1 Corintios 14 - Bible in Tzeltal Bachajón

Sc'oblal c'op ta yantic c'opiletic

¹ O'tantayahic st'unel te sc'uxul-o'tanil soc ha me xac'anic te mahtaniletic yu'un te Espíritu, pero ha'uc muc' sc'oblal awu'unic te mahtanil yu'un yalel sc'op-jalwanej.

² Te mach'a ya xc'opoj ta yan c'op, ma ha'uc ya xc'opoj soc ants-winiquetic, ha ya xc'opoj soc Dios, mayuc mach'a ya sna'be scuentahil, yu'un ya yal te bin muquen ay ta scuenta te espíritu yu'une.

³ Yan te mach'a ya yal te sc'op-jalwanej, ha ya sc'opon te ants-winiquetic scuenta yu'un ya sta yip yo'tanic, scuenta tsitsel soc smuc'ubtesel q'uinal ya'iyic.

⁴ Te mach'a ya xc'opoj ta yan c'op, stuquel nax ya sta yip yo'tan; yan te mach'a ya yal te sc'op-jalwanej, ya ya'be yip yo'tan te iglesia.

⁵ Co'tanuc te apisilic ya xc'opojex ta yan c'op, pero ha bayel xan sc'oblal ta co'tan te ha'uc yac awalic te sc'op-jalwanej. Ha muc' xan sc'oblal te mach'a ya yal te sc'op-jalwanej te bin ut'il te mach'a ya xc'opoj ta yan c'op, ha nax teme ay mach'a ya sc'ases scuenta yu'un hich ya sta xan yip yo'tan te iglesia.

⁶ Ha yu'un, quermanotac, teme ya xtal jc'oponex ta yan c'op, ¿bin yac atahic a, ha to teme ya ca'beyex ana'ic te bin ac'bil ta na'el yu'un Dios, o te bin ay ta na'el, o sc'op-jalwanej, o p'ijubtesel?

⁷ Te sc'op te bintic ma cuxuluc, hich te bin ut'il amay o arpa, teme ma xchicnaj te jujun nota, ¿bin ut'il c'an jna'tic te bin yac stijbel ta amay o ta arpa?

⁸ Soc teme ma xchicnaj scuentahil te sc'op corneta, ¿mach'a c'an schahpan sba ta guerra yu'un?

⁹ Ha nix hichex, teme ma chicanuc ta a'iyel te c'op yac awalic, ¿bin ut'il c'an sna'be scuentahil te bin yac awalique? como hich ya xc'oht te yacat ta c'op ta ic'.

¹⁰ Melel ay bayel ta chahp c'opiletic ta bahlumilal, mayuc junuc te ma xchicnaj te bin ya sc'an ya yale.

¹¹ Pero teme ma jna'be scuentahil te c'ope, jyanlum c'ohemon yu'un te mach'a yac ta c'op, soc te mach'a yac ta c'op, ha jyanlum c'ohem cu'un.

¹² Ha nix hichex; te bin ut'il yac ac'anic te mahtaniletic yu'un te Espíritu, ha me xac'anic te mahtaniletic te ya ya'be yip te iglesia.

¹³ Ha yu'un te mach'a ya xc'opoj ta yan c'op, ac'a sc'ambe Dios te yacuc xhu' yu'un te ya sc'ases.

¹⁴ Teme ya jc'opon Dios ta c'op te ma na'biluc, ha ya sc'opon Dios te jch'uhlel, yan te jpensar mayuc bin ya sta a.

¹⁵ Ha yu'un ¿bin ya sc'an ya jpas? Ya jc'opon Dios soc te jch'uhlel, pero ha nix hich ya jc'opon Dios soc te jpensar; ya xc'ayojinon soc jch'uhlel, pero ha nix hich ya xc'ayojinon soc te jpensar,

¹⁶ como teme ha nax ta ach'uhlel yac awalbe lec sc'oblal Dios, te mach'a tey ay a te yac nax ta ya'iyel, ¿bin ut'il c'an yal, ‘Hichuc’ yu'un te bin yac awal wocol yu'une?

¹⁷ Te ha'ate melel yac awalbel wocol, pero ma ba ya yich' yip yo'tan a te yane.

¹⁸ Wocol yal Dios yu'un te c'ax hich ya xc'opojon a ta yan c'opiletic te bin ut'il te ha'exe;

¹⁹ pero ta iglesia ya jc'an te ho'p'ahluc nax ya xc'opojon soc te jpensar, scuenta sp'ijubtesel yantic, te bin ut'il te ya xc'opojon ta jpic soc ho'bahc' (10,000) ta p'ahl ta yan c'op.

