1 Corintios 10 - Bible in Tzeltal Bachajón

Ya'beyel sna'ic te ma lecuc sch'uhunel loc'ombahetic

¹ Quermanotac, ya jc'an te yac ana'ic te spisil te jme'jtatic axintesotic ta tocal soc c'axic ta Mar;

² spisilic jun c'ohtic soc Moisés ta scuenta ich'-ha' ta tocal soc ta mar,

³ soc spisilic pajal la swe'ic te we'elil scuenta espíritu

⁴ soc pajal la yuch'ic te ha' scuenta espíritu; como la yuch'be ya'lel te muc'ul ton scuenta espíritu te joquimbilic yu'une. Te muc'ul ton ha te Cristo.

⁵ Pero ay tsobolic te ma lecuc yo'tan Dios yu'unic, ha scuentahil tey chamic hilel ta jochol taquin q'uinal a.

⁶ Scuenta quich'o-q'uehltic te hich c'oht ta pasel, scuenta yu'un ma ba ya xbic'taj co'tantic yu'un bintic chopol, hich te bin ut'il bic'taj yo'tanic stuquel.

⁷ Ma me xach'uhunic loc'ombahetic, hich te bin ut'il ay la spasic stuquelic; hich te bin ut'il ts'ihbabil: Te pueblo la shuhcan sbahic ta we'el uch'el, patil hahch spasic q'uin, te xchihe.

⁸ Soc ma me xca'iytic antsiwej, hich te bin ut'il ay la spasic stuquelic, te ta junax c'ahc'al lajic cha'pic soc swaxaclajunbahc' (23,000) yu'un.

⁹ Soc ma me jtsajtic te Cajwaltic, hich te bin ut'il ay la stsajic stuquelic, hich lajic ta ti'el ta chan.

¹⁰ Soc ma me xawa'iyic wulwul-c'op, hich te bin ut'il ay la ya'iyic wulwul-c'op stuquelic, hich lajinotic yu'un te jlajinwaneje.

¹¹ Hich c'oht ta pasel scuenta ich'o-q'uehl, soc hich ts'ihbabil hilel yu'un ya stsitsotic ho'otic te la stahotic te slajibal c'ahc'ale.

¹² Ha yu'un te mach'a ya scuy te ay yip ta tec'lej, ac'a stsahtay sba te ma ba ya xyahle.

¹³ Mayuc c'ohem ta acuentahic sujel ta mulil te ma hichuc ya xc'oht ta scuenta spisil ants-winiquetic; pero stalel jun yo'tan ta jtojoltic te Diose, ma ba ya yac' te yac awich'ic tsajel te ma xcuhch awu'unic, ha pajal ya yac' soc te tsajel te bin ut'il ya xhu' ya xloq'uex ta stojol te tsajel, scuenta yu'un ya xcuhch awu'unic a.

¹⁴ Ha yu'un, ha'ex te c'uxex ta co'tan, ahnanic loq'uel ta stojol sch'uhunel loc'ombahetic.

¹⁵ Hich ya jc'oponex te bin ut'il ha'ex yac ana'ic q'uinal; nopa awa'iyic teme lec o teme ma lecuc te bin ya calbeyexe.

¹⁶ Te copa yu'un bendición te ya calbe wocol Dios yu'un, c'alal ya cuch'tic ¿ma bal ha'uc jun co'tan ya xc'ohotic soc a te sch'ich'el Cristo? Soc te pan ya jxet'tic, ¿ma bal ha'uc jun co'tan ya xc'ohotic soc a te sbaq'uetal Cristo?

¹⁷ Te bin ut'il junax te pan, ha nix hichotic te bin ut'il tsobolotic, junax baq'uet ayotic, como junax pan ya jwe'tic jpisiltic.

¹⁸ Ilawil te Israel ta scuenta ch'ich'-baq'uet: Te mach'atic ya swe'ic te milbil mahtaniletic, ¿ma bal ha'uc jun yo'tan ya xc'ohtic soc a te scajtajib ta chiq'uel mahtanil?

¹⁹ ¿Bin ya cal yu'un? ¿Ha bal ay sc'oblal te loc'omba o ha ay sc'oblal te milbil mahtanil ac'bil ta stojol te loc'ombahetique?

²⁰ Ma'uc, pero te c'alal ya yaq'uic te milbil mahtaniletic te jyanlumetic, ha ya ya'beyic te pucujetic, ma ha'uc ya ya'beyic te Diose. Ma jc'an te jun awo'tanic ya xc'ohex soc te pucujetique.

²¹ Ma xhu' yac awuch' te copa yu'un Cajwaltic soc te copa yu'un te pucujetique; ma xhu' ya xwe'at ta smesa te Cajwaltic soc ta smesa te pucujetique.

²² ¿Ya bal sc'an te ya cac'tic chicnajuc te xut'et yo'tan te Cajwaltique? ¿Yu'un bal c'ax bayel xan quiptic a te bin ut'il ay stuquele?

Pasahic spisil scuenta yich'el ta muc' Dios

²³ Libre ayon ta spasel spisil, pero ma spisiluc lec. Libre ayon ta spasel spisil, pero ma spisiluc ya xlecubteswan.

²⁴ Ma me ayuc mach'a te stuquel nax ya sle yutsil slequil, ac'a slehbe yutsil slequil te yantique.

²⁵ Te bintic ya xchonot ta banti ya yich' chonel ti'bal, we'an me, ma xajoc'oy, scuenta yu'un ma x'ochat na'etel yu'un,

²⁶ como ha yu'un Cajwaltic te bahlumilal soc spisil bintic ay tey a.

²⁷ Teme ay ya yiq'uex ta we'el te mach'a ma ba sch'uhunej Dios, teme yac ac'an ya xbahex, we'anic spisil bintic ya xpahchambotex, ma me xajoc'oyic scuenta yu'un ma ba ya x'ochat na'etel yu'un.

²⁸ Yan teme ay mach'a ya yalbeyex: Ha ini a'bot scuenta milbil mahtanil yu'un te loc'ombahetic, teme xchihe, ma me xawe'ic ta scaj te mach'a hich la yal soc scuenta yu'un ma ba ya x'och na'etel yu'un, como ha yu'un Cajwaltic te bahlumilal soc spisil bintic ay tey a.

²⁹ Ha ya cal te na'etel yu'un te yane, ma ha'uc te na'etel awu'une. ¿Bin yu'un ya quich' ich'el ta c'op ta scaj te na'etel yu'un te yane, te bin ut'il libre ayon te ho'one?

³⁰ Teme ya calbe wocol Dios yu'un te bin ya jwe', ¿bin yu'un te ya quich' bohlc'optayel yu'un te bin la jcalbe wocol Dios yu'une?

³¹ Ha yu'un teme ya xwe'ex o ya x'uch'ex o biluc yac apasic, pasahic spisil ta scuenta yich'el ta muc' te Diose.

³² Ma me ha'uc sc'ohchinojibal ya xc'ohex yu'un te judíohetic, jyanlumetic o te iglesia yu'un Dios.

³³ Ha nix hichon, ta spisil ya jle bin ut'il lec yo'tanic yu'un spisil bintic ya jpas, ma jtuqueluc ya jle cutsil jlequil, ha ya jlehbe yutsil slequil tsobol yantic, scuenta yu'un hich ya xcolic a.