1 Corintios 16 - Bible in Tzeltal Bachajón

Mahtanil ya yich'ic mach'atic ch'uhltesbilic

¹ Te bin ut'il ay sc'oblal te mahtanil ya yich'ic te mach'atic ch'uhltesbilic, hich me xapasic te bin ut'il la jpas hilel ta mandar te iglesiahetic ta sq'uinal Galacia.

² Ta jujun sba c'ahc'alil semana, ta tuhlutuhl parte me xawaq'uic jtebuc, ha chican jayeb la atahic, q'uejahic, scuenta yu'un ma ha'uc to yac atsobic a te c'alal ya xtalone.

³ C'alal ya xtalon, ya jticon bahel soc carta te mach'atic tsahbil awu'unic scuenta yu'un ya yich'ic bahel ta Jerusalén te mahtanil awu'unique.

⁴ Teme hich ya sc'an te ya xbohon ec, ya sjoquinonic bahel.

Te bin chapal yu'un Pablo

⁵ Ya xtalon ta banti ayex, pero nahil ya xc'axon tal ta sq'uinal Macedonia, como ya sc'an ya xc'axon tey a.

⁶ Ya wan xhalajon tey ta banti ayex, o tey wan ya xc'ax cu'un a te yorahil sic, scuenta yu'un yac awa'bonic te bin ya xtuhun cu'un ta behel ta banti ya sc'an ya xbohone.

⁷ Como ma jc'an te buelta nax ya xc'ax quilex, ha ya jc'an te ya xhalajon ta banti ayex, teme hich ya sc'an te Cajwaltique.

⁸ Pero ya xhilon ta Éfeso ha to c'alal ta q'uin Pentecostés,

⁹ como jamboton muc'ul puerta ta spasel muc'ul a'tel, aunque bayel mach'atic ya xcontrahinwanic.

¹⁰ Teme ya xc'oht te Timoteo, xawilic te junuc yo'tan ta awohlilic, como ya'telimbeyej ya'tel te Cajwaltic hich te bin ut'il ho'on.

¹¹ Ha yu'un ma me ayuc mach'a peq'uel ya yil, coltayahic scuenta yu'un lamal q'uinal ya suht tal ta jtojol, como ha yac jmahliybel soc te quermanotactique.

¹² Yan te quermanotic Apolos la jcalbe bayel wocol te yacuc xtal yilex soc te yantic quermanotactic, pero ma ba la sc'an ya xbaht ta ora; ha ya xbaht te bin ora ya xhu' yu'une.

Spatil-o'tanil yu'un yermanotaquic

¹³ Wihc'a me asitic, ayuc me yip sch'uhunel awo'tanic, pasahic me lec winiquil, ac'ahic me fuersa.

¹⁴ Spisil te bintic yac apasic scuentahuc me sc'uxul awo'tanic.

¹⁵ Quermanotac, ana'ojic te ha sba sit ta Acaya te mach'atic ay yu'un te Estéfanas; ha yac'oj sbahic ta a'batinel yu'un te mach'atic ch'uhltesbilic.

¹⁶ Ya calbeyex wocol te yacuc awac' abahic ta cuentahinel yu'un te mach'a hich yac spasbelic, soc spisil mach'atic ya xcoltaywanic soc ya x'a'tejic.

¹⁷ Tse'el co'tan te c'alal tal te Estéfanas, Fortunato soc te Acáico, como ha la ya'bonic te bin ma ba hu' awu'unic yaq'uel,

¹⁸ como la ya'bonic xan yip co'tan soc ha nix hich la ya'beyex yip awo'tanic. Ich'ahic ta cuenta te mach'atic hich ayique.

¹⁹ Ya spatbeyex awo'tanic te iglesia ta sq'uinal Asia. Ya spatbeyex awo'tanic ta scuenta Cajwaltic te Aquila soc Priscila soc te iglesia te ya stsob sba ta sna.

²⁰ Ya spatbeyex awo'tanic ta spisil te quermanotactique. Talel c'axel xapatbe aba awo'tanic ta scuenta ch'ul uts'uyel.

²¹ Ho'on Pablohon te la jts'ihbabeyex ta jc'ab te pahtil-o'tanil ini.

²² Te mach'a ma ba c'ux ya ya'iy ta yo'tan te Cajwaltic Jesucristo, ihlaybil me ac'a c'ohtuc. Talelix te Cajwaltique.

²³ Ac'a sjoquinex te yutsil yo'tan te Cajwaltic Jesucristo.

²⁴ Ta apisilic ayuc ta atojolic te sc'uxul co'tan ta scuenta Cristo Jesús. Hichuc.