²⁰ Quermanotac, ma me hichuc apensaric te bin ut'il alaletic; ha lec hichuquex te bin ut'il alaletic ta stojol te bin chopol, pero muc'ul ants-winicuquex ta scuenta apensaric.

²¹ Hich ts'ihbabil ta Ley: Aunque ya xc'opojon ta stojol te pueblo ini ta scuenta yan c'op soc ta scuenta ye jyanlumetic, ma ba ya ya'iybonic jc'op, xchi te Cajwaltique.

²² Ha yu'un te yan c'opiletic ha seña ta stojol mach'atic ma ba sch'uhunejic Dios, ma ha'uc ta stojol te mach'atic sch'uhunejic te Diose. Yan te sc'op-jalwanej, ha yu'un te mach'atic sch'uhunejic Dios, ma ha'uc yu'un te mach'atic ma ba sch'uhunejic te Diose.

²³ Ha yu'un teme spisil te iglesia ya stsob sbahic soc spisilic ya xc'opojic ta yan c'op, teme ya x'och tal mach'atic ma sna'beyic scuentahil o te ma ba sch'uhunejic te Diose, ¿ma bal yacuc yalic te sohquem ajolic?

²⁴ Yan teme apisilic yac awalbelic sc'op-jalwanej a te ya x'och tal mach'a ma ba sch'uhunej Dios o mach'a ma ba ya sna'be scuentahil, ya me xc'oht ta yo'tan soc ya me sna' te ay smul ta scuenta te bin yac awalique;

²⁵ ya xchicnajtesbot te bin muquen ay ta yo'tan. Hich ya squejan sba soc ya sch'uhuntay te Diose, ya me yal ta jamal te melel ay ta awohlilic te Diose.

²⁶ ¿Bin ya caltic yu'un, quermanotac? C'alal yac atsob abahic, jujutuhlex ayuc c'ayoj awu'unic, ayuc p'ijubtesel awu'unic, ayuc mach'a ya yac' ta na'el bin a'bot sna' yu'un Dios, ayuc mach'a ya xc'opoj ta yan c'op, soc ayuc mach'a ya sc'ases. Spisil me xapasic scuenta yu'un ya yich' yip awo'tanic a.

²⁷ Teme ay mach'a ya xc'opoj ta yan c'op, tic' a teme cha'tuhl o oxtuhl nax te hich ya spas, soc ac'a sjel sbahic; soc ayuc mach'a ya sc'ases.

²⁸ Teme mayuc mach'a ya sc'ases, ac'a ch'abuc ta iglesia, ac'a c'opojuc ta yo'tan soc te Diose.

²⁹ Ha nix hich te mach'a ya yal te sc'op-jalwanej, ac'a c'opojuc cha'oxtuhl, te yantic ac'a stsahtayic te bin ya yalique.

³⁰ Teme ay bin ya x'a'bot sna' yu'un Dios te yan mach'a hucule, ac'a scom sba ta c'op te mach'a nahil hahch ta c'op.

³¹ Ya xhu' te apisilic yac awalic te sc'op-jalwanej ta tuhlutuhl scuenta yu'un apisilic yac awich'ic nohptesel soc tsitsel.

³² Te espírituhetic yu'un te jalwanejetic ay ta cuentahinel yu'un te jalwanej,

³³ como te Dios ma ha'uc Dios yu'un te bin mayuc scuentahil bin ya yich' pasel, ha Dios yu'un lamal q'uinal. Hich te bin ut'il ay ta pasel ta spisil te iglesiahetic yu'un te mach'atic ch'uhltesbilic,

³⁴ te antsetic ma me xc'opojic ta banti yac atsob abahic; como ma xpas te ya xc'opojic, ac'a yac' sbahic ta cuentahinel, hich te bin ut'il ya yal te Ley.

³⁵ Teme ay bin ya sc'an ya sna'beyic scuentahil, ac'a sjoc'obe smamalalic ta sna, como ma snuhp'uc teme ya xc'opoj ants ta tsoblej.

³⁶ ¿Yu'un bal tey chicnaj tal ta atojolic a te sc'op Diose? ¿Yu'un bal atuquelic nax te hulem ta atojolic te sc'op Diose?

³⁷ Teme ay mach'a ya yal te ha jalwanej o te ay ta scuenta te Espíritu, ac'a sna' te ha mandariletic yu'un te Cajwaltic te bin ya jts'ihbayexe.

³⁸ Pero teme ay mach'a ma xyich' ta cuentahe, ma ba ya x'ich'ot ta cuenta.

³⁹ Ha yu'un, quermanotac, hichuc me awo'tanic te yac awalic te sc'op-jalwanej, soc ma me xacomic te mach'atic ya xc'opojic ta yantic c'opiletique.

⁴⁰ Pero spisil te bintic yac apasic, yich'ojuc scuentahil soc buen chahpambiluc.