Zacarías 4 - Bible in Tzotzil de Chenalhó with Deuterocanon

Li Zacariase laj yil ta xch'ulel candelero xchi'uc olivatic

¹ Ital ta jtojol yan velta li j'almantal la sc'opanune; la stijun jech chac c'u cha'al chich' tijel boch'o vayem.

² Jech la sjac'bun: “¿C'usi chavil?”, xiyutun. Jech la jtac'be: “Ta xquil jun candelero pasbil ta bats'i c'anal taq'uin, xchi'uc jun yav aceite ta sjol, xchi'uc vucub scandilaltac, xchi'uc vucxol sbe aceite ta sventa li slusaltaque.

³ Xchi'uc te oy cha'tec' oliva ta nopol li yavil aceitee, jun ta bats'ic'ob jun ta ts'et”, xcut.

⁴ Jech la jac'be noxtoc li j'almantal te ta jchi'in ta lo'ile: “Cajval cu'un, ¿c'usi smelol le'e?”, xcut.

⁵ Jech la stac'bun: “¿Me mu xana' c'usi smelol?”, xiyutun. “Mu jna', Cajval”, xcut.

⁶ Ja' yu'un te lic yalbun: “Li Muc'ul Diose ja' jech chalbe li Zorobabele: ‘Muc ta sventauc soldadoetic, muc ta stsatsaluc cristiano; ja' no'ox ta sventa jvu'el jtuc’, xi li Muc'ul Dios ti tspas ta mantal scotol te ta vinajele.

⁷ ‘¿C'usi xu' avu'un li vo'ote, muc'ta vits? ¡Ta stojol li Zorobabele ja' jech chacom jech chac c'u cha'al stenlejaltic! Ja' ta stsac tal li sba bejal ton ti toj leque, jech ta x'avanic li cristianoetique: ¡Toj c'upil sba! ¡Toj c'upil sba!, xiic’, xi li Diose”, xiyutun li j'almantale.

⁸ La sc'opanun li Muc'ul Diose, jech laj yalbun:

⁹ “Li Zorobabele laj xa sliquesbe snacleb li ch'ulnae; ja' ta stsutses o spasel. Jech chana'ic o ti ja' la stacun tal ta atojolic li Muc'ul Dios ti tspas ta mantal scotol te ta vinajele.

¹⁰ Li boch'otic mu'yuc stu laj yilic li yunin liqueb yabtel Zorobabele, xcuxet no'ox yo'ntonic ta ts'acal ti c'alal chilic tstsuts xa batel li abtele”, xi li Diose. Li j'almantale jech laj yalbun: “Li vucub candiletic laj avile ja' senyail sat li Muc'ul Diose yu'un sq'ueloj o scotol li banamile”, xiyutun.

¹¹ Jech la jac'be: “¿C'usi smelol li cha'tec' oliva te' jun ta bats'ic'ob jun ta ts'etc'ob oy yu'un li candeleroe?”, xcut.

¹² La jac'be yan velta noxtoc: “¿C'usi smelol li cha'jec sc'ob oliva te' te ta sts'el li sbe aceite pasbil ta c'anal taq'uin sventa candiletique?”, xcut.

¹³ Jech la stac'bun: “¿Me mu xana' c'usi smelol le'e?”, xiyutun. “Mu jna' Cajval”, xcut.

¹⁴ Jech laj yalbun: “Le'e ja' smelol li boch'o voc'bilic yu'un li Boch'o sventainoj sbejel banamile”, xiyutun.