Zacarías 8 - Bible in Tzotzil de Chenalhó with Deuterocanon

Laj yal Dios ti ta to xlic scolta li Jerusalene

¹ La sc'opanun yan velta li Muc'ul Dios ti tspas ta mantal scotol te ta vinajele, jech laj yalbun:

² “Vu'un li Muc'ul Diosun ti ta jpas ta mantal scotol te ta vinajele, jech chcal: Tsots i'it'ixaj co'nton yu'un li Sione, yu'un toj juteb co'nton yu'un.

³ Ja' yu'un jech chcal vu'un li Muc'ul Diosune: Ta xlic jtoy liquel yan velta li Sione; ta xlic naquicun yan velta te ta Jerusalén. Li Jerusalene ja' Slumalic li Boch'o Jun Yo'ntonique, xi sbi chc'ot. Li vits yu'un Muc'ul Dios ti tspas ta mantal scotol te ta vinajele ja' Ch'ul Vits, xi sbi chc'ot.

⁴ Ta to xlic chotiicuc yan velta mol me'eletic ta xoraltic ta Jerusalén, xoq'uioj xa sba ta snamte'ic ta scoj ti ep c'ac'al chch'iique.

⁵ Jech noxtoc ta xnoj ta bic'tal querem tsebetic li xoraltique, te ta xtajinic.

⁶ Li scomelal jteclume vocol chch'unic me xu' chc'ot ta pasel jech c'alal me la sta sc'ac'alil le'e. Pero ¿me vocol chc'ot ta pasel cu'un?, vu'un li Muc'ul Diosun ti ta jpas ta mantal scotol te ta vinajele.

⁷ Jech chcal noxtoc vu'un li Muc'ul Diosune: Li jteclumale ta jcolta loq'uel tal ta sc'ob li cristianoetic ta sloq'ueb c'ac'ale xchi'uc ta sc'ob li cristianoetic ta smaleb c'ac'ale.

⁸ Ta xlic quiq'uic tal ta Jerusalén; te ta xvul naquiicuc. Ja' jteclumal ta xc'otic, jech vu'un Diosun yu'unic chic'ot. Jun co'nton o ta stojolic; tuc' c'usi ta jpas ta stojolic”, xi li Diose.

⁹ Jech chal noxtoc li Muc'ul Dios ti tspas ta mantal scotol te ta vinajele: “Oyuc me stsatsal avo'ntonic vo'oxuc ti laj ava'yic c'usi laj yalic li j'alc'opetic c'alal lic yich' liquesbel snacleb sventa chich' cha'va'anel jch'ulna, vu'un li Muc'ul Diosun ti ta jpas ta mantal scotol te ta vinajele.

¹⁰ C'alal mu'yuc to'ox chc'ot yorail le'e, mu'yuc stojol j'abtel viniquetic xchi'uc chonbolometic, xchi'uc mu'yuc boch'o jun yo'nton chloc' ch-och ta scoj li yajcontraique. Vu'un laj cac' ti ac'o scontrain sbaic li cristianoetique.

¹¹ Pero li' ta orae mu xa jechuc ta jpasbe li scomelal jteclum jech chac c'u cha'al ic'ot ta pasele. Jech chcal jtuc, vu'un li Muc'ul Diosun ti ta jpas ta mantal scotol te ta vinajele.

¹² Yu'un li jun o'ntonale te ta xcac' ta stojolic. Li ts'usubtique chlic satinicuc. Li banamile ep c'usitic ta sloq'ues. Li vinajele ta xac' tal sjob. Ja' ta xcac'be yu'uninic scotol li scomelal jteclume.

¹³ Smomnich'nab Judá, smomnich'nab Israel, vo'oxuc ti chopol ac'oplalic te ta stojol yanlum cristianoetique, ta xlic jcoltaoxuc; ta xlic cac' lecubuc ac'oplalic. Mu me xaxi'ic; tsatsubtaso avo'ntonic”, xi li Diose.

¹⁴ Jech chal noxtoc li Muc'ul Dios ti tspas ta mantal scotol te ta vinajele: “Jech chac c'u cha'al la jnop ti chopol c'usi la jpasbe li amoltot ayame'ic ti c'alal la sa'bicun sc'ac'al co'ntone, laj ono'ox jpas.

¹⁵ Ja' jech jnopoj ta jpasbe c'usi lec li Jerusalén xchi'uc li smomnich'nab Judae, ja' yu'un mu me xaxi'ic.

¹⁶ Li c'usi tsc'an chapasique ja' li'i: Meleluc me c'usi chavalbe abaic; tuc' xachapanvanic, jech mu'yuc c'op, jun avo'ntonic.

¹⁷ Mu me boch'o chopol c'usi snop ta stojol xchi'il avu'unic, xchi'uc mu me ja'uc lec xava'yic yalel ta jamal ta jbi li c'usi mu meleluque, yu'un scotol le'e bats'i chopol chquil vu'un li Muc'ul Diosune”, xi li Diose.

¹⁸ Li Muc'ul Dios ti tspas ta mantal scotol te ta vinajele la sc'opanun noxtoc, jech laj yalbun:

¹⁹ “Li ictaej ixim tspasic ta xchanibal u, ta yo'obal u, ta svucubal u, xchi'uc ta slajunebal ue, ta xc'ataj ta tse'ej lo'il, ta xcuxetel yo'ntonic, ta muc'ta q'uin yu'unic li smomnich'nab Judae. Ja' yu'un ja' me c'anic li c'usi melele xchi'uc li jun o'ntonale”, xi.

²⁰ Li Muc'ul Dios ti tspas ta mantal scotol te ta vinajele jech chal noxtoc: “Ta to xtal ep cristianoetic ta bic'tal lum xchi'uc ta muc'tiquil lum.

²¹ Jech chalbe sbaic li jujun lume: ‘Bat jsa'betic slequilal li Muc'ul Diose’, xut sbaic. ‘Ta xibat ec’, xi li yantique.

²² Jech ep ta lum cristianoetic xchi'uc ep yantic tsatsal banamil ta xtalic ta Jerusalén. Yu'un ta sa'beic slequilal li Muc'ul Dios ti tspas ta mantal scotol te ta vinajele.

²³ C'alal me la sta sc'ac'alil le'e, lajuneb viniquetic ta jujuchop c'op ta scotol banamil chbat stsacbeic yoc sc'u' jun judá vinic, jech chalbeic: ‘Ta xbat jchi'inotcutic ec, yu'un laj ca'icutic ti te oy ta atojolic li Diose’, xutic”, xi li Diose.