'tic ch'uhltesbilic.

¹⁵ Yan teme ha ya sc'an ya yihquitay sba te mach'a ma ba sch'uhunej te Diose, ac'a yihquitay sba. Te quermanotic winic o quermanatic ants te hich ya xc'oht ta scuenta, ma ba chucbil, como ha la yic'otic Dios yu'un te lamaluc q'uinal ya x'ayinotique.

¹⁶ Como ¿ya bal ana', ha'at ants, teme ya xcol te amamalal ta acuenta? Soc ¿ya bal ana', ha'at winic, teme ya xcol te awihnam ta acuenta?

¹⁷ Jujutuhl hich ac'a ayinuc te bin ut'il ay te mahtaniletic a'bibilic yu'un te Cajwaltic soc bin yilel c'alal ic'ot yu'un Dios; hich ya cal mandar ta stojol spisil te iglesiahetique.

¹⁸ ¿Ay bal mach'a yich'oj circuncisión a te ic'ot yu'un Dios? Hich ac'a ayinuc. ¿Ay bal mach'a ma ba yich'oj circuncisión a te ic'ot yu'un Dios? Ma me xyac' sba ta a'beyel circuncisión.

¹⁹ Mayuc sc'oblal teme yich'oj circuncisión o teme ma ba yich'oj circuncisión; ha tulan sc'oblal sch'uhumbeyel smandar te Diose.

²⁰ Te bin nix ut'il ay jujutuhl c'alal ic'ot yu'un Dios, hichuc ac'a ayinuc.

²¹ ¿Ayat bal ta mosohil a te la awich' iq'uel? Ma me xamel awo'tan yu'un. Pero teme ay bin ut'il ya xhu' ya xhilat ta libre, coltaya aba.

²² Como te mach'a ay ta mosohil a te ic'ot yu'un te Cajwaltic, libre ay yu'un te Cajwaltic; ha nix hich te mach'a libre ay a te ic'ot yu'un te Cajwaltic, ha moso yu'un Cristo.

²³ Ay atojolic te mambilex; ma me xawac' smosohinex te winiquetique.

²⁴ Ha yu'un, quermanotac, te bin nix ut'il ayex ta jujutuhl a te c'alal la yiq'uex te Diose, hich ni me x'ayinex.

²⁵ Te bin ut'il ay sc'oblal te ach'ixetic, ma ba quich'oj mandaril yu'un te Cajwaltique, pero ya cal te bin jnopoj ho'on te ta scuenta sc'uxul yo'tan te Cajwaltic ayon ta ich'el ta cuenta yu'un te bin ya cale.

²⁶ Ta scaj te wocol ayotic ini, ya cal te ha lec te hichuc ya xhilic te bin nix ut'il ayique.

²⁷ Teme ay awihnam, ma me xawihquitay aba soc; teme mayuc awihnam, ma me xale awihnam.

²⁸ Teme ya xnuhpunat, ma ba yac ata amul yu'un; soc teme ya xnuhpun te ach'ix, ma ba ya sta smul yu'un. Pero te mach'a ya xnuhpun, ya me xc'ax swocolic ta scuxlejal; co'tanuc te ma hichuc ya xc'oht ta stojolique.

²⁹ Quermanotac, ya calbeyex ini: Com xanix yoarhil. Te mach'atic ay yihnamic, ac'a sp'is sbahic te mayuc yihnamic;

³⁰ te mach'atic ya x'oq'uic, ac'a sp'is sbahic te ma ba ya x'oq'uic; te mach'atic tse'el yo'tanic, ac'a sp'is sbahic te ma ba tse'el yo'tanic; te mach'atic ay bin ya smanic, ac'a sp'is sbahic te mayuc bin ay yu'unic;

³¹ te mach'atic mulambil yu'unic bintic ay ta bahlumilal, ac'a sp'is sbahic te ma ba ya smulanic, como te bin ay yu'un te bahlumilal ta ora ini, c'axel nax ay.

³² Co'tanuc te mayuc bintic yac ana'ulanic. Te mach'a ma ba nuhpunem ha ya yo'tantay spasel te bintic yu'un te Cajwaltic, ya sle bin ut'il lec yo'tan yu'un te Cajwaltique.

³³ Yan te mach'a nuhpunem, ha ya xbaht ta yo'tan te bintic scuenta te bahlumilal, ha te bin lec yo'tan yu'un te yihname.

³⁴ Ha nix hich ma pajaluc te mach'a nuhpunem soc te ach'ixe. Te ach'ix ya yo'tantay spasel te bintic yu'un te Cajwaltic, ha te bin ut'il ch'ultesbil ya xc'oht te yo'tan soc sbaq'uetal; yan te mach'a nuhpunem, ha ya xbaht ta yo'tan spasel te bintic scuenta bahlumilal, te bin ut'il lec yo'tan yu'un te smamalale.

³⁵ Hich ya calbeyex scuenta yu'un lec ya xc'ohex yu'un; ma yu'unuc ya jchuquex, pero yu'un stojil ya xcuxajex soc te jun awo'tan yac awac' abahic ta stojol te Cajwaltique.

³⁶ Pero teme ay mach'a ya yil te ma lecuc te yac ta c'axel ya'bilal te ach'ix yu'une, teme hich ya sc'an, ac'a nuhpunuc, ma muliluc.

³⁷ Yan te mach'a snopoj ta yo'tan te ya xhu' yu'un ya scanantay sba, teme snopoj te ma ba ya xnuhpun te yantsil-nich'an, lec te hich ya spase.

³⁸ Ha yu'un te mach'a ya yac' te ya xnuhpun, lec te hich ya spas, soc te mach'a ma xyac' te ya xnuhpun, c'ax lec xan a.

³⁹ Te ants te nuhpunem, chucbil ta scuenta ley te c'alal cuxul te smamalal; pero teme cham te smamalal, libre ay teme ya xcha'nuhpun xan soc te mach'a ya sc'an ya xnuhpune, ha nax teme ta scuenta te Cajwaltique.

⁴⁰ Pero te ya cale, ha bayel xan yutsil teme ma ba ya xnuhpun xane. Ya jna' te ha nix hichon quich'oj te Espíritu yu'un Dios.