1 Corintios 3 - Bible in Tzeltal Bachajón

Joc jbahcotic ta a'tel soc Dios

¹ Ha yu'un, quermanotac, ma ba hu' cu'un te la jc'oponex hich te bin ut'il te mach'atic ayic ta scuenta te Espíritu, como ta scuenta ch'ich'-baq'uet ayex, hich ayex te bin ut'il bic'tal alaletic ta stojol Cristo.

² La jca'beyex awuch'ic leche, ma ha'uc tulan we'elil, como ma to xhu' awu'unic,

³ como ayex to ta scuenta ch'ich'-baq'uet. Te bin ut'il ay ta awohlilic xut'et-o'tanil soc hach-c'op ¿ma bal ayuquex ta scuenta ch'ich'-baq'uet soc te hich ayex te bin ut'il yantic winiquetic?

⁴ Como hich ya yal te yane: Ho'on jt'unoj te Pablo, xchi, soc hich ya yal te yane: Ho'on jt'unoj te Apolos, xchi. ¿Ma bal yu'unuc ayex ta scuenta ch'ich'-baq'uet?

⁵ ¿Mach'a a te Pablo, soc mach'a a te Apolos? Ha a'batetic te ha ta scuentahic te la ach'uhunique; soc ha chican te bin a'bot spas jujutuhl yu'un te Cajwaltique.

⁶ Ho'on la jts'un, te Apolos la ya'be ya'lel, pero Dios la yac' ch'ihyuc.

⁷ Ha yu'un ma ha'uc ay sc'oblal te mach'a ya ya'iy ts'umbajel o te mach'a ya ya'be ya'lel, ha ay sc'oblal te Dios te ya yac' ch'ihyuc.

⁸ Pajal ayic te mach'a ya ya'iy ts'umbajel soc te mach'a ya ya'be ya'lel, soc jujutuhl ya x'a'bot yich' stojol, ha chican bin yilel ya'telic.

⁹ Como te ho'otcotic joc jbahcotic ta a'tel soc Dios; te ha'exe sts'unubex Dios, ha snahex Dios.

¹⁰ Ta scuenta te bin a'bibilon yu'un Dios, ho'on, te bin ut'il ya jna' ta lec pas-na, la jca'be yich'o-ip, yan mach'a ya sts'ahcuy mohel; pero jujutuhl ac'a yil bin ut'il ya sts'ahcuy mohel.

¹¹ Mayuc mach'a ya xhu' ya ya'be yan yich'o-ip te bin ut'il ayix, ha te Jesucristo.

¹² Teme ay mach'a ya sts'ahcuy mohel ta oro, plata, t'ujbil ton, o ta te', ac o c'ajben ta sba te yich'o-ip,

¹³ ya me xchicnaj bin yilel ya'tel ta jujutuhl, como ya me xchicnaj ta yorahil, ta scuenta c'ahc' ya xchicnaj; ya me yich' tsajel ta c'ahc' te ya'tel jujutuhl.

¹⁴ Teme stalel ya xhil te ya'tel te mach'a la sts'ahcuy mohel, ya me x'a'bot smahtan.

¹⁵ Yan teme ya xlaj ta c'ahc' te ya'tel, ya xch'ay te ya'tel, pero ya xcol stuquel, aunque hich bin ut'il mach'a col loq'uel ta c'ahc'.

¹⁶ ¿Ma bal ana'ojic te ha templohex yu'un Dios, soc te nahinem ta awo'tanic te Espíritu yu'un Dios?

¹⁷ Teme ay mach'a ya sjin te templo yu'un Dios, ya me xjihnot yu'un Dios, como ch'ultesbil te templo yu'un Dios, ha'ex abi.

¹⁸ Ma me ayuc mach'a ya slo'loy sba; teme ay mach'a ay ta awohlilic te ya scuy sba ta p'ij ta scuenta te bahlumilal ini, ac'a sp'is sba te mayuc bin ya sna' scuenta yu'un hich ay sp'ijil yo'tan ya xc'oht.

¹⁹ Como te p'ijil-o'tanil yu'un te bahlumilal ha howilc'op ta stojol Dios, hich te bin ut'il ts'ihbabil: Ya syac ta scuenta sp'ijil yo'tanic te mach'atic p'ijique, xchi.

²⁰ Soc hich ts'ihbabil xan: Te Cajwaltic sna'oj te ma xtuhun te bin snopoj te mach'atic p'ijique, xchi.

²¹ Ha yu'un ma me ayuc mach'a ya stoy sba yu'un te ay bin ya xhu' yu'un te ants-winiquetic, como ha awu'unic spisil:

²² teme ha te Pablo, o Apolos, o Cefas, o bahlumilal, cuxlejal, lajel, te bin ay ta ora ini o te bin ya xc'oht ta pasel ta patil. Spisil awu'unic,

²³ soc ha'ex yu'unex Cristo, soc ha yu'un Dios te Cristo.