Zacarías 6 - Bible in Tzotzil de Chenalhó with Deuterocanon

Li Zacariase laj yil ta xch'ulel chanib careta sventa pleito

¹ La jtoy jsat noxtoc, ja' to laj quil oy chanib careta iloq'uic tal ta chib vits; li vitsetique xco'laj xchi'uc bronce taq'uin yilel.

² Li sba cotal caretae nitbil ta tsajal ca'etic. Li xchibale nitbil ta ic'al ca'etic.

³ Li yoxibale nitbil ta saquil ca'etic. Li xchanibale nitbil ta pinto ca'etic.

⁴ Jech la jac'be li j'almantal te ta sc'opanune: “Cajval ¿c'usi smelol le'e?”, xcut.

⁵ Jech la stac'bun: “Le'e ja' senyail li ic' ta xchanjotal xchiquin vinajel ti te chloc' tal ta stojol li Yajval sbejel banamile.

⁶ Li careta nitbil ta ic'al ca'etique te chbat ta stuq'uil norte. Li careta nitbil ta saquil ca'etique ja' te chbat noxtoc. Li yan careta nitbil ta pinto ca'etique ja' te chbat ta stuq'uil sur”, xiyutun.

⁷ Yan li careta nitbil ta tsajal ca'etique ja' chbat xanic scotol li banamile, jech i'albatic yu'un li j'almantale: “Bat xanic scotol li banamile”, x'utatic. Jech bat xanic scotol li banamile.

⁸ Li j'almantale laj yic'un, jech laj yalbun: “A'yo ava'ay, li boch'o ibatic ta nortee ja' bat slamesbeic sc'ac'al yo'nton Muc'ul Dios te ta banamil”, xiyutun.

Li Josuee laj yich' ac'bel scoronail sjol

⁹ La sc'opanun yan velta li Muc'ul Diose, jech laj yalbun:

¹⁰ “Tsobo li jmoton ti chaq'uic li Heldai, Tobías, xchi'uc Jedaías ti isutic tal ta chuquel ta Babiloniae. Te no'ox ta sc'ac'alil xabat ta sna li Josías xnich'on Sofoniase.

¹¹ Ich'o li saquil taq'uin xchi'uc li c'anal taq'uin chaq'uique. Paso ta corona; xojbo ta sjol li banquilal pale Josué xnich'on Josadaque.

¹² Jech xavalbe: ‘Jech chal li Muc'ul Dios ti tspas ta mantal scotol te ta vinajele: Q'uelavilic, li' oy li vinic ti Ach' Sq'uelum xi sbie; ta xlic q'uelumajuc, ja' ta xcha'pas li ch'ulna cu'une.

¹³ Ja' ta xcha'pas li ch'ulna yu'un Muc'ul Diose. Ta xlic yich' ich'el ta muc', ta xlic chotluc ta xchotleb, ta xlic spas mantal, xchi'uc te ta xchoti jun pale ta sts'el. Lec co'ol yo'nton xchibalic.

¹⁴ Li coronae te chcom ta ch'ulna yu'un Muc'ul Dios; ja' sventa sna'ubilic li Helem, Tobías, Jedaías, xchi'uc Hen, ja' li xnich'on Sofoniase.

¹⁵ “Li boch'otic nom to nacalique chtal coltavanicuc ta xcha'pasel ec li ch'ulna yu'un Muc'ul Diose, jech chana'ic o ti ja' la stacun tal ta atojolic li Muc'ul Dios ti tspas ta mantal scotol te ta vinajele. Ja' jech ta xc'ot ta pasel me chavich'ic ta muc', me chach'unbeic c'usi chal li Muc'ul Dios avu'unique’, uto”, xi li Muc'ul Diose.