1 Corintios 11 - Bible in Tzeltal Bachajón

¹ Nopbonic co'tan, hich te bin ut'il ya jnopbe yo'tan te Cristo.

Sc'oblal sjol ants-winiquetic

² Quermanotac, lec ac'oblalic cu'un te bin ut'il yac ana'onic soc awac'oj ta awo'tanic te p'ijubtesel la jcalbeyex hilele.

³ Pero ya jc'an yac ana'ic te bin ut'il te Cristo ha jolal yu'un spisil winiquetic, te winic ha jolal yu'un te ants, soc te Dios ha jolal yu'un te Cristo.

⁴ Spisil winiquetic te smucoj sjol a te ya sc'oponic Dios o te c'alal ya yalic te sc'op-jalwanej, ha ya yac' ta q'uexlal a te sjole.

⁵ Pero spisil antsetic te ma ba smucoj sjol a te ya sc'oponic Dios o te ya yalic te sc'op-jalwanej, ya yac' ta q'uexlal te sjole, como pajal soc teme quits'bil stsotsel sjol.

⁶ Teme ma ba ya smuc sjol te antse, ac'a set' loq'uel stsotsel sjol. Teme q'uexlaltic sba te ants te ya set' loq'uel stsotsel sjol o te ya squits'e, ac'a smuc sjol.

⁷ Te winic ma lecuc teme ya smuc sjol, como ha sloc'omba soc ha yutsilal te Diose; yan te antse, ha yutsilal te winique.

⁸ Como te winic ma ba talem ta ants, te ants talem ta winic.

⁹ Soc ma ta scajuc ants te la yich' pasel te winique, ha ta scaj winic te pasot te antse.

¹⁰ Ha scuentahil te ya sc'an te ay seña yip ya'tel ta sjol te ants, ta scaj te ch'ul a'batetique.

¹¹ Pero ta stojol te Cajwaltic, te winic ma ba ya xcuxaj teme mayuc te antse, soc te antse ma ba ya xcuxaj teme mayuc te winique.

¹² Como hich te bin ut'il talem ta winic te antse, ha nix hich te winic ya x'ayin ta scuenta ants; pero spisil talem ta stojol Dios.

¹³ Ha'ex nix xatsahic: ¿Lec bal teme ma ba smucoj sjol a te ya sc'oponic Dios te antse?

¹⁴ ¿Ma bal yacuc ya'botic jna'tic te stalel te winic te q'uexlaltic sba teme naht te stsotsel sjole?

¹⁵ Ma hichuc stuquel te antse, ha yutsil teme naht stsotsel sjol, como a'bot stsotsel sjol scuenta sjelol smuhquil te sjole.

¹⁶ Teme ay mach'a ya sc'an ya shach c'op, ac'a sna' te mayuc yan costumbre cu'untic o yu'un te iglesiahetic yu'un Dios.

Bin ma lecuc ay ta pasel ta yorahil Smesa Cajwaltic

¹⁷ Pero te bin ya calbeyex ta ora ini ma ba lec ac'oblalic cu'un, como ma ba yac atsob abahic ta spasel te bin lec, ha nax te bin ma lecuque.

¹⁸ Ha nahil ya calbeyex, te c'alal yac atsob abahic te bin ut'il ayex ta iglesia, ya ca'iy te wohc'owohc' yac awac' abahic; ay nix ya jch'uhun.

¹⁹ Hich yac ac'anic te wohc'owohc' yac awac' abahic scuenta yu'un ya xchicnaj ta awohlilic mach'atic a te tsahbilic ta ac'opic.

²⁰ Te c'alal yac atsob abahic, ma ha'uc yu'un yac awe'ic te we'elil yu'un Cajwaltique.

²¹ Como te c'alal ya xwe'ex, tuhlutuhl ya xnahilij ta stsaquel te swe'ele; ay mach'a ay ta wi'nal, ay yan mach'a ya xyacub.

²² ¿Yu'un bal mayuc anahic te banti ya xhu' ya xwe' x'uch'ex? O ¿ya bal ap'ajic te iglesia yu'un Dios soc ya bal awaq'uic ta q'uexlal te mach'atic mayuc bin ay yu'unique? ¿Bin ya calbeyex yu'un? ¿Lec bal ac'oblalic ya calbeyex? Ma'uc, ma ba lec ac'oblalic cu'un.

Smesa Cajwaltic

²³ Como la jquich' ta stojol Cajwaltic te bin la jca'beyex anopic: Te Cajwaltic Jesús, ta ahc'abal te ac'ot ta c'abal, la stsac te pan,

²⁴ c'alal la yalbe wocol Dios yu'un, la xet', hich la yal: Tsacahic, we'anic; ha jbaq'uetal ini te ac'bil ta acuentahic; pasahic ini scuenta jna'ojibal, xchi.

²⁵ Ha nix hich, c'alal laj yo'tanic ta we'el, la stsac te copa, hich la yal: Ha copa ini, ha te yach'il chapbil-c'op scuenta jch'ich'el; hich me xapasic te jujun buelta yac awuch'ic, scuenta jna'ojibal, xchi.

²⁶ Ha yu'un te jujun buelta te yac awe'ic te pan soc te yac awuch'ic te bin ay ta copa ini, ha yac apuquic ta halel te cham te Cajwaltic, ha to c'alal ya xcha'tal xan.

Te bin ma hichuc ya sc'an pasel ta we'el yu'un te Cajwaltique

²⁷ Ha yu'un te mach'a mayuc scuentahil ta yo'tan te ya swe' te pan soc te ya yuch' te bin ay ta copa ini, ha me smul ya xc'oht ta stojol te sbaq'uetal soc te sch'ich'el te Cajwaltique.

²⁸ Ha yu'un nahil ac'a stsahtay yo'tan ta tuhlutuhl, hich yac awe'ic a te pan soc yac awuch' a te bin ay ta copa.

²⁹ Como te mach'a mayuc scuentahil ta yo'tan te ya swe' soc te ya yuch', te ma ba ya sna'be scuentahil te sbaq'uetal te Cajwaltic, ha smul ya xc'oht te ya swe' soc ya yuch'.

³⁰ Ha scuentahil te tsobolic ayic ta chamel soc mayuc yip sbaq'uetalic ta awohlilic, soc te bayel wayem sbaq'uetalic.

³¹ Ha yu'un teme ya jtsahtay co'tantic, ma ba ya jtahtic ich'el ta c'op.

³² Pero teme ya yich'otic ta c'op te Cajwaltic, ya quich'tic tojobtesel scuenta yu'un ma ba pajal ya quich'tic castigo soc a te mach'atic yu'un te bahlumilale.

³³ Ha yu'un, quermanotac, te c'alal yac atsob abahic ta we'el, talel c'axel me xamahliy abahic.

³⁴ Teme ay mach'a ay swi'nal, ac'a we'uc ta sna, scuenta yu'un ma ba yac atsob abahic scuenta yich'el castigo. Te bintic xan ya sc'an chahpanel, ya jchahpan te c'alal ya xtalone